ബെൻഡിഗോ: ഓസ്ട്രേലിയയുടെ ഹൃദയഭാഗത്ത്, കേരളത്തിന്റെ തനിമയും കുടുംബ മൂല്യങ്ങളും കാത്തുസൂക്ഷിച്ച്, ബെൻഡിഗോ സോഷ്യൽ ക്ലബ്ബ് വിജയകരമായി മുന്നേറുന്നു. വെറും 10 സുഹൃത്തുക്കളുടെ ലളിതമായ ഒര ആശയമായി ബെൻഡിഗോയിൽ ആരംഭിച്ച ഈ കൂട്ടായ്മ, ഇന്ന് മലയാള പാരമ്പര്യത്തിലും ഐക്യത്തിലും ഊന്നി വളർന്ന ഒരു വലിയ പ്രസ്ഥാനമായി മാറിയിരിക്കുകയാണ്.
കേരളത്തിന്റെ നൊസ്റ്റാൾജിയ ഓസ്ട്രേലിയൻ മണ്ണിൽ പുനരാവിഷ്കരിക്കുക എന്നതാണ് ബെൻഡിഗോ സോഷ്യൽ ക്ലബ്ബിന്റെ പ്രധാന ലക്ഷ്യം. ഭക്ഷണം, സംഗീതം, കല, ഓർമ്മകൾ എന്നിവയുടെ മനോഹരമായൊരു സംഗമം ഒരുക്കി, പ്രവാസികളായ മലയാളികൾക്ക് തങ്ങളുടെ വേരുകളുമായി ബന്ധപ്പെടാനുള്ള അവസരമാണ് ക്ലബ്ബ് നൽകുന്നത്.
പ്രവാസികളായ ഓരോ മലയാളിയും തങ്ങളുടെ കഥകളും രുചികളും മൂല്യങ്ങളും പേറിയാണ് ഓസ്ട്രേലിയയിൽ എത്തുന്നത്. ഈ അനുഭവങ്ങളെല്ലാം പങ്കുവെക്കാനുള്ള ഒരു വേദിയാണ് ബെൻഡിഗോ സോഷ്യൽ ക്ലബ്ബ് ഒരുക്കുന്നത്. പരമ്പരാഗത ആചാരങ്ങളിലൂടെയും ഉത്സവങ്ങളിലൂടെയും ദൈനംദിന സൗഹൃദ കൂട്ടായ്മകളിലൂടെയും ഈ ക്ലബ്ബ് മലയാളി സമൂഹത്തിന് ഊഷ്മളമായൊരു ഒത്തുചേരലിന് അവസരം നൽകുന്നു.
കുട്ടികൾ മുതൽ മുതിർന്നവർ വരെയുള്ള എല്ലാവർക്കും ഈ ക്ലബ്ബിൽ അംഗമാകാം. സ്ത്രീകൾക്കും കുട്ടികൾക്കും പ്രത്യേക പരിഗണന നൽകിക്കൊണ്ടുള്ള പരിപാടികളാണ് ഇവിടെ സംഘടിപ്പിക്കുന്നത്. കേരളത്തിന്റെ ശക്തി അതിന്റെ കുടുംബങ്ങളിലാണെന്ന ഉറച്ച വിശ്വാസത്തിൽ, ഓരോ പരിപാടിയും കുടുംബ സൗഹൃദപരവും സുരക്ഷിതവുമാക്കാൻ ക്ലബ്ബ് ശ്രദ്ധിക്കുന്നു.
ബെൻഡിഗോ സോഷ്യൽ ക്ലബ്ബിന്റെ പരിപാടികൾ വെറും വിനോദങ്ങൾക്കപ്പുറം, കേരളത്തിന്റെ സ്നേഹവും സംസ്കാരവും വിളിച്ചോതുന്ന ആഘോഷങ്ങളാണ്. ഈ കൂട്ടായ്മയുടെ അമരത്ത് പ്രസിഡന്റ് ആന്റോ ജോസഫും, സെക്രട്ടറി ജിബി ഔസേഫും, ട്രഷറർ നഥാൻ മാത്യുവും നേതൃത്വം നൽകുന്നു.
