ഗസിറ: പ്രദേശത്ത് രണ്ട് പുതിയ ഹോട്ടലുകൾ കൂടി നിർമ്മിക്കാനുള്ള പദ്ധതികൾക്കെതിരെ ഗസിറയിലെ താമസക്കാർ പ്രതിഷേധവുമായി രംഗത്ത്. നിലവിലുള്ള ഗ്രാൻഡ്സ് സ്യൂട്ട്സ് ഹോട്ടലിന് 100 മീറ്ററിനുള്ളിൽ 151 മുറികൾ കൂടി ഉൾപ്പെടുന്ന രണ്ട് ഹോട്ടലുകൾ നിർമ്മിക്കാനുള്ള പദ്ധതികളാണ് പ്രദേശവാസികളുടെ പ്രതിഷേധത്തിന് കാരണം.ഗ്രാൻഡ്സ് സ്യൂട്ട്സ് ഹോട്ടലിന്റെ ഉടമസ്ഥരായ Grands Leisure Limited ആണ് രണ്ട് പദ്ധതികൾക്കുമായി അപേക്ഷ നൽകിയിരിക്കുന്നത്. നിലവിലെ ഹോട്ടൽ പ്രവർത്തനം വിപുലീകരിക്കുന്നതിന്റെ ഭാഗമായാണ് പുതിയ പദ്ധതികൾ.
ആദ്യ പദ്ധതിയിൽ Triq ir-Rebħaയിലെ ഒരു അപ്പാർട്ട്മെന്റ് കെട്ടിടം പൊളിച്ച് 78 മുറികളുള്ള നാല് നക്ഷത്ര ഹോട്ടൽ നിർമ്മിക്കാനാണ് നിർദേശം. 13 നിലകളുള്ള കെട്ടിടത്തിൽ പെൻ്റ്ഹൗസും മേൽക്കൂരയിലെ ബാറും ഔട്ട്ഡോർ സ്വിമ്മിങ് പൂളും ഉൾപ്പെടും.
രണ്ടാമത്തെ പദ്ധതി Triq l-Empire Stadiumയിൽ 73 മുറികളുള്ള 11 നില ഹോട്ടൽ നിർമ്മിക്കുന്നതാണ്. ‘House of Grands City Hotel’ എന്ന് പേരിട്ടിരിക്കുന്ന പദ്ധതിയിലും മേൽക്കൂരയിലെ ബാറും ഔട്ട്ഡോർ പൂളും ഉൾപ്പെടുത്തിയിട്ടുണ്ട്. രണ്ട് പദ്ധതികളും അംഗീകരിച്ചാൽ നിലവിലുള്ള 231 സ്യൂട്ടുകൾക്കൊപ്പം ആകെ 382 ഹോട്ടൽ യൂണിറ്റുകളാകും പ്രദേശത്തുണ്ടാകുക.
ഗതാഗതവും ശബ്ദവും പ്രധാന ആശങ്ക
പുതിയ ഹോട്ടലുകൾ പ്രദേശത്തെ ജനങ്ങളുടെ ദൈനംദിന ജീവിതത്തെ ബാധിക്കുമെന്നാണ് താമസക്കാരുടെ പ്രധാന പരാതി. ഗതാഗതക്കുരുക്ക്, പാർക്കിങ് സൗകര്യങ്ങളുടെ കുറവ്, അമിത ശബ്ദം, മാലിന്യം, ഹോട്ടൽ അതിഥികളിൽ നിന്നുള്ള സാമൂഹിക പ്രശ്നങ്ങൾ എന്നിവയും അവർ ചൂണ്ടിക്കാട്ടുന്നു.
പരിസ്ഥിതി സംഘടനയായ Flimkien għal-Ambjent Aħjar (FAA)യുമായി സഹകരിച്ചാണ് പ്രദേശവാസികൾ പ്രതിഷേധം സംഘടിപ്പിക്കുന്നത്.
ഗസിറയിൽ ഇതിനകം തന്നെ 10 ഹോട്ടലുകൾ പ്രവർത്തിക്കുന്ന സാഹചര്യത്തിൽ പുതിയ പദ്ധതികളെ ഓരോന്നായി പരിഗണിക്കരുതെന്ന് FAA കോർഡിനേറ്റർ ആസ്ട്രിഡ് വെല്ല പറഞ്ഞു. കൂടുതൽ ഹോട്ടലുകൾ വരുന്നത് ഗതാഗതം, മലിനീകരണം, ശബ്ദം എന്നിവയിൽ അസ്വീകാര്യമായ വർധനവിന് കാരണമാകുമെന്നും, പദ്ധതികൾക്ക് അനുമതി നൽകുന്നതിന് മുമ്പ് പ്രദേശത്തിന്റെ അടിസ്ഥാന സൗകര്യശേഷി വിലയിരുത്തുന്ന പഠനം നടത്തണമെന്നും അവർ ആവശ്യപ്പെട്ടു.
കെട്ടിടങ്ങളുടെ ഉയരത്തിലും എതിർപ്പ്
നിർദേശിച്ചിരിക്കുന്ന കെട്ടിടങ്ങളുടെ ഉയരവും FAA ചോദ്യം ചെയ്തു. പ്രാദേശിക പദ്ധതി പ്രകാരം നാല് നിലയായി പരിമിതപ്പെടുത്തിയിരിക്കുന്ന പ്രദേശത്ത് 12 മുതൽ 14 നില വരെ ഉയരമുള്ള കെട്ടിടങ്ങളാണ് നിർദേശിച്ചിരിക്കുന്നതെന്ന് സംഘടന ചൂണ്ടിക്കാട്ടി.റെസിഡൻഷ്യൽ മേഖലയിലേക്ക് കൂടുതൽ ഹോട്ടലുകൾ കൊണ്ടുവരുന്നത് പ്രദേശത്തെ അടിസ്ഥാന സൗകര്യങ്ങളിൽ അമിത സമ്മർദം സൃഷ്ടിക്കുമെന്നും സംഘടന വ്യക്തമാക്കി.
‘റൂഫ്‌ടോപ്പ് ബാർ അനുവദിച്ചാൽ ശബ്ദം കൂടും’
നിർദേശിച്ചിരിക്കുന്ന റൂഫ്‌ടോപ്പ് ബാറുകളാണ് സമീപവാസികളുടെ മറ്റൊരു പ്രധാന ആശങ്ക. പുതിയ ഹോട്ടലിന് സമീപം താമസിക്കുന്ന ഒരാൾ റൂഫ്‌ടോപ്പ് ബാർ അനുവദിച്ചാൽ രാത്രിയിലെ ശബ്ദം അസഹനീയമാകുമെന്ന് പറഞ്ഞു.നിലവിലുള്ള ഗ്രാൻഡ്സ് സ്യൂട്ട്സ് ഹോട്ടലിൽ വേനൽക്കാലത്ത് വെള്ളിയാഴ്ചകളിൽ റൂഫ്‌ടോപ്പിലും പൂളിലുമായി പാർട്ടികൾ പുലർച്ചെ വരെ തുടരുന്നതായും ഒരു താമസക്കാരൻ ആരോപിച്ചു.നിർമാണ പ്രവർത്തനങ്ങൾ വർഷങ്ങളോളം നീളുന്നതോടെ പൊടി, ശബ്ദം, കെട്ടിടങ്ങൾക്ക് സംഭവിക്കാവുന്ന നാശനഷ്ടങ്ങൾ എന്നിവയെക്കുറിച്ചും പ്രദേശവാസികൾ ആശങ്ക പ്രകടിപ്പിച്ചു.
വിരമിച്ചവർക്കുള്ള താമസകേന്ദ്രത്തിനും പദ്ധതി
രണ്ട് ഹോട്ടൽ പദ്ധതികൾക്ക് പുറമെ, പ്രദേശത്ത് 108 മുറികളുള്ള വിരമിച്ചവർക്കായുള്ള താമസകേന്ദ്രം നിർമ്മിക്കുന്നതിനുള്ള അപേക്ഷയും നിലവിലുണ്ട്. രണ്ട് നിർദേശിച്ച ഹോട്ടൽ സ്ഥലങ്ങളിൽനിന്നും ഏകദേശം 30 മീറ്റർ അകലെയാണ് ഈ പദ്ധതി.
ഇതോടെ ഒരേ പ്രദേശത്ത് ഒന്നിലധികം വലിയ നിർമാണ പദ്ധതികൾ നടപ്പാക്കുന്നത് താമസക്കാരുടെ ജീവിതനിലവാരത്തെ കൂടുതൽ ബാധിക്കുമെന്നാണ് പ്രതിഷേധക്കാരുടെ വാദം.
‘പുതിയ വികസനങ്ങൾ എല്ലാവരെയും ബാധിക്കും’
പുതിയ പദ്ധതികൾ അംഗീകരിച്ചാൽ സമീപ പ്രദേശത്തെ മുഴുവൻ താമസക്കാരെയും അത് ബാധിക്കുമെന്ന് ഗസിറ മേയർ നെവിൽ ചെറ്റ്കുട്ടി പറഞ്ഞു.പുതിയ പ്ലാനിങ് അപേക്ഷകൾ വരുമ്പോഴെല്ലാം പ്രദേശവാസികളുടെ ആശങ്കകൾ ബന്ധപ്പെട്ടവരെ അറിയിക്കാറുണ്ടെന്നും, കഴിയുന്നിടത്തോളം താമസക്കാർക്കായി പാർക്കിങ് സൗകര്യം ഒരുക്കണമെന്ന് ഡെവലപ്പർമാരോട് ആവശ്യപ്പെടാറുണ്ടെന്നും അദ്ദേഹം വ്യക്തമാക്കി.ഗസിറയിൽ ഇത്തരം പുതിയ വികസനങ്ങൾ തുടർന്നുകൊണ്ടിരിക്കുന്നത് അവസാനിക്കണമെന്നാണ് തന്റെ ആഗ്രഹമെന്നും മേയർ പറഞ്ഞു.
