ചെന്നൈ: തമിഴ്നാട് ബിജെപി നേതാവ് ഗായത്രി രഘുറാം പാര്ട്ടി വിട്ടു. സസ്പെന്ഷനിലിരിക്കെയാണ് ഗായത്രി രഘുറാം പാര്ട്ടി വിടുന്നതായി പ്രഖ്യാപിച്ചത്. പാര്ട്ടിക്കുള്ളിലെ സ്ത്രീകളോടുള്ള ബഹുമാനക്കുറവാണ് തന്റെ നീക്കത്തിന് കാരണമെന്നും അവര് ചൂണ്ടിക്കാട്ടി. ബിജെപിയുടെ സാംസ്കാരിക വിഭാഗം മേധാവിയായിരുന്നു ഗായത്രി രഘുറാം.
പാര്ട്ടിയുടെ ഒബിസി വിഭാഗം സംസ്ഥാന നേതാവ് സൂര്യശിവ, ന്യൂനപക്ഷ വിഭാഗം നേതാവ് ഡെയ്സിയെ അസഭ്യം പറഞ്ഞ സംഭവത്തില് പരസ്യ പ്രതികരണം നടത്തിയതിനെ തുടര്ന്നായിരുന്നു ഗായത്രിയെ പദവിയില് നിന്നും താല്ക്കാലികമായി മാറ്റി നിര്ത്തിയത്. ‘പാര്ട്ടിക്കുളളിലെ സമത്വമില്ലായ്മയും സ്ത്രീകളോടുളള ബഹുമാനക്കുറവും കാരണമാണ് ടിഎന്ബിജെപിയില് നിന്ന് രാജിവയ്ക്കാന് ഞാന് തീരുമാനിച്ചത്. ഇങ്ങനൊരു തീരുമാനമെടുക്കെണ്ടി വന്നതില് അത്യധികം സങ്കടമുണ്ട്. അണ്ണാമലൈയുടെ നേതൃത്വത്തില് സ്ത്രീകള് സുരക്ഷിതരല്ല. ഇതിലും നല്ലത് പുറത്തുനിന്നുളളവരുടെ കളിയാക്കലുകള് ആണ്.’ഗായത്രി രഘുറാം ട്വിറ്ററില് കുറിച്ചു.
STORY HIGHLIGHTS: Tamil Nadu BJP leader Gayatri Raghuram quits the party
