മാൾട്ട: ഒരു വർഷത്തോളം ഉപയോഗിക്കാത്ത വ്യക്തിഗത Tallinja കാർഡുകൾക്ക് €5 ഇൻആക്ടിവിറ്റി ഫീസ് ഈടാക്കാൻ സാധ്യതയുണ്ടെന്ന് Malta Public Transport (MPT) അറിയിച്ചു. Tallinja കാർഡ് മാൾട്ടയിലെ പൊതുഗതാഗത ബസുകളിൽ യാത്ര ചെയ്യാൻ ഉപയോഗിക്കുന്ന യാത്രാ കാർഡാണ്. കാർഡിൽ പണം ടോപ്പ്-അപ്പ് ചെയ്ത് ബസ് യാത്രയ്ക്ക് ഉപയോഗിക്കാം. സ്ഥിരമായി ബസ് യാത്ര ചെയ്യുന്നവർക്ക് ഇത് ഏറെ സൗകര്യപ്രദമാണ്.
യാത്രക്കാർക്കായുള്ള പുതുക്കിയ നിബന്ധനകളിലാണ് ഇക്കാര്യം വ്യക്തമാക്കിയിരിക്കുന്നത്.
തുടർച്ചയായി 365 ദിവസം കാർഡ് ഉപയോഗിക്കുകയോ അതിൽ ടോപ്പ്-അപ്പ് നടത്തുകയോ ചെയ്തിട്ടില്ലെങ്കിൽ, കാർഡ് ‘inactive’ ആയി പരിഗണിക്കപ്പെടാം. തുടർന്ന് കാർഡ് സജീവമാക്കാതെ തുടരുകയാണെങ്കിൽ €5 ഫീസ് ഈടാക്കാൻ MPT-യ്ക്ക് അവകാശമുണ്ടാകും.
കാർഡിൽ പണം ബാക്കിയുണ്ടെങ്കിൽ, കാർഡ് ഉടമയെ ബന്ധപ്പെടുകയും കാർഡ് വീണ്ടും ഉപയോഗിക്കുകയോ ടോപ്പ്-അപ്പ് നടത്തുകയോ ചെയ്യണമെന്ന് അറിയിക്കുമെന്നും MPT വ്യക്തമാക്കി.
Tallinja കാർഡുമായി ബന്ധപ്പെട്ട പുതിയ നിബന്ധനകളിൽ കാർഡിന്റെ വിവിധ തരങ്ങൾ, കാലാവധി, അപേക്ഷ, ടോപ്പ്-അപ്പ്, ബാലൻസ് പരിശോധിക്കൽ, റീഫണ്ട് തുടങ്ങിയ കാര്യങ്ങളും ഉൾപ്പെടുത്തിയിട്ടുണ്ട്.
മാൾട്ടയിലെ ഏകദേശം 75 ശതമാനം താമസക്കാരും വ്യക്തിഗത Tallinja കാർഡ് കൈവശം വയ്ക്കുന്നവരാണ്. 296,000-ത്തിലധികം സജീവ കാർഡ് ഉടമകളുണ്ടെന്നും MPT അറിയിച്ചു. ബസ് യാത്രക്കാരിൽ 80 ശതമാനത്തിലധികം പേർ Tallinja കാർഡ് ഉപയോഗിക്കുന്നുണ്ട്.
2025-ൽ മാൾട്ടയിൽ 8.2 കോടി യാത്രകൾ രേഖപ്പെടുത്തി. 2024-നെ അപേക്ഷിച്ച് 9.6 ശതമാനം വർധനവാണിത്. ഇതിൽ 90 ലക്ഷം യാത്രകൾ വ്യക്തിഗതമല്ലാത്ത Tallinja കാർഡുകൾ ഉപയോഗിച്ചായിരുന്നു.
