മെൽബൺ: കേരളത്തിന്റെ ആരോഗ്യമന്ത്രി വീണാ ജോർജിന് ഓസ്ട്രേലിയയിലെ വിക്ടോറിയൻ പാർലമെന്റിൽ ഉജ്ജ്വലമായ സ്വീകരണവും പ്രത്യേക ആദരവും ലഭിച്ചു. ഒരു ഇന്ത്യൻ സംസ്ഥാന മന്ത്രിക്ക് ഇത്തരമൊരു അവസരം ലഭിക്കുന്നത് ചരിത്രത്തിൽ ആദ്യമായ് ആണ്. ഇത് കേരളത്തിന്റെ ആരോഗ്യമേഖലയിലെ നേട്ടങ്ങൾക്കുള്ള ആഗോള അംഗീകാരമായി വിലയിരുത്തപ്പെടുന്നു.
വിക്ടോറിയയും കേരളവും തമ്മിലുള്ള ആരോഗ്യമേഖലയിലെ സഹകരണത്തിന്റെ അംഗീകാരമെന്ന നിലയിലാണ് മന്ത്രി വീണാ ജോർജിനെ വിക്ടോറിയൻ പാർലമെന്റ് സെഷനിൽ പ്രത്യേക അതിഥിയായി ക്ഷണിച്ചത്. ജൂൺ 19-ന് നടന്ന പാർലമെന്റ് സെഷനിലാണ് മന്ത്രി പങ്കെടുത്തതും ആദരം ഏറ്റുവാങ്ങിയതും.
യാത്രക്കിടെ വിക്ടോറിയൻ പ്രീമിയർ ജസിന്ത അലൻ, ഡെപ്യൂട്ടി പ്രീമിയർ ബെൻ കാരോൾ, ടൂറിസം മന്ത്രി സ്റ്റീവൻ ഡിംപൂലോസ്, ആരോഗ്യ മന്ത്രി മേരി ആൻ തോമസ് എന്നിവരുമായി മന്ത്രി വീണാ ജോർജ് കൂടിക്കാഴ്ച നടത്തി.ഈ കൂടിക്കാഴ്ചകൾ കേരളവും വിക്ടോറിയയും തമ്മിലുള്ള ആരോഗ്യ മേഖലയിലെ സഹകരണവും ബന്ധവും കൂടുതൽ ശക്തിപ്പെടുത്താൻ സഹായിക്കും.
വിക്ടോറിയൻ പാർലമെന്റിലെ അപ്പർ ഹൗസ് പ്രസിഡന്റ് ഷോൺ ലീൻ, സർക്കാർ ചീഫ് വിപ്പ് ലീ ടാർലാമിസ് എന്നിവർ ചേർന്നാണ് മന്ത്രി വീണാ ജോർജിന് പ്രത്യേക പുരസ്കാരങ്ങൾ നൽകി ആദരിച്ചത്. ഇത് കേരളത്തിന്റെ ആരോഗ്യമേഖലയിലെ പുരോഗതിക്കും, പ്രത്യേകിച്ചും മഹാമാരി കാലത്ത് കേരളം കൈവരിച്ച നേട്ടങ്ങൾക്കും ലഭിച്ച അംഗീകാരമായി കണക്കാക്കപ്പെടുന്നു.
വിവിധ മേഖലകളിൽ, പ്രത്യേകിച്ച് ആരോഗ്യ രംഗത്ത് കേരളവും ഓസ്ട്രേലിയയും തമ്മിലുള്ള സഹകരണം വർദ്ധിപ്പിക്കുന്നതിനുള്ള നിരവധി ചർച്ചകൾ ഈ സന്ദർശനത്തിൽ നടന്നു. ആരോഗ്യ മേഖലയിലെ അറിവുകൾ, സാങ്കേതികവിദ്യ, പരിശീലനം എന്നിവ കൈമാറുന്നതിലൂടെ ഇരു പ്രദേശങ്ങൾക്കും പരസ്പരം പ്രയോജനം നേടാൻ ഈ സന്ദർശനം വഴിയൊരുക്കും.
ഈ സന്ദർശനം ഓസ്ട്രേലിയയിലെ ഇന്ത്യൻ, മലയാളി സമൂഹത്തിന് വലിയ അഭിമാന നിമിഷമാണ് സമ്മാനിച്ചത്. കേരളത്തിന്റെ മന്ത്രിക്ക് ഓസ്ട്രേലിയയുടെ നിയമനിർമ്മാണ സഭയിൽ ലഭിച്ച ഈ ആദരം ഇരു രാജ്യങ്ങളും തമ്മിലുള്ള ബന്ധം കൂടുതൽ ദൃഢമാക്കുമെന്നും പ്രതീക്ഷിക്കുന്നു.
വിക്ടോറിയൻ ” ഗവൺമെൻ്റ് പ്രതിനിധി സൗത്ത് മെട്രോപൊളിറ്റിൻ റീജിയൻ എംപി
ലീ ടർ ലാമീസിന് മന്ത്രി വീണ ജോർജ് കേരളത്തിൻ്റെ ഉപഹാരമായി ആറൻമുള കണ്ണാടി കൈമാറുകയും വിക്ടോറിയൻ ഗവൺമെൻ്റിൻ്റെ സ്നേഹോപഹാരം ഏറ്റുവാങ്ങുകയും ചെയ്തു.
