പോർട്ട് മോറെസ്ബി: ഇന്തോനേഷ്യൻ സന്ദർശനം പൂർത്തിയാക്കിയ ഫ്രാൻസിസ് മാർപാപ്പ 45-ാമത് അപ്പസ്തോലിക പര്യടനത്തിന്റെ രണ്ടാം ഘട്ടമായി പാപ്പുവ ന്യൂഗിനിയയിലെത്തി.
ഇന്നലെ തലസ്ഥാനമായ പോർട്ട് മോറെസ്ബിയില് വിമാനമിറങ്ങിയ മാർപാപ്പയെ ഡെപ്യൂട്ടി പ്രധാനമന്ത്രി ജോണ് റോസോ സ്വീകരിച്ചു. അതിഥിയോടുള്ള ആദരസൂചകമായി പട്ടാളം 21 തവണ പീരങ്കിവെടി മുഴക്കി. വിമാനത്താവളത്തില്നിന്നു നേരേ അപ്പസ്തോലിക നുൻഷ്യേച്ചറിലേക്കു പോയ മാർപാപ്പയ്ക്ക് ഇന്നലെ മറ്റു പരിപാടികള് ഇല്ലായിരുന്നു.
ഫ്രാൻസിസ് മാർപാപ്പ സന്ദർശിക്കുന്ന ഏറ്റവും വിദൂര രാജ്യമാണ് പാപ്പുവ ന്യൂഗിനിയ. ഭൂമിശാസ്ത്രപരമായി ഓഷ്യാനിയ മേഖലയില് സ്ഥിതി ചെയ്യുന്ന രാജ്യം വത്തിക്കാനില്നിന്ന് 19,047 കിലോമീറ്റർ അകലെയാണ്. മൂന്നു ദിവസമാണ് മാർപാപ്പ ഇവിടെ ചെലവഴിക്കുക.
നദികള്, വെള്ളച്ചാട്ടങ്ങള്, അഗ്നിപർവതങ്ങള്, ഇടതൂർന്ന വനങ്ങള്, മനോഹരമായ തീരപ്രദേശം എന്നിവയാല് സന്പന്നമാണ് പാപ്പുവ ന്യൂഗിനിയ. ആദിവാസികളാണ് മുഖ്യജനവിഭാഗം. കാലാവസ്ഥാ വ്യതിയാനത്തിന്റെ പരിണതഫലങ്ങള് വളരെയധികം നേരിടുന്ന രാജ്യമാണിത്.
മാർപാപ്പയുടെ സന്ദർശനം ഇവിടത്തെ ഇരുപത്തിയഞ്ചു ലക്ഷം വരുന്ന കത്തോലിക്കാ വിശ്വാസികള്ക്ക് വലിയ ആഹ്ലാദം പകരുന്നതായി വത്തിക്കാൻ ന്യൂസ് റിപ്പോർട്ട് ചെയ്തു. രാജ്യമെന്പാടുംനിന്ന് വിശ്വാസികള് തലസ്ഥാനത്തേക്കെത്തി. വേണ്ടത്ര റോഡുകള് ഇല്ലാത്തതിനാല് പലരും ദിവസങ്ങള് നടന്നാണ് എത്തിയത്.
ഇന്നു രാവിലെ ഫ്രാൻസിസ് മാർപാപ്പ പാപ്പുവ ന്യൂഗിനിയയുടെ ഗവർണർ ജനറല് ബോബ് ഡാഡേയുമായും ഉന്നത ഉദ്യോഗസ്ഥരുമായും കൂടിക്കാഴ്ച നടത്തും. ഉച്ചകഴിഞ്ഞ് പാപ്പുവ ന്യൂഗിനിയയിലെയും സോളമൻ ദ്വീപുകളിലെയും മെത്രാന്മാരെയും പുരോഹിതരെയും കാണും.
നാളെ രാവിലെ സർ ജോണ് ഗൈസ് സ്റ്റേഡിയത്തില് മാർപാപ്പ വിശുദ്ധ കുർബാന അർപ്പിക്കും.തുടർന്ന് വിമാനത്തില് വടക്കുപടിഞ്ഞാറൻ തീരത്തുള്ള വാനിമോ പട്ടണത്തിലേക്കു പോയി അവിടെയുള്ള വിദേശ മിഷണറിമാരെ കാണും. പോർട്ട് മോറെസ്ബിയിലേക്കു മടങ്ങുന്ന അദ്ദേഹം തിങ്കളാഴ്ച, യാത്രയുടെ മൂന്നാം ഘട്ടമായി കിഴക്കൻ ടിമൂറിലേക്കു പോകും.
