കോട്ടയം: ഒരുപാട് സ്വപ്നങ്ങളും പ്രതീക്ഷകളും ബാക്കിവെച്ച് രണ്ട് യുവതികൾ യാത്രയായി. പാമ്പാടിയിലുണ്ടായ ബസ് അപകടത്തിൽ മീനടം സ്വദേശിനി അഷ്ലി ആൻ തോമസും പാമ്പാടി സ്വദേശിനി കൃപയുമാണ് മരിച്ചത്. ഇരുവർക്കും 25 വയസ്സായിരുന്നു. സഹപാഠികളും അടുത്ത സുഹൃത്തുക്കളുമായിരുന്ന ഇരുവരുടെയും അപ്രതീക്ഷിത വിയോഗം നാടിനെയും കുടുംബാംഗങ്ങളെയും കണ്ണീരിലാഴ്ത്തി.
മീനടം വട്ടക്കാവുങ്കൽ തോമസ് (കൊച്ചുമോൻ)ന്റെ മകളാണ് അഷ്ലി ആൻ തോമസ്. കഴിഞ്ഞ ദിവസം IELTS പരീക്ഷ വിജയിച്ച അഷ്ലി, ബെംഗളൂരുവിൽനിന്ന് നാട്ടിലെത്തിയതിനു പിന്നാലെയാണ് ദുരന്തം സംഭവിച്ചത്. വിദേശപഠനവും ഭാവിജീവിതവും ഉൾപ്പെടെ നിരവധി സ്വപ്നങ്ങളുമായി മുന്നോട്ടുപോകുന്നതിനിടെയാണ് അഷ്ലിയെ മരണം കവർന്നെടുത്തത്.
പാമ്പാടി പൊത്തൻപുറം കടവുംഭാഗത്ത് ഫാ. കുര്യാക്കോസിന്റെ മകളാണ് കൃപ. ബ്ലോസം വാലിയുടെ ഡയറക്ടറാണ് ഫാ. കുര്യാക്കോസ്. ഓസ്‌ട്രേലിയയിൽ മാസ്റ്റർ ഓഫ് സോഷ്യൽ വർക്ക് (MSW) പഠനം പൂർത്തിയാക്കിയ കൃപയ്ക്ക് അടുത്ത മാർച്ചിലായിരുന്നു ബിരുദദാനച്ചടങ്ങ് നിശ്ചയിച്ചിരുന്നത്.
സുഹൃത്തിനൊപ്പമുള്ള യാത്രയ്ക്കിടെയാണ് ഇരുവരും അപകടത്തിൽപ്പെട്ടത്. ഒരുമിച്ച് പഠിക്കുകയും ഒരുപാട് സ്വപ്നങ്ങൾ പങ്കുവെക്കുകയും ചെയ്തിരുന്ന രണ്ട് യുവതികളുടെ ജീവിതമാണ് അപ്രതീക്ഷിതമായി അവസാനിച്ചത്.
മരണവാർത്തയറിഞ്ഞതോടെ ബന്ധുക്കളും സുഹൃത്തുക്കളും നാട്ടുകാരും ദുഃഖത്തിലായി.
മൃതശരീരങ്ങൾ കോട്ടയം മെഡിക്കൽ കോളേജിൽ പോസ്റ്റ്‌മോർട്ടത്തിനുശേഷം മണർകാട് സെന്റ് മേരീസ് ആശുപത്രി മോർച്ചറിയിലേക്ക് മാറ്റും. സംസ്കാരച്ചടങ്ങുകളുടെ വിവരങ്ങൾ പിന്നീട് അറിയിക്കും.
