കാൻബെറ: ഓസ്ട്രേലിയയിലെ വീടുകൾക്കും ബിസിനസ്സുകൾക്കും നൽകിവന്നിരുന്ന 300 ഡോളർ എനർജി ബിൽ റിലീഫ് ഫണ്ട് (Energy Bill Relief Fund) നിർത്തലാക്കുന്നതായി ട്രഷറർ ജിം ചാൽമേഴ്സ് പ്രഖ്യാപിച്ചു. വർദ്ധിച്ചുവരുന്ന ജീവിതച്ചെലവ് നേരിടാൻ താൽക്കാലിക ഇളവുകൾക്ക് പകരം കൂടുതൽ സ്ഥിരമായ നടപടികളിലേക്കുള്ള സർക്കാരിന്റെ മാറ്റത്തിന്റെ ഭാഗമായാണ് ഈ തീരുമാനം.
പണപ്പെരുപ്പം ഉയർന്ന നിരക്കിലായിരുന്ന സമയത്താണ് താൽക്കാലികമായി ഇത്തരം സാമ്പത്തിക സഹായങ്ങൾ പ്രഖ്യാപിച്ചിരുന്നത്.
എന്നാൽ ഇപ്പോൾ ദീർഘകാലാടിസ്ഥാനത്തിൽ ജനങ്ങൾക്ക് ഗുണകരമാകുന്ന മാറ്റങ്ങൾക്കാണ് സർക്കാർ മുൻഗണന നൽകുന്നതെന്ന് ചാൽമേഴ്സ് വ്യക്തമാക്കി.
നികുതി വ്യവസ്ഥയിലെ മാറ്റങ്ങൾ, മെഡിക്കെയർ (Medicare), ഫാർമസ്യൂട്ടിക്കൽ ബെനഫിറ്റ് സ്കീം (PBS) എന്നിവയിലൂടെ ജനങ്ങൾക്ക് കൂടുതൽ സ്ഥിരമായ ആശ്വാസം നൽകാനാണ് സർക്കാർ ലക്ഷ്യമിടുന്നത്. ഇത് എളുപ്പമുള്ള തീരുമാനമായിരുന്നില്ലെന്നും എന്നാൽ നിലവിലെ സാമ്പത്തിക സാഹചര്യത്തിൽ ശരിയായ തീരുമാനമാണെന്നും ട്രഷറർ കൂട്ടിച്ചേർത്തു.
