ഇന്ത്യൻ സിനിമയെന്നാൽ ബോളിവുഡ് അല്ലെന്ന് ലോകം കണ്ട വർഷമാണ് കടന്നുപോയത്. 2022ൽ പ്രാദേശിക ഭാഷാ ചിത്രങ്ങൾ വിസ്മയക്കാഴ്ചകൾ ഒരുക്കി. തമിഴ്, തെലുങ്ക്, കന്നട ഭാഷാ ചിത്രങ്ങൾ ആഗോള വിപണിയിൽ ഇടം നേടി. അല്പമൊന്ന് തട്ട് താഴ്ന്ന ഹിന്ദി ചലച്ചിത്രലോകം ഷാരൂഖ് ഖാൻ ചിത്രം ‘പത്താൻ്റെ’ റീലീസോടെ വീണ്ടും ശക്തമായ തിരിച്ചുവരവ് നടത്തുമെന്നാണ് പ്രതീക്ഷിക്കുന്നത്. 2023ൻ്റെ സിനിമ സീസൺ ഇനി ബോക്സ് ഓഫീസ് മത്സരക്കാഴ്ചകൾക്ക് വേദിയായേക്കും. വരാനിരിക്കുന്ന റിലീസുകളുടെ ലിസ്റ്റ് നൽകുന്ന സൂചനയും അതുതന്നെയാണ്. റിപ്പോർട്ടുകൾ പ്രകാരം ഈ വർഷം ഏപ്രിലിൽ വമ്പൻ റിലീസുകൾ ആണ് വരുന്നത്. ഈസ്റ്റർ, ഈദുൽ ഫിത്ർ അവധിദിവസങ്ങൽ ലക്ഷ്യമിട്ട് തമിഴിൽ നിന്നും ഹിന്ദിയിൽ നിന്നും ബിഗ് ബജറ്റ് ചിത്രങ്ങൾ മത്സരിക്കാനുണ്ട്. രജനികാന്തും ബോളിവുഡിൽ നിന്ന് സൽമാൻ ഖാനും ഐശ്വര്യ റായിയും ഏപ്രിൽ മാസം ബോക്സ് ഓഫീസ് പൂരപ്പറമ്പാക്കും.
ഐശ്വര്യ റായി തെന്നിന്ത്യയിലേക്ക് ശക്തമായ മടങ്ങിവരവ് നടത്തിയ ‘പൊന്നിയിൻ സെൽവൻ’ രണ്ടാം ഭാഗം ഏപ്രിൽ മാസത്തിൽ ആണ് റിലീസ്. നന്ദിനി എന്ന കഥാപാത്രത്തിന്റെ കൂടുതൽ ഭാഗവും മറഞ്ഞിരിക്കുന്ന ഒരു ഐശ്വര്യ റായ് കഥാപാത്രവും ചിത്രത്തിൽ ഉണ്ട്. മണിരത്നം സംവിധാനം ചെയ്ത ചിത്രത്തിൽ തമിഴ് സൂപ്പർ താരങ്ങളായ വിക്രം, കാർത്തി, ജയം രവി, തൃഷ, ജയറാം തുടങ്ങിയ വലിയ താരനിരയും ഒപ്പമുണ്ട്. 2022ൽ റിലീസ് ചെയ്ത പൊന്നിയിൻ സെൽവൻ 400 കോടി ക്ലബ്ബിൽ ഇടം നേടിയിരുന്നു. രണ്ടാം ഭാഗത്തിൻ്റെ റിലീസ് 2023 ഏപ്രിൽ 28നാണ് അറിയിച്ചിരിക്കുന്നത്. കൽക്കി കൃഷ്ണമൂർത്തിയുടെ ഇതേ പേരിലുള്ള നോവലിൻ്റെ ചലച്ചിത്ര ആവിഷ്കാരമാണ് ചിത്രം.
രജനികാന്തിൻ്റെ ‘ജയിലറാ’ണ് ഏപ്രിൽ പകുതിയോടെ തിയറ്ററിലെത്തുന്ന മറ്റൊരു വലിയ പ്രോജക്ട്. നെൽസൺ ദിലീപ് കുമാർ സംവിധാനം ചെയ്യുന്ന ചിത്രത്തിൽ വലിയ താരനിരയാണ് അണിനിരക്കുന്നത്. മലയാളത്തിൽ നിന്നും മോഹൻലാൽ, തെലുങ്കിൽ നിന്നും സുനിൽ, കന്നട സിനിമാലോകത്ത് നിന്നും ശിവരാജ്കുമാർ എന്നിങ്ങനെ താരമൂല്യം ഏറെയുള്ള ചിത്രമാണ് ജയിലറും. അതേസമയം മണിരത്നം ചിത്രവുമായുള്ള ക്ലാഷ് ഒഴിവാക്കാൻ റിലീസ് ആഗസ്റ്റ് 11ലേയ്ക്ക് മാറ്റുമെന്നും റിപ്പോർട്ട് ഉണ്ട്.
ഏപ്രിൽ മാസത്തിലെ മറ്റൊരു വലിയ റിലീസ് ബോളിവുഡ് താരം സൽമാൻ ഖാൻ്റെ ‘കിസി കാ ഭായ് കിസി കാ ജാനാണ്’. പൂജ ഹെ‍ഡ്ജെ നായികയാകുന്ന ചിത്രത്തിൽ തെലുങ്ക് താരം വെങ്കിടേഷ്, ജഗപതി ബാബു തുടങ്ങിയവരും പ്രധാന കഥാപാത്രങ്ങളാകുന്നു. അജിത്തിൻ്റെ ഹിറ്റ് തമിഴ് ചിത്രം ‘വീരത്തി’ൻ്റെ റീമേക്കാണ് സൽമാൻ ഖാൻ്റെ ഈ ചിത്രം. ഈദുൽ ഫിത്റിനോട് അനുബന്ധിച്ച് ഏപ്രിൽ 21 നാണ് ചിത്രത്തിൻ്റെ റിലീസ്. ബോളിവുഡിൽ കിംഗ് ഖാൻ ഷാരൂഖിനോളം പോന്ന സ്വീകാര്യതയാണ് സൽമാനുള്ളത്. Story Highlights: Salman – Khan Rajanikanth – Aishwarya Rai to have releases in April 2023
