ബ്രിസ്ബെയ്ൻ :ബ്രിസ്ബെയ്നിലെ സൺഡേ മാർക്കറ്റിൽ തരംഗമായി പാപ്പുവ ന്യൂഗിനിയയുടെ സമ്പന്നമായ സാംസ്കാരിക പൈതൃകം. തെക്കൻ പസഫിക് മഹാസമുദ്രത്തിൽ സ്ഥിതി ചെയ്യുന്നപാപ്പുവ ന്യൂഗിനിയെന്ന രാജ്യത്തെ ജനങ്ങൾ വ്യത്യസ്ത ഭാഷകളും സംസ്കാരങ്ങളും പുലർത്തുന്നവരാണ്. ബ്രിസ്ബെയ്നിലെ ഷോപ്പിങ് സെന്ററിന് അഭിമുഖമായി റോഡ് അടച്ചു നടക്കുന്ന സൺഡേ മാർക്കറ്റിൽ മാസത്തിന്റെ മൂന്നാമത്തെ ആഴ്ചയിൽ ഒരു ഉത്സവമേളയിൽ എത്തിയ പാപ്പുവ ന്യൂഗിനിയൻ പസഫിക് നിവാസികൾ, പ്രത്യേകമായി തയാറാക്കിയ വസ്ത്രങ്ങളും വാദ്യോപകരണങ്ങളും ഉപയോഗിച്ചുള്ള പരമ്പരാഗത നൃത്തം അവതരിപ്പിച്ചത് ജനങ്ങളെ ആകർഷിച്ചു.
ഈ സൺഡേ മാർക്കറ്റിൽ ഇന്ത്യക്കാർ, പ്രാദേശികർ, കേരളത്തിലുള്ള ജനങ്ങൾ ഉൾപ്പെടെ നിരവധി പേർ എത്താറുണ്ട്. തിങ്ങിനിറഞ്ഞ കച്ചവട മേളയിൽ സ്വന്തം നാടിന്റെ അംഗീകാരം വിളിച്ചറിയിക്കുന്നതായിരുന്നു ഈ നൃത്തം. നൃത്തം അവസാനിച്ചപ്പോൾ ജനങ്ങൾക്ക് അതിൽ പങ്കുചേരാനും നർത്തകരുമായി ഫോട്ടോ എടുക്കാനും അവസരം ലഭിച്ചു.
പാപ്പുവ ന്യൂഗിനിയ ലോകത്തിലെ ഏറ്റവും വൈവിധ്യമാർന്ന സാംസ്കാരിക പൈതൃകമുള്ള രാജ്യങ്ങളിലൊന്നാണ്. ഇവിടെ 800ലധികം ഭാഷകളും നൂറുകണക്കിന് ഗോത്രങ്ങളും ഉള്ളതിനാൽ, ഓരോ ഗോത്രത്തിനും സ്വന്തം നൃത്തങ്ങളും സംഗീതവും ആചാരങ്ങളുമുണ്ട്. ഈ നൃത്തങ്ങളിൽ ഏറ്റവും പ്രശസ്തമായ ഒന്നാണ് ‘സിങ്–സിങ്’ (Sing-Sing). ഇതിലൂടെ വിവിധ ഗോത്രക്കാർ അവരുടെ വസ്ത്രധാരണ രീതികളും, മുഖചിത്രങ്ങളും, ഗാനങ്ങളും, നൃത്തങ്ങളും അവതരിപ്പിച്ച് ഗോത്രത്തിന്റെ ചരിത്രവും വിശ്വാസങ്ങളും പങ്കുവയ്ക്കുന്നു.
പഴയകാലത്തെ യുദ്ധനൃത്തങ്ങൾ, ‘Bird of Paradise’ പക്ഷിയെ അടിസ്ഥാനമാക്കിയുള്ള പക്ഷിനൃത്തങ്ങൾ, വിവാഹം, വിളവെടുപ്പ് തുടങ്ങിയ ചടങ്ങുകൾക്കായുള്ള നൃത്തങ്ങൾ എന്നിവയും പ്രധാനമാണ്. വർണ്ണാഭമായ പീലികളും, പുല്ലുകൊണ്ട് നിർമ്മിച്ച വസ്ത്രങ്ങളും, മുത്തുകളും, മൃഗചർമ്മങ്ങളും ഇതിനായി ഉപയോഗിക്കുന്നു. ‘ടിഫാ’ (Tifa) എന്ന് വിളിക്കുന്ന കൈത്തപ്പാട്ട്, മുളങ്കുഴൽ എന്നിവയാണ് സംഗീതോപകരണങ്ങൾ.
ഈ പരമ്പരാഗത നൃത്തങ്ങൾ വെറും കലാപ്രകടനം മാത്രമല്ല, ഇത് സമൂഹത്തിലെ അംഗങ്ങളെ ഒരുമിപ്പിക്കുന്ന ഐക്യത്തിന്റെ പ്രതീകവും ഗോത്രത്തിന്റെ ചരിത്രവും സംസ്കാരവും സംരക്ഷിക്കുന്നതിനുള്ള മാർഗ്ഗവുമാണ്. ആത്മീയ ചടങ്ങുകൾക്കും, സാമൂഹിക ബന്ധങ്ങൾക്കും, ഗോത്ര ഐഡന്റിറ്റി പ്രകടിപ്പിക്കാനും ഈ നൃത്തങ്ങൾ സുപ്രധാന പങ്ക് വഹിക്കുന്നു. കൂടാതെ, ഈ കലാവിരുന്ന് വിനോദസഞ്ചാരത്തെ പ്രോത്സാഹിപ്പിക്കുകയും ഗോത്രങ്ങൾക്ക് സാമ്പത്തിക നേട്ടം നൽകുകയും ചെയ്യുന്നു. തലമുറകൾ മാറിയാലും, ഈ നൃത്തങ്ങൾ പാപ്പുവ ന്യൂഗിനിയൻ സമൂഹത്തെ ഒരുമിച്ചു നിർത്തുന്ന സാംസ്കാരിക പാലമായി തുടരുമെന്ന് ചരിത്രകാരന്മാർ പറയുന്നു.
