മെൽബൺ: കഴിഞ്ഞ മൂന്നാഴ്ച്ചയ്ക്കിടെ മെൽബണിൽ ഉടനീളം കുട്ടികളെ തട്ടിക്കൊണ്ടുപോകാൻ ശ്രമിച്ച സംഭവ പരമ്പരകളിൽ അന്വേഷണം ഊർജിതമാക്കി വിക്ടോറിയ പൊലീസ്. കുട്ടികളെ തട്ടിക്കൊണ്ടു പോകാനുള്ള നാല് വ്യത്യസ്ത ശ്രമങ്ങളാണ് ഉണ്ടായത്. സ്കൂളുകളുടെ പരിസരത്തുകൂടി നടക്കുന്ന കുട്ടികളെ വെള്ള വാനുകളിൽ എത്തിയ പുരുഷന്മാരാണ് വാഹനത്തിൽ കയറ്റി തട്ടിക്കൊണ്ടു പോകാൻ ശ്രമിച്ചത്. മാതാപിതാക്കളെ ആശങ്കയിലാഴ്ത്തിയ സംഭവങ്ങളെ ഏറെ ഗൗരവത്തോടെയാണ് പൊലീസ് പരിശോധിക്കുന്നത്.
10 നും 15 നും ഇടയിൽ പ്രായമുള്ള കുട്ടികളെയാണ് ലക്ഷ്യമിടുന്നത്. കുട്ടികളെ തട്ടിക്കൊണ്ടു പോകാനുള്ള ശ്രമങ്ങൾ ഏറെ ആശങ്കാജനകമാണെന്നും സംഭവങ്ങളുടെ സത്യാവസ്ഥ അറിയാൻ വിക്ടോറിയ പൊലീസ് കഠിനമായി പരിശ്രമിക്കുകയാണെന്നും ആക്ടിങ് സൂപ്രണ്ട് പോൾ ക്രിപ്സ് പറഞ്ഞു. പരിചയസമ്പന്നമായ ഡിറ്റക്ടീവുകളാണ് ഈ കേസിൽ ഇടപെടുന്നതെന്നും ക്രിപ്സ് മാധ്യമപ്രവർത്തകരോട് പറഞ്ഞു.
ഈ ആഴ്ച മാത്രം മെൽബണിൻ്റെ കിഴക്കൻ പ്രദേശങ്ങളിൽ രണ്ട് സംഭവങ്ങളാണ് ഉണ്ടായത്. ഡിസംബർ രണ്ടിന് രാവിലെ ഡോൺകാസ്റ്ററിലെ സാക്സൺ സ്ട്രീറ്റിലൂടെ നടന്നുപോയ 15 വയസുകാരിയെ വെള്ള വാനിൽ എത്തിയ പുരുഷൻ സമീപിച്ചു. യുവാവ് പെൺകുട്ടിയോട് വാഹനത്തിൽ കയറാൻ ആവശ്യപ്പെട്ടു. വിസമ്മതിച്ച പെൺകുട്ടി അടുത്തുള്ള ഷോപ്പിങ് സെൻ്ററിലേക്ക് ഓടി രക്ഷപ്പെടുകയായിരുന്നു.
വെറും 24 മണിക്കൂറിന് ശേഷം, ഡിസംബർ മൂന്നിന് രാവിലെ ബോറോണിയയിൽ റോഡിലൂടെ നടന്നു പോയ 10 വയസുള്ള ആൺകുട്ടിയെ വെള്ള വാനിൽ എത്തിയ ഒരാൾ സമീപിച്ചു. സൗഹൃദ മനോഭാവത്തോടെയാണ് പ്രതികൾ കുട്ടികളെ സമീപിക്കുന്നത്, ‘അമ്മ പറഞ്ഞിട്ട് സ്കൂളിൽ നിന്ന് കൂട്ടിക്കൊണ്ടുപോകാൻ വന്നതാണെന്ന് ഉൾപ്പെടെ പറഞ്ഞ് കുട്ടികളെ വിശ്വസിപ്പിച്ചാണ് പ്രതികൾ സമീപിക്കുന്നത്. അപരിചിതമായ ആളുകളോട് ഇടപെടരുതെന്നും അറിയാത്ത ആളുകൾക്കൊപ്പം കാറിൽ കയറരുതെന്നും കുട്ടികളെ ബോധവൽക്കരിക്കാൻ പൊലീസ് മാതാപിതാക്കളോട് ആവശ്യപ്പെട്ടു. അപരിചിതർ സമീപിക്കുമ്പോൾ തിരക്കേറിയ പ്രദേശത്തേക്കാണെങ്കിൽ ഓടിപ്പോയി അടുത്തുള്ള മുതിർന്നവരോട് പറയാൻ കുട്ടിളോട് നിർദേശിക്കണമെന്നും പൊലീസ് പറഞ്ഞു.
മാതാപിതാക്കൾ ജാഗ്രതയുള്ളവരായിരിക്കണമെന്നും എന്നാൽ പരിഭ്രാന്തരാകരുതെന്നും ക്രിപ്സ് പറഞ്ഞു.
നവംബർ 18-ന് ബ്ലാക്ക്ബേണിലെ സ്കൂളിൽ നിന്ന് വീട്ടിലേക്ക് നടന്നുപോവുകയായിരുന്ന 11 വയസുകാരന്റെ അരികിൽ വെള്ള വാഹനം നിർത്തിയതോടെയാണ് സംഭവങ്ങളുടെ പരമ്പര ആരംഭിച്ചത്. വീട്ടിലേക്ക് ലിഫ്റ്റ് നൽകാമെന്ന് പ്രതി പറഞ്ഞെങ്കിലും കൂട്ടി വിസമ്മതിച്ചപ്പോൾ വണ്ടി വിട്ടുപോയി.
അടുത്തയാഴ്ച ടുല്ലമറൈനിൽ 14 വയസുള്ള ഒരു പെൺകുട്ടിക്കും സമാനമായ അനുഭവമുണ്ടായി. റോഡിലൂടെ നടക്കുമ്പോൾ ഒരു അപരിചിതൻ തൻ്റെ വെളുത്ത ടൊയോട്ട ഹൈസെസിൽ പെൺകുട്ടിയെ പിന്തുടർന്നു. ഇയാൾ പെൺകുട്ടിയോട് എവിടെയാണ് താമസിക്കുന്നതെന്ന് ചോദിക്കുകയും വാനിൽ കയറാൻ ആവശ്യപ്പെടുകയും ചെയ്തു. എന്നാൽ കുട്ടി ഓടി അടുത്തുള്ള പാർക്കിൽ അഭയം തേടി.
ബ്ലാക്ക്ബേൺ സംഭവത്തിലെ പ്രതിയെന്നു കരുതുന്നയാളുടെ കമ്പ്യൂട്ടർ ചിത്രം പൊലീസ് പുറത്തുവിട്ടു. 30 നും 40 നും ഇടയിൽ പ്രായമുള്ള തവിട്ടുനിറഞ്ഞതുമായ മുടിയുള്ള മനുഷ്യനാണ് ചിത്രത്തിലുള്ളത്. ഈ നാലു സംഭവങ്ങളും തമ്മിൽ പരസ്പരം ബന്ധമുണ്ടോയെന്ന് വ്യക്തമല്ല.
