ഓസ്ട്രേലിയയിലെ രൂക്ഷമായ ഭവന പ്രതിസന്ധിക്കും വരാനിരിക്കുന്ന പുതിയ കുടിയേറ്റ നയങ്ങൾക്കും (Australia Migration Rules 2026) എതിരെ ഭരണകക്ഷിയായ ലേബർ പാർട്ടിക്കെതിരെ പ്രതിപക്ഷ കക്ഷികൾ രംഗത്ത്. ഓസ്ട്രേലിയൻ സർക്കാരിന്റെ പുതിയ കുടിയേറ്റ നിയന്ത്രണങ്ങൾ പ്രവാസി കുടുംബങ്ങളെ തമ്മിൽ അകറ്റുമെന്ന ഭീതിയും നിലനിൽക്കുന്നുണ്ട്.
രാജ്യത്തെ നിലവിലെ ഭവന പ്രതിസന്ധിക്കും വാടക വർദ്ധനവിനും പ്രധാന കാരണം അമിതമായ കുടിയേറ്റമാണെന്ന് ഷാഡോ അസിസ്റ്റന്റ് ട്രഷറർ കെവിൻ ഹോഗൻ (Kevin Hogan) ആരോപിച്ചു. ലേബർ സർക്കാരിന്റെ ഭരണകാലത്ത് ദശലക്ഷക്കണക്കിന് ആളുകളാണ് രാജ്യത്തേക്ക് എത്തിയത് എന്നും, ഇവർക്കാവശ്യമായ അടിസ്ഥാന സൗകര്യങ്ങൾ ഒരുക്കാൻ സർക്കാരിന് സാധിച്ചില്ലെന്നും അദ്ദേഹം വ്യക്തമാക്കി. അതിനാൽ രാജ്യത്തെ കുടിയേറ്റക്കാരുടെ എണ്ണം അടിയന്തരമായി വെട്ടിച്ചുരുക്കണമെന്നും, പുതിയ ഭവന നിർമ്മാണ പദ്ധതികളുടെ പുരോഗതിക്ക് അനുസൃതമായി മാത്രമേ കുടിയേറ്റ നയങ്ങൾ രൂപീകരിക്കാവൂ എന്നും പ്രതിപക്ഷം ആവശ്യപ്പെട്ടു.
അതേസമയം, ഓൺഷോർ (Onshore) അപേക്ഷകർക്ക് ഫാമിലി റീയൂണിയൻ, പാർട്ണർ വിസകൾ എന്നിവ നിഷേധിക്കാനുള്ള നീക്കം തികച്ചും ക്രൂരമാണെന്ന് ഗ്രീൻസ് സെനറ്റർ ഡേവിഡ് ഷൂബ്രിഡ്ജ് (David Shoebridge) പ്രതികരിച്ചു. കുട്ടികളെ മാതാപിതാക്കളിൽ നിന്നും പങ്കാളികളെ പരസ്പരവും അകറ്റാൻ മാത്രമേ ഇത്തരം നിയന്ത്രണങ്ങൾ കാരണമാകൂ എന്ന് അദ്ദേഹം മുന്നറിയിപ്പ് നൽകി. രാജ്യത്തെ ഭവന പ്രതിസന്ധിക്ക് കാരണം കുടിയേറ്റമല്ലെന്ന് ചൂണ്ടിക്കാണിച്ച അദ്ദേഹം, കുടിയേറ്റം പൂർണ്ണമായി കുറഞ്ഞ കോവിഡ് കാലഘട്ടത്തിലും വീടുകളുടെ വില വർദ്ധിച്ചിരുന്നു എന്ന് ഓർമ്മിപ്പിച്ചു. പോളിൻ ഹാൻസന്റെ വൺ നേഷൻ പാർട്ടിയുടെ കുടിയേറ്റ വിരുദ്ധ നയങ്ങളാണ് ലേബർ പാർട്ടി ഇപ്പോൾ നടപ്പിലാക്കാൻ ശ്രമിക്കുന്നതെന്നും അദ്ദേഹം വിമർശിച്ചു.
ആഭ്യന്തര മന്ത്രി ടോണി ബർക്ക് വരും ദിവസങ്ങളിൽ പ്രഖ്യാപിക്കാനിരിക്കുന്ന പുതിയ കുടിയേറ്റ നിയന്ത്രണങ്ങളിൽ ഫാമിലി വിസ അപേക്ഷകർക്ക് കടുത്ത നിബന്ധനകൾ ഏർപ്പെടുത്തിയേക്കുമെന്നാണ് റിപ്പോർട്ടുകൾ. നിലവിൽ വിസ പ്രോസസ്സിംഗ് വൈകുന്നത് കാരണം നിരവധി കുടുംബങ്ങളാണ് ബുദ്ധിമുട്ടുന്നത്. പുതിയതായി ഓൺഷോർ അപേക്ഷകൾക്ക് നിയന്ത്രണം വരികയാണെങ്കിൽ, അത് ഓസ്ട്രേലിയയിൽ കുടുംബത്തെ കൊണ്ടുവരാൻ ആഗ്രഹിക്കുന്ന മലയാളി പ്രവാസികൾ ഉൾപ്പെടെയുള്ളവർക്ക് വലിയ തിരിച്ചടിയാകും. പുതിയ നിയമത്തിന്റെ പൂർണ്ണരൂപം പുറത്തുവരുന്നതോടെ മാത്രമേ ഇതിന്റെ യഥാർത്ഥ വ്യാപ്തി വ്യക്തമാകൂ.
