ഓസ്ട്രേലിയൻ സർക്കാർ പ്രഖ്യാപിച്ചിരുന്ന താൽക്കാലിക ഇന്ധന നികുതിയിളവ് (fuel excise discount) വരും തിങ്കളാഴ്ചയോടെ (ഓഗസ്റ്റ് 2) അവസാനിക്കുമെന്ന് ട്രഷറർ ജിം ചാൽമേഴ്സ് ഔദ്യോഗികമായി സ്ഥിരീകരിച്ചു. ഇറാനിലെ യുദ്ധസാഹചര്യങ്ങൾ കാരണം ആഗോള വിപണിയിൽ എണ്ണവില വീണ്ടും ഉയരുന്നതിനിടയിലാണ് ജനങ്ങൾക്ക് ഭാരമായി ഈ പുതിയ തീരുമാനം വരുന്നത്.
പ്രധാന വിവരങ്ങൾ:
നികുതിയിളവ് അവസാനിക്കുന്നു: ജനങ്ങളുടെ ജീവിതച്ചെലവ് കുറയ്ക്കുന്നതിനായി ഏപ്രിൽ മാസത്തിൽ കൊണ്ടുവന്ന ഈ പദ്ധതി വരും ഞായറാഴ്ച അർദ്ധരാത്രിയോടെ അവസാനിക്കും.
താൽക്കാലിക സംവിധായം: ഈ ആനുകൂല്യം സ്ഥിരമായി നിലനിർത്താൻ സർക്കാർ ഉദ്ദേശിച്ചിരുന്നില്ലെന്നും, വിലക്കയറ്റത്തിന്റെ ആഘാതം കുറയ്ക്കാൻ മാത്രമാണ് ഇത് നടപ്പിലാക്കിയതെന്നും ട്രഷറർ വ്യക്തമാക്കി.
വിലയിലെ വ്യത്യാസം: മുൻപ് ലിറ്ററിന് 32 സെന്റ് വരെ നൽകിയിരുന്ന ഇളവ് ജൂലൈ മുതൽ 16 സെന്റായി കുറച്ചിരുന്നു. തിങ്കളാഴ്ച മുതൽ ഈ ഇളവും പൂർണ്ണമായി ഇല്ലാതാകും. ഇതോടെ ഹെവി വാഹനങ്ങൾക്കുള്ള റോഡ് യൂസർ ചാർജ് ഇളവും അവസാനിക്കും.
ഇറാനും അമേരിക്കയും തമ്മിലുള്ള ധാരണകൾ തകർന്നതിനെ തുടർന്ന് കഴിഞ്ഞ ആഴ്ച അന്താരാഷ്ട്ര വിപണിയിൽ എണ്ണവില ബാരലിന് 100 ഡോളറിന് മുകളിലേക്ക് ഉയർന്നിരുന്നു. നിലവിൽ ഇത് 86.36 ഡോളറിലേക്ക് താഴ്ന്നിട്ടുണ്ടെങ്കിലും, ആഗോള എണ്ണ വിതരണ ശൃംഖല കടുത്ത പ്രതിസന്ധിയിലാണെന്ന് ഓസ്ട്രേലിയൻ ട്രഷറി മുന്നറിയിപ്പ് നൽകുന്നു.
യുക്രെയ്ൻ റഷ്യൻ എണ്ണ ശുദ്ധീകരണ ശാലകൾക്ക് നേരെ നടത്തുന്ന ഡ്രോൺ ആക്രമണങ്ങളും ചെങ്കടലിലെ സംഘർഷങ്ങളും അന്താരാഷ്ട്ര തലത്തിൽ എണ്ണ വില ഇനിയും ഉയരാൻ കാരണമായേക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. എന്നാൽ നിലവിൽ ഓസ്ട്രേലിയയിൽ ആവശ്യത്തിന് ഇന്ധന ശേഖരമുണ്ടെന്നും ആശങ്കപ്പെടേണ്ട സാഹചര്യമില്ലെന്നും ഊർജ്ജ മന്ത്രി ക്രിസ് ബോവൻ അറിയിച്ചു.
