ടാ’ ഷ്ബിയേഷ്: മാൾട്ടയിലെ ടാ’ ഷ്ബിയേഷിൽ നിലവിലുള്ള പെട്രോൾ പമ്പിന്റെ സ്ഥലത്ത് 10 നില ഫോർ സ്റ്റാർ ഹോട്ടൽ നിർമ്മിക്കാൻ പദ്ധതി. പെട്രോൾ പമ്പ് ഉൾപ്പെടെയുള്ള നിലവിലെ കെട്ടിടങ്ങൾ പൊളിച്ചുനീക്കി പുതിയ ഹോട്ടൽ സമുച്ചയം നിർമ്മിക്കാനുള്ള അപേക്ഷയാണ് പ്ലാനിംഗ് അതോറിറ്റിക്ക് സമർപ്പിച്ചിരിക്കുന്നത്.
Triq Testaferrata, Triq Giorgio Mitrovich എന്നീ റോഡുകളുടെ സംഗമസ്ഥാനത്തുള്ള Sterling സർവീസ് സ്റ്റേഷൻ സ്ഥിതിചെയ്യുന്ന സ്ഥലത്താണ് പദ്ധതി. PA/06058/26 എന്ന അപേക്ഷ പ്രകാരം മൂന്ന് ഭൂഗർഭ നിലകളിലായി പാർക്കിംഗ് സൗകര്യം ഒരുക്കും. ഗ്രൗണ്ട് ഫ്ലോറിൽ ഷോറൂമും അതിന് മുകളിലായി ഒമ്പത് നിലകളിലായി ഹോട്ടൽ സൗകര്യങ്ങളുമാണ് നിർദേശിച്ചിരിക്കുന്നത്.
നിർദിഷ്ട കെട്ടിടത്തിന് സമീപത്തുള്ള 17 നില ST Tower-ന് തൊട്ടടുത്തായിരിക്കും സ്ഥാനം. പ്രദേശത്ത് ഉയരം കൂടിയ കെട്ടിടങ്ങളും ഹോട്ടൽ പദ്ധതികളും വർധിച്ചുവരുന്നതിനിടെയാണ് പുതിയ അപേക്ഷയും എത്തിയിരിക്കുന്നത്.
ഈ സ്ഥലവുമായി ബന്ധപ്പെട്ട് 2023ൽ മറ്റൊരു വികസന പദ്ധതിക്ക് അനുമതി ലഭിച്ചിരുന്നു. അന്നത്തെ പദ്ധതിയിൽ പെട്രോൾ പമ്പ് താൽക്കാലികമായി പ്രവർത്തനം തുടരാനും നിലവിലുള്ള കെട്ടിടങ്ങളും കാർ വാഷും പൊളിച്ച് തുറസ്സായ സ്വകാര്യ പാർക്കിംഗ് ഏരിയ ഒരുക്കാനുമായിരുന്നു നിർദേശം. ഏകദേശം എട്ട് വർഷത്തിനുള്ളിൽ പെട്രോൾ പമ്പിന്റെ പ്രവർത്തനം അവസാനിപ്പിച്ച് പ്രദേശം പൂർണമായി പുനർവികസിപ്പിക്കാനായിരുന്നു പദ്ധതി.
അതേസമയം, ടാ’ ഷ്ബിയേഷിനും സമീപ പ്രദേശങ്ങളായ Gżira, Msida എന്നിവിടങ്ങളിലും വൻകിട ഹോട്ടൽ പദ്ധതികൾ സജീവമാണ്. ഈ ആഴ്ച Villino Micallef സ്ഥിതിചെയ്യുന്ന സ്ഥലത്ത് 76 മുറികളുള്ള ഹോട്ടലിന് പ്ലാനിംഗ് അതോറിറ്റി അനുമതി നൽകിയിരുന്നു.
Triq l-Imsidaയിലെ മറ്റൊരു പെട്രോൾ പമ്പിന്റെ സ്ഥലത്ത് 244 മുറികളുള്ള 11 നില ഹോട്ടൽ നിർമ്മിക്കാനുള്ള പദ്ധതിയും പരിഗണനയിലാണ്. ഓഫീസുകൾ, ഹോട്ടൽ, താമസ യൂണിറ്റുകൾ എന്നിവ ഉൾപ്പെടുന്ന 31 നില ടവർ പദ്ധതിയും പ്രദേശത്ത് നിർദേശിക്കപ്പെട്ടിട്ടുണ്ട്.
ദീർഘകാലമായി മുടങ്ങിക്കിടക്കുന്ന Metropolis പദ്ധതിയിലും പുതിയ മാറ്റങ്ങൾ നിർദേശിച്ചിട്ടുണ്ട്. നേരത്തെ അംഗീകരിച്ച മൂന്ന് ടവറുകൾക്ക് പകരം 34 നിലകളുള്ള ഒറ്റ കെട്ടിടം നിർമ്മിക്കാനാണ് പുതിയ നിർദേശം. ഹോട്ടൽ, താമസ, വാണിജ്യ ആവശ്യങ്ങൾക്കുള്ള സൗകര്യങ്ങൾ ഉൾപ്പെടുന്നതായിരിക്കും കെട്ടിടം.
പുതിയ ഹോട്ടൽ പദ്ധതികൾ കൂടുതൽ തൊഴിലവസരങ്ങൾക്കും ബിസിനസ് സാധ്യതകൾക്കും വഴിതുറക്കുമെങ്കിലും, ഗതാഗതക്കുരുക്ക്, പാർക്കിംഗ്, അടിസ്ഥാന സൗകര്യങ്ങളിലെ സമ്മർദം, പ്രദേശത്തിന്റെ പരിസ്ഥിതി എന്നിവയെക്കുറിച്ചുള്ള ആശങ്കകളും ഉയരുന്നുണ്ട്.
