നാടകമോ ജീവിതമോ എന്ന് പ്രേക്ഷകനെ ചിന്തിപ്പിച്ച് ടിപ്പിക്കൽ എൽജെപി സ്റ്റൈലിൽ എത്തിയ ചിത്രമാണ് ഒറ്റവാക്കിൽ ‘നൻപകൽ നേരത്ത് മയക്കം’. എന്നാൽ ഇത്തവണ മനുഷ്യന്റെ സംഘർഷങ്ങൾ സാഹചര്യങ്ങളിൽ അല്ല, മറിച്ച് പ്രധാന കഥാപാത്രത്തിന് ഉള്ളിലാണെന്ന് മാത്രം. മികച്ച റിവ്യുവും പ്രേക്ഷക പ്രതികരണങ്ങളും മമ്മൂട്ടി എന്ന നടന്റെ അഭിനയ തികവിന് കൂടി അവകാശപ്പെട്ടതാണ്.
ചിത്രം തിയേറ്ററിൽ ആദ്യ രണ്ട് ദിവസങ്ങളിൽ 1.76 കോടി നേടിയതായാണ് അനൗദ്യോഗിക കണക്കുകൾ. മൂന്നാം ദിവസമായ ഇന്ന് 1.11 കോടി നേടിയതായി കണക്കാക്കുന്നു. ആദ്യ രണ്ട് ദിവസങ്ങളിലെ കളക്ഷൻ യഥാക്രമം 0.93 കോടിയും 0.83 കോടിയും ആണ്. രണ്ടാം ദിവസത്തെ കളക്ഷൻ ആദ്യത്തെതിനേക്കാൾ 10.75 ശതമാനം കുറവാണ്. എന്നാൽ മൂന്നാം ദിനം മെച്ചപ്പെട്ട കളക്ഷൻ ചിത്രത്തിനുണ്ട്.
sacnilk.com പുറത്തുവിടുന്ന കണക്കുകൾ പ്രകാരം, 26.36 ശതമാനം, 30.00 ശതമാനം, 34.40 ശതമാനം എന്നിങ്ങനെയാണ് മോണിംഗ്, ആഫ്റ്റർനുൺ, ഈവനിംഗ് ഷോകളിൽ ആളുകളുടെ എണ്ണം. നൈറ്റ് ഷോകളുടെ കണക്ക് ലഭ്യമല്ല.
ചിത്രത്തിന്റെ തമിഴ് റിലീസും അണിയറപ്രവർത്തകർ പ്രഖ്യാപിച്ച് കഴിഞ്ഞു. റിപബ്ലിക്ക് ദിനമായ ജനുവരി 26-നാണ് നൻപകൽ തമിഴ് റിലീസായി എത്തുക. കഥയ്ക്ക് തമിഴ് ബന്ധം ഉള്ളതുകൊണ്ട് തന്നെ, തമിഴർക്ക് തമിഴ് സിനിമയായിട്ടും മലയാളികൾക്ക് മലയാളം സിനിമയായും ഒരേസമയം കാണാൻ കഴിയുന്ന തരത്തിലാണ് ചിത്രത്തെ പ്ലെയ്സ് ചെയ്തിരിക്കുന്നത് എന്ന് ലിജോ ജോസ് പെല്ലിശ്ശേരി ഒരഭിമുഖത്തിൽ പറഞ്ഞിരുന്നു.
എസ് ഹരീഷിന്റെ തിരക്കഥയിലൊരുങ്ങിയ ചിത്രത്തിൽ നാടകക്കാരനായ ജെയിംസ് ആണ് മമ്മൂട്ടി കഥാപാത്രം. തുടർന്ന് ജെയിംസ് സുന്ദരമെന്ന തമിഴനായുള്ള പരകായ പ്രവേശമാണ് ചിത്രം. ഐഎഫ്എഫ്കെ വേദികളിൽ മികച്ച അഭിപ്രായം നേടിയ സിനിമ മേളയിൽ മികച്ച മലയാള സിനിമയ്ക്കുള്ള പ്രേക്ഷക പുരസ്‌കാരം സ്വന്തമാക്കിയിരുന്നു. തുടർന്ന് സിനിമാസ്വാദകർ ഒന്നടങ്കം നൻപകലിന്റെ റിലീസിനായി കാത്തിരിക്കുകയായിരുന്നു. നാടകമോ ജീവിതമോ എന്ന് പ്രേക്ഷന് വിലയിരുത്താൻ വിട്ടുകൊടുത്താണ് ലിജോ ചിത്രം അവസാനിപ്പിക്കുന്നത്.
Story Highlights: Nanpakal Nerathu Mayakkam collection report
