മാൾട്ട : 18 വർഷമായി മാൾട്ടയിൽ നിയമപരമായി താമസിക്കുന്ന ഗാംബിയൻ ഡിജെ യുസുഫ ദിബാസിയെ (ഡിജെ ഡോളറിനോ) നാടുകടത്താനുള്ള അധികൃതരുടെ നീക്കത്തിനെതിരെ വ്യാപക പ്രതിഷേധം ഉയരുന്നു. 70 തവണയോളം താൽക്കാലിക യാത്രാ രേഖ (Yellow Book) പുതുക്കിയ ഇദ്ദേഹത്തെ മാനുഷിക പരിഗണന നൽകി രാജ്യത്ത് തുടരാൻ അനുവദിക്കണമെന്നാവശ്യപ്പെട്ട് സാംസ്കാരിക പ്രവർത്തകരും സംഘടനകളും രംഗത്തെത്തിയിട്ടുണ്ട്.
ഗാംബിയൻ സ്വദേശിയായ യുസുഫ ദിബാസി (ഡിജെ ഡോളറിനോ) തൻ്റെ താമസ രേഖകൾ പുതുക്കുന്നതിനായി കഴിഞ്ഞ ഓഗസ്റ്റ് 10-ന് ഇമിഗ്രേഷൻ അധികൃതർക്ക് മുന്നിൽ ഹാജരായപ്പോഴാണ് അപ്രതീക്ഷിതമായി അറസ്റ്റ് ചെയ്യപ്പെട്ടത്.അഭയം നിഷേധിക്കപ്പെട്ട അഭയാർത്ഥികൾക്ക് മാൾട്ട സർക്കാർ നൽകുന്ന താൽക്കാലിക യാത്രാ രേഖയാണ് യല്ലോ ബുക്ക് (Yellow Book). ഓരോ മൂന്ന് മാസം കൂടുമ്പോഴും ഇത് പുതുക്കേണ്ടതുണ്ട്. കഴിഞ്ഞ 18 വർഷമായി ഏകദേശം 70 തവണ ഇദ്ദേഹം ഈ രേഖ വിജയകരമായി പുതുക്കുകയും മാൾട്ടയിൽ നിയമപരമായി ജോലി ചെയ്ത് ജീവിക്കുകയും ചെയ്തിരുന്നു.
2008-ൽ, തന്റെ 23-ാം വയസ്സിലാണ് യുസുഫ മാൾട്ടയിൽ എത്തുന്നത്. നിലവിൽ ഇദ്ദേഹത്തിന് 41 വയസ്സുണ്ട്. മാൾട്ടയിലെ സംഗീത-സാംസ്കാരിക മേഖലകളിൽ സജീവ സാന്നിധ്യമായ അദ്ദേഹം അവിടുത്തെ പ്രാദേശിക സമൂഹവുമായി ആഴത്തിലുള്ള സൗഹൃദവും ബന്ധവും സ്ഥാപിച്ചിട്ടുണ്ട്. യുസുഫയെ നാടുകടത്താനുള്ള നീക്കത്തിനെതിരെ ഡാൻസ് ബിയോണ്ട് ബോർഡേഴ്സ് (Dance Beyond Borders) എന്ന സാംസ്കാരിക സംഘടനയാണ് മുന്നിൽ നിന്ന് പോരാടുന്നത്. മാൾട്ട മുൻ പ്രസിഡന്റ് മരീ-ലൂയിസ് കൊലീറോ പ്രീക്ക (Marie-Louise Coleiro Preca), നിരവധി പ്രമുഖ സന്നദ്ധ സംഘടനകൾ (NGOs), സാംസ്കാരിക പ്രവർത്തകർ എന്നിവർ ഈ അപ്പീലിനെ പിന്തുണച്ച് രംഗത്തെത്തിയിട്ടുണ്ട്.യുസുഫയുടെ നീണ്ട വർഷത്തെ താമസം, മാൾട്ട സമൂഹവുമായുള്ള ബന്ധം എന്നിവ കണക്കിലെടുത്ത് യൂറോപ്യൻ മനുഷ്യാവകാശ കൺവെൻഷൻ്റെ ആർട്ടിക്കിൾ 8 (സ്വകാര്യ-കുടുംബ ജീവിതത്തിനുള്ള അവകാശം) പ്രകാരം നാടുകടത്തൽ നടപടി താൽക്കാലികമായി നിർത്തിവെക്കണമെന്ന് സംഘടനകൾ ആവശ്യപ്പെടുന്നു. നിയമത്തിൽ ഇളവ് നൽകി യുസുഫയ്ക്ക് മാൾട്ടയിൽ സ്ഥിരതാമസത്തിനുള്ള അനുമതി നൽകണമെന്നാണ് ഇവരുടെ ആവശ്യം.കർശനമായ ഇമിഗ്രേഷൻ നടപടികൾക്കെതിരെ മാൾട്ടയിൽ വലിയ രീതിയിലുള്ള മനുഷ്യാവകാശ പ്രതിഷേധങ്ങൾ നിലനിൽക്കുന്നുണ്ട്.
