സിഡ്നി: 1.3 മില്യൺ ഓസ്ട്രേലിയൻ ഡോളറിലധികം വിലമതിക്കുന്ന സ്വർണാഭരണങ്ങൾ കസ്റ്റംസിൽ പ്രഖ്യാപിക്കാതെ ഓസ്ട്രേലിയയിലേക്ക് കൊണ്ടുവരാൻ ശ്രമിച്ച യാത്രക്കാരന് 2.59 ലക്ഷം ഡോളറിലധികം പിഴയും നികുതിയും അടയ്ക്കേണ്ടിവന്നു.
യുഎഇയിൽ നിന്ന് സിഡ്നി ഇന്റർനാഷണൽ എയർപോർട്ടിലെത്തിയ ഓസ്ട്രേലിയൻ റെസിഡന്റിനെയാണ് ഓസ്ട്രേലിയൻ ബോർഡർ ഫോഴ്സ് (ABF) ഉദ്യോഗസ്ഥർ പരിശോധനയ്ക്കായി തിരഞ്ഞെടുത്തത്. ബാഗേജ് പരിശോധനയ്ക്കിടെ രണ്ട് കണ്ടെയ്നറുകളിലായി 8.5 കിലോഗ്രാം സ്വർണാഭരണങ്ങൾ കണ്ടെത്തുകയായിരുന്നു.
ആഭരണങ്ങളുടെ ആകെ മൂല്യം 1.3 മില്യൺ ഓസ്ട്രേലിയൻ ഡോളറിലധികം വരുന്നതായി ABF അറിയിച്ചു.
ഇറക്കുമതി പ്രഖ്യാപനം നടത്തിയില്ല
1,000 ഓസ്ട്രേലിയൻ ഡോളറിന് മുകളിൽ മൂല്യമുള്ള ഇറക്കുമതി സാധനങ്ങൾ ഓസ്ട്രേലിയയിൽ ഉപയോഗത്തിനായി ക്ലിയർ ചെയ്യുമ്പോൾ നിർബന്ധമായും import declaration സമർപ്പിക്കണം. എന്നാൽ യാത്രക്കാരൻ സ്വർണാഭരണങ്ങൾക്കായി ആവശ്യമായ പ്രഖ്യാപനം നടത്തിയിരുന്നില്ല.ABF ഉദ്യോഗസ്ഥരുടെ ചോദ്യം ചെയ്യലിൽ, കസ്റ്റംസ് തീരുവയും deferred GSTയും അടയ്ക്കുന്നത് ഒഴിവാക്കാനാണ് ആഭരണങ്ങൾ പ്രഖ്യാപിക്കാതിരുന്നതെന്ന് യാത്രക്കാരൻ സമ്മതിച്ചതായി അധികൃതർ അറിയിച്ചു.
സ്വർണാഭരണങ്ങൾക്ക് ബാധകമായ കസ്റ്റംസ് തീരുവയും deferred GSTയും ചേർന്ന് ഏകദേശം 2.09 ലക്ഷം ഡോളർ വരുമെന്നാണ് കണക്കാക്കിയത്.
50,448 ഡോളർ പിഴ
തുടർന്ന് ABF ഉദ്യോഗസ്ഥർ സ്വർണാഭരണങ്ങൾ കസ്റ്റഡിയിലെടുത്ത് കൂടുതൽ പരിശോധനയ്ക്കായി Trade Intervention Unit (TIU)-ന് കൈമാറി.അടുത്ത ദിവസം പ്രഖ്യാപിക്കാത്ത സാധനങ്ങൾ സംബന്ധിച്ച് യാത്രക്കാരന് 50,448.04 ഓസ്ട്രേലിയൻ ഡോളറിന്റെ infringement notice നൽകി.പിഴയ്ക്കൊപ്പം കുടിശ്ശികയായ കസ്റ്റംസ് തീരുവയും deferred GSTയും ഉൾപ്പെടെ ആകെ 259,352.92 ഓസ്ട്രേലിയൻ ഡോളർ യാത്രക്കാരൻ അടച്ചു. തുക പൂർണമായി അടച്ചതിനെ തുടർന്ന് സ്വർണാഭരണങ്ങൾ യാത്രക്കാരന് വിട്ടുനൽകി.
യാത്രക്കാർക്ക് മുന്നറിയിപ്പുമായി ABF
കസ്റ്റംസ് തീരുവയും GSTയും ഒഴിവാക്കാൻ ശ്രമിക്കുന്നത് ഗുരുതരമായ നിയമലംഘനമാണെന്ന് ABF Acting Superintendent Neil Singh മുന്നറിയിപ്പ് നൽകി.യാത്രക്കാർ രാജ്യത്തേക്ക് കൊണ്ടുവരുന്ന തീരുമാനിക്കപ്പെട്ട നികുതിക്കും തീരുവയ്ക്കും വിധേയമായ സാധനങ്ങൾ കൃത്യമായും സത്യസന്ധമായും പ്രഖ്യാപിക്കേണ്ടത് അത്യാവശ്യമാണെന്നും അദ്ദേഹം പറഞ്ഞു.
യാത്രക്കാരുടെ പെരുമാറ്റവും തത്സമയ ഇന്റലിജൻസ് വിവരങ്ങളും ഉപയോഗിച്ച് നിയമലംഘനം നടത്താൻ സാധ്യതയുള്ളവരെ ABF ഉദ്യോഗസ്ഥർ തിരിച്ചറിയുന്നുണ്ടെന്നും അധികൃതർ വ്യക്തമാക്കി.ഓസ്ട്രേലിയയിലേക്ക് സ്വർണം ഉൾപ്പെടെയുള്ള വിലപിടിപ്പുള്ള സാധനങ്ങൾ കൊണ്ടുവരുന്നവർക്ക് അവയുടെ സ്വഭാവവും മൂല്യവും അനുസരിച്ച് ആവശ്യമായ കസ്റ്റംസ് പ്രഖ്യാപനങ്ങൾ മുൻകൂട്ടി പരിശോധിക്കണമെന്ന് ABF നിർദേശിച്ചു.
