പെർത്ത്: ഇമെയിൽ വിലാസത്തിലെ ചെറിയൊരു അക്ഷരത്തെറ്റ് ശ്രദ്ധയിൽപ്പെട്ടതിനെ തുടർന്ന് ഓസ്ട്രേലിയയിൽ വൻ സാമ്പത്തിക തട്ടിപ്പ് ഒഴിവാക്കാൻ ബാങ്ക് ജീവനക്കാരിക്ക് കഴിഞ്ഞു. വെസ്റ്റ്പാക് (Westpac) ബാങ്കിന്റെ റിവർട്ടൺ ശാഖയിലെ ജീവനക്കാരിയായ നീത് കുക്രേജയുടെ (Neet Kukreja) കൃത്യമായ ഇടപെടലാണ് ഒരു യുവതിയുടെ ജീവിത സമ്പാദ്യം മുഴുവൻ നഷ്ടപ്പെടുന്നതിൽ നിന്ന് രക്ഷിച്ചത്. തന്റെ ആദ്യത്തെ വീട് വാങ്ങാനായി ബാങ്കിൽ സൂക്ഷിച്ചിരുന്ന 1.2 ദശലക്ഷം ഓസ്ട്രേലിയൻ ഡോളർ (ഏകദേശം 10 കോടിയോളം ഇന്ത്യൻ രൂപ) തട്ടിയെടുക്കാനാണ് സൈബർ ക്രിമിനലുകൾ പദ്ധതിയിട്ടത്.
സംഭവം ഇങ്ങനെ
തന്റെ സ്വപ്ന ഭവനം വാങ്ങുന്നതിനുള്ള അവസാനഘട്ട നടപടികൾക്കായി ബാങ്കിലെത്തിയതായിരുന്നു യുവതി. ഇതിനിടയിലാണ് അവളുടെ സോളിസിറ്ററുടെ (നിയമജ്ഞന്റെ) പേരിൽ ഒരു വ്യാജ ഇമെയിൽ സന്ദേശം വരുന്നത്. പണം ഉടൻ തന്നെ മറ്റൊരു അക്കൗണ്ടിലേക്ക് മാറ്റണമെന്നായിരുന്നു സന്ദേശത്തിലെ ഉള്ളടക്കം. ഇതോടെ പരിഭ്രാന്തിയിലായ യുവതി പണം കൈമാറാൻ ബാങ്ക് ഉദ്യോഗസ്ഥയായ നീത് കുക്രേജയെ സമീപിക്കുകയായിരുന്നു.
അക്ഷരത്തെറ്റും ലീവും നൽകിയ സൂചന
എന്നാൽ പണം കൈമാറുന്നതിന് മുൻപ് ഇമെയിലുകൾ പരിശോധിച്ച നീതിന് ചില സംശയങ്ങൾ തോന്നി. സാധാരണയായി ഇത്തരം ഇടപാടുകളിൽ അയക്കാറുള്ള രീതിയിലുള്ള സന്ദേശമായിരുന്നില്ല അത്. കൂടാതെ, ഇമെയിൽ അയച്ചതായി കാണിച്ചിരുന്ന വെസ്റ്റ്പാക് ബാങ്കിന്റെ മറ്റൊരു ജീവനക്കാരി നിലവിൽ അവധിയിലാണെന്ന് നീതിന് അറിയാമായിരുന്നു.
തുടർന്ന് നടത്തിയ വിശദമായ പരിശോധനയിലാണ് ഇമെയിൽ വിലാസത്തിലെ ആ വൻ ചതി പുറത്തായത്. ബാങ്കിന്റെ ഔദ്യോഗിക പേരായ “westpac” എന്നതിന് പകരം “westtpac” (ഒരു ‘t’ അധികം ചേർത്ത്) എന്നാണ് തട്ടിപ്പുകാർ ഇമെയിൽ വിലാസം നിർമ്മിച്ചിരുന്നത്.
സമയബന്ധിതമായ ഇടപെടൽ
വ്യാജ ഒപ്പും ഇമെയിൽ ശൈലിയും ഒറിജിനലിനെ വെല്ലുന്ന രീതിയിലായിരുന്നെങ്കിലും നീത് ഉടൻ തന്നെ പണം കൈമാറുന്നത് തടഞ്ഞു വെക്കുകയും ബന്ധപ്പെട്ട ഏജന്റുമായി സംസാരിച്ച് ഇതൊരു വലിയ ഹാക്കിങ് തട്ടിപ്പാണെന്ന് സ്ഥിരീകരിക്കുകയും ചെയ്തു. തന്റെ കഠിനാധ്വാനത്തിലൂടെ ഉണ്ടാക്കിയ ജീവിത സമ്പാദ്യം മുഴുവൻ നഷ്ടപ്പെടുന്നതിൽ നിന്ന് തലനാരിഴയ്ക്ക് രക്ഷപെട്ട വിവരമറിഞ്ഞ് യുവതി ബാങ്കിൽ വെച്ച് പൊട്ടിക്കരഞ്ഞു.
‘ബിസിനസ് ഇമെയിൽ കോംപ്രമൈസ്’ (Business Email Compromise) എന്നറിയപ്പെടുന്ന ഇത്തരം അത്യാധുനിക സൈബർ തട്ടിപ്പുകൾക്കെതിരെ ആളുകൾ അതീവ ജാഗ്രത പാലിക്കണമെന്ന് വെസ്റ്റ്പാക് ബാങ്ക് അധികൃതർ മുന്നറിയിപ്പ് നൽകി. വലിയ തുകകൾ കൈമാറുന്നതിന് മുൻപ് നിർബന്ധമായും ഫോൺ വഴിയോ നേരിട്ടോ വിവരങ്ങൾ കൃത്യമാണെന്ന് ഉറപ്പുവരുത്തണമെന്നും ബാങ്ക് ഓർമ്മിപ്പിച്ചു.
