ന്യൂഡല്ഹി: 2019ലെ ലോക്സഭ തെരഞ്ഞെടുപ്പിലെ മോശം പ്രകടനത്തിന്റെ പ്രധാന കാരണം കൂടുതല് സംവരണ സീറ്റുകളില് വിജയിക്കാന് കഴിയാത്തതാണെന്ന തിരിച്ചറിവില് കോണ്ഗ്രസ്. ഇതിന്റെ ഭാഗമായി 2019ല് വിജയിക്കാന് കഴിയാതിരുന്ന സംവരണ സീറ്റുകളില് കൂടുതലായി കേന്ദ്രീകരിക്കുവാന് തീരുമാനിച്ചിരിക്കുകയാണ് കോണ്ഗ്രസ്. 121 സംവരണ സീറ്റുകളില് പരാജയപ്പെട്ട 56 സീറ്റുകളുടെ പട്ടികയുണ്ടാക്കി ഈ മണ്ഡലങ്ങളില് പ്രവര്ത്തനങ്ങള് ശക്തമാക്കാനാണ് ആലോചിക്കുന്നത്.
‘നേതൃത്വ വികസന പദ്ധതി’ എന്ന് പേരിട്ടിരിക്കുന്ന ഈ പ്രത്യേക നീക്കത്തില് മണ്ഡലത്തിലെ ദളിത്, ആദിവാസി, പിന്നോക്ക, ന്യൂനപക്ഷ വിഭാഗങ്ങളില് നിന്നുള്ള വ്യക്തികളെ തിരിച്ചറിയുകയും അവരുടെ കഴിവുകളെ പാര്ട്ടി ശക്തി വര്ദ്ധിപ്പിക്കുന്നതിന് വേണ്ടി ഉപയോഗിക്കുക എന്നതാണ് തന്ത്രം.
12 സംസ്ഥാനങ്ങളിലായുള്ള 28 പട്ടികജാതി സംവരണ സീറ്റുകളും 12ലധികം സംസ്ഥാനങ്ങളിലായുള്ള 28 പട്ടികവര്ഗ സീറ്റുകളുമാണുള്ളത്. 2009ലെ ലോക്സഭ തെരഞ്ഞെടുപ്പില് ഈ സീറ്റുകളില് കോണ്ഗ്രസാണ് രണ്ടാം സ്ഥാനത്തെത്തിയത്. കയ്യിലുള്ള കുറഞ്ഞ വിഭവങ്ങള് ഉപയോഗിച്ച് രാജ്യം മുഴുവന് ശ്രദ്ധ കേന്ദ്രീകരിക്കുന്നതിന് പകരം ഈ സീറ്റുകള് നോക്കുന്നതാണെന്ന് പാര്ട്ടി തന്ത്രജ്ഞര് പറയുന്നു.
ഓരോ മണ്ഡലത്തിന്റെയും ഉത്തരവാദിത്വം ഒരു നേതാവിന് നല്കും. മണ്ഡലത്തിലെ ജനങ്ങളെ സ്വാധീനിക്കാന് ശേഷിയുള്ള ദളിത്, ആദിവാസി, പിന്നോക്ക, ന്യൂനപക്ഷ വിഭാഗങ്ങളില് നിന്നുള്ള വ്യക്തികളെ തിരിച്ചറിയുകയാണ് ഇവരില് അധിഷ്ടിതമായിരിക്കുന്ന ഉത്തരവാദിത്വം. പാര്ട്ടിയോട് താല്പര്യമുള്ളവരുടെ പട്ടിക തയ്യാറാക്കുക, സ്ഥാനാര്ത്ഥിയുടെ തെരഞ്ഞെടുപ്പ് പ്രചരണ തന്ത്രമൊരുക്കുക, ഓരോ വീടുകളിലും പാര്ട്ടിയെ എത്തിക്കുക എന്നതും ഇവരുടെ ഉത്തരവാദിത്വമാണ്.
ഒരു കാലത്ത് ശക്തികേന്ദ്രങ്ങളായിരുന്ന സംവരണ സീറ്റുകള് കൈവിട്ടുപോയതാണ് 2014ലെയും 2019ലെയും തെരഞ്ഞെടുപ്പുകള് കൈവിട്ടുപോയതെന്ന് പാര്ട്ടി മാനേജര്മാര് വിലയിരുത്തുന്നു. അതിനാല് സംഘടിതമായ പ്രവര്ത്തനങ്ങള് നടത്തി സീറ്റുകള് തിരികെ പിടിക്കാനാണ് കോണ്ഗ്രസ് ആലോചന.
പുതിയ നേതാക്കളെ വികസിപ്പിക്കുന്ന പദ്ധതിയുടെ മേല്നോട്ടം രാഹുല് ഗാന്ധി ടീമിലെ കെ രാജു നിര്വഹിക്കും. കോണ്ഗ്രസ് അദ്ധ്യക്ഷന് ഖാര്ഗെ വലിയ ശ്രദ്ധയാണ് ഈ പദ്ധതിക്ക് നല്കുന്നതെന്നാണ് വിവരം. ഈ പദ്ധതിയുടെ വിവരങ്ങള് എഐസിസി ജനറല് സെക്രട്ടറി കെസി വേണുഗോപാല് താഴെ തട്ടിലേക്ക് കൈമാറികഴിഞ്ഞു.
2023ല് നിയമസഭ തെരഞ്ഞെടുപ്പ് നടക്കുന്ന ത്രിപുര, കര്ണാടക, രാജസ്ഥാന്, ചത്തീസ്ഗഡ്, മധ്യപ്രദേശ് എന്നീ സംസ്ഥാനങ്ങളിലെ 243 സംവരണ നിയോജക മണ്ഡലങ്ങളിലും കൂടുതല് ശ്രദ്ധ നല്കാന് കോണ്ഗ്രസ് നിര്ദേശിച്ചിട്ടുണ്ട്. ഈ മണ്ഡലങ്ങളിലും നേതൃവികസന പദ്ധതികള് ആരംഭിച്ചിട്ടുണ്ട്.
StorY Highlights: Congress plans to focus on 56 SC/ST seats
