കൊച്ചി : ബലാത്സംഗക്കേസില് റാപ്പര് വേടനെ ഇന്നും കൊച്ചി പൊലീസ് ചോദ്യം ചെയ്യും. ഹൈക്കോടതിയില് നിന്ന് മുന്കൂര് ജാമ്യം ലഭിച്ച സാഹചര്യത്തില് അന്വേഷണവുമായി സഹകരിക്കാന് ഇയാള് ബാധ്യസ്ഥനാണ്. തൃക്കാക്കര പൊലീസ് സ്റ്റേഷനിലെത്തി ഇന്നലെ അഞ്ചര മണിക്കൂറോളം ചോദ്യം ചെയ്ത ശേഷമാണ് വേടനെ വിട്ടയച്ചത്.
കേസില് പരാതിക്കാരിയായ യുവതിയുടെ രഹസ്യമൊഴി രേഖപ്പെടുത്താനാണ് അന്വേഷണ സംഘത്തിന്റെ തീരുമാനം. കേസില് നിര്ണായകമായേക്കാവുന്ന ഈ മൊഴി പൊലീസ് കോടതിയില് സമര്പ്പിക്കും. മുന്കൂര് ജാമ്യം ലഭിച്ചതോടെ അറസ്റ്റ് ഒഴിവായെങ്കിലും അന്വേഷണ സംഘം ആവശ്യപ്പെടുന്ന സമയത്തെല്ലാം ഹാജരാവാനും ചോദ്യം ചെയ്യലുമായി സഹകരിക്കാനും വേടന് നിര്ദ്ദേശിക്കപ്പെട്ടിട്ടുണ്ട്. കേസ് കോടതിയുടെ പരിഗണനയിലായതിനാല് ഇപ്പോള് പ്രതികരിക്കാനില്ലെന്ന് വേടന് ഇന്നലെ മാധ്യമങ്ങളോട് പറഞ്ഞിരുന്നു. കേസ് അവസാനിച്ച ശേഷം എല്ലാ കാര്യങ്ങളും തുറന്നുപറയാമെന്നും ഇയാള് വ്യക്തമാക്കി. പൊലീസ് ചോദ്യം ചെയ്യല് ഇന്നും തുടരുമെന്നാണ് റിപ്പോര്ട്ട്.
