ന്യൂഡൽഹി: ട്രെയിൻ യാത്രയിൽ ഡിജിറ്റൽ അൺറിസർവ്ഡ് ടിക്കറ്റ് ഉപയോഗിക്കുന്ന യാത്രക്കാർക്കായി ഇന്ത്യൻ റെയിൽവേ പുതിയ നിർദേശം പുറത്തിറക്കി. ഇനി മുതൽ RailOne ആപ്പ് വഴി ബുക്ക് ചെയ്യുന്ന ഡിജിറ്റൽ അൺറിസർവ്ഡ് ടിക്കറ്റ്, ബുക്ക് ചെയ്ത അതേ രജിസ്റ്റർ ചെയ്ത മൊബൈൽ ഫോണിൽ നിന്നുതന്നെ ടിക്കറ്റ് പരിശോധനാ ഉദ്യോഗസ്ഥന് കാണിക്കണമെന്നാണ് നിർദേശം. സ്ക്രീൻഷോട്ട്, ഫോട്ടോ, PDF പകർപ്പ്, വാട്സ്ആപ്പ് വഴിയോ മറ്റ് മെസേജിങ് ആപ്പുകളിലൂടെയോ അയച്ച ടിക്കറ്റുകൾ സാധുവായ യാത്രാരേഖയായി അംഗീകരിക്കില്ല.
അടുത്തിടെ ഒരു യാത്രക്കാരി RailOne ആപ്പിൽ മറ്റൊരാൾ ബുക്ക് ചെയ്ത ടിക്കറ്റിന്റെ വാട്സ്ആപ്പ് സ്ക്രീൻഷോട്ട് മാത്രം ഹാജരാക്കിയതിനെ തുടർന്ന് പിഴ ചുമത്തപ്പെട്ട സംഭവത്തെ തുടർന്നാണ് റെയിൽവേ ഈ വിശദീകരണം നൽകിയത്. യഥാർത്ഥ ഡിജിറ്റൽ ടിക്കറ്റ് രജിസ്റ്റർ ചെയ്ത മൊബൈൽ ഫോണിൽ തന്നെ ലഭ്യമായിരിക്കണമെന്നാണ് അധികൃതർ വ്യക്തമാക്കുന്നത്.
കൂടാതെ, യാത്ര ആരംഭിക്കുന്ന സ്റ്റേഷനിൽ നിന്ന് ട്രെയിൻ പുറപ്പെടുന്നതിന് മുമ്പ് തന്നെ ഡിജിറ്റൽ അൺറിസർവ്ഡ് ടിക്കറ്റ് ബുക്ക് ചെയ്തിരിക്കണം. ട്രെയിൻ പുറപ്പെട്ടതിന് ശേഷമെടുക്കുന്ന ടിക്കറ്റുകൾ സാധുവായി പരിഗണിക്കില്ലെന്നും റെയിൽവേ അറിയിച്ചു.
എന്നാൽ ഈ പുതിയ നിർദേശം പ്രധാനമായും ഡിജിറ്റൽ അൺറിസർവ്ഡ് ടിക്കറ്റുകൾക്കാണ് ബാധകമാകുന്നത്. റിസർവ്ഡ് ടിക്കറ്റുകളുടെ പരിശോധന നിലവിലുള്ള ചട്ടങ്ങൾ അനുസരിച്ചുതന്നെ തുടരും. യാത്രക്കാർ യാത്രയ്ക്കിടെ ടിക്കറ്റ് ബുക്ക് ചെയ്ത മൊബൈൽ ഫോൺ കൈവശം സൂക്ഷിക്കുകയും ആവശ്യമായ ബാറ്ററി ചാർജ് ഉറപ്പാക്കുകയും ചെയ്യണമെന്ന് റെയിൽവേ നിർദേശിച്ചിട്ടുണ്ട്.
