പാരിസ്: അടിയന്തര ആവശ്യങ്ങൾക്കായി സൂക്ഷിച്ചിരിക്കുന്ന ഡീസൽ ശേഖരം പുറത്തെടുത്തില്ലെങ്കിൽ, യൂറോപ്പിലേക്കുള്ള ഡീസൽ കയറ്റുമതി പൂർണ്ണമായി നിരോധിക്കുമെന്ന് ഫ്രാൻസിനും ജർമ്മനിക്കും മുന്നറിയിപ്പ് നൽകി അമേരിക്ക. ആഗോള തലത്തിൽ ഇന്ധനവില വർദ്ധിക്കുന്ന സാഹചര്യത്തിൽ വിപണിയിലെ ലഭ്യത കൂട്ടാനും വില നിയന്ത്രിക്കാനുമാണ് ട്രംപ് ഭരണകൂടം യൂറോപ്യൻ രാജ്യങ്ങൾക്ക് മേൽ കടുത്ത സമ്മർദ്ദം ചെലുത്തുന്നത്. അടുത്ത ആറുമാസത്തിനുള്ളിൽ 120 ദശലക്ഷം ബാരൽ ഡീസൽ ശേഖരം വിപണിയിലേക്ക് എത്തിക്കാൻ യു.എസ് ആവശ്യപ്പെട്ടതായി അന്താരാഷ്ട്ര വാർത്താ ഏജൻസിയായ റോയിട്ടേർസ് റിപ്പോർട്ട് ചെയ്യുന്നു.
നവംബറിൽ നടക്കാനിരിക്കുന്ന യു.എസ് ഇടക്കാല തിരഞ്ഞെടുപ്പിന് മുന്നോടിയായി ആഭ്യന്തര വിപണിയിൽ ഇന്ധനവില കുറയ്ക്കുക എന്ന ലക്ഷ്യത്തോടെയാണ് അമേരിക്കയുടെ ഈ നിലപാട്. ഡീസൽ ശേഖരം വിട്ടുനൽകാൻ ഫ്രാൻസും ജർമ്മനിയും തയ്യാറായില്ലെങ്കിൽ യു.എസ് തങ്ങളുടെ ഇന്ധന കയറ്റുമതി നിരോധിച്ചേക്കും. അങ്ങനെ വന്നാൽ നിലവിൽ പശ്ചിമേഷ്യൻ സംഘർഷങ്ങളും റഷ്യൻ ഉപരോധവും കാരണം ഇന്ധനക്ഷാമം നേരിടുന്ന യൂറോപ്പിന് അത് വൻ തിരിച്ചടിയാകും.
റഷ്യൻ അധിനിവേശത്തെ തുടർന്ന് റഷ്യയിൽ നിന്നുള്ള ഇന്ധന ഇറക്കുമതി നിരോധിച്ചതും, പശ്ചിമേഷ്യയിലെ സംഘർഷങ്ങൾ കാരണം വിതരണം തടസ്സപ്പെട്ടതും മൂലം യൂറോപ്പ്, അമേരിക്കൻ ഇന്ധനത്തെയാണ് വലിയ അളവിൽ ആശ്രയിക്കുന്നത്. എന്നാൽ അടിയന്തര സാഹചര്യങ്ങൾക്കായി മാറ്റിവെച്ചിരിക്കുന്ന ശേഖരം പുറത്തെടുക്കുന്നത് തങ്ങളുടെ ദേശീയ സുരക്ഷയെ ബാധിക്കുമെന്ന ആശങ്കയിലാണ് യൂറോപ്യൻ യൂണിയൻ. പ്രശ്നം ചർച്ച ചെയ്യുന്നതിനായി ഫ്രഞ്ച് പ്രസിഡന്റ് ഇമ്മാനുവൽ മാക്രോണിന്റെ നേതൃത്വത്തിൽ ജി-7 രാജ്യങ്ങളുടെയും അന്താരാഷ്ട്ര ഊർജ്ജ ഏജൻസിയുടെയും അടിയന്തര യോഗം ഉടൻ വിളിച്ചുചേർക്കും. ആഗോള തലത്തിൽ ശുദ്ധീകരിച്ച പെട്രോളിയം ഉൽപ്പന്നങ്ങളുടെ ലഭ്യത ഉറപ്പാക്കുന്നതിനും വില വർദ്ധനവ് തടയുന്നതിനും ഏകോപിത നടപടികൾ സ്വീകരിക്കാനാണ് ജി-7 രാജ്യങ്ങൾ ലക്ഷ്യമിടുന്നത്.
