സിഡ്നി: ആർട്ടിഫിഷ്യൽ ഇന്റലിജൻസ് (AI) യുഗത്തിലേക്ക് മാറുന്നതിന്റെ ഭാഗമായി ജീവനക്കാർക്ക് വൻതോതിൽ പരിശീലനം നൽകാൻ പദ്ധതി പ്രഖ്യാപിച്ചതിന് തൊട്ടുപിന്നാലെ കൂട്ടപ്പിരിച്ചുവിടലുമായി കോമൺവെൽത്ത് ബാങ്ക് ഓഫ് ഓസ്‌ട്രേലിയ (CBA). തങ്ങളുടെ ജീവനക്കാരെ കൃത്രിമബുദ്ധി സാങ്കേതികവിദ്യകൾ ഉപയോഗിക്കാൻ പ്രാപ്തരാക്കുന്നതിനായി 90 മില്യൺ ഡോളറിന്റെ (ഏകദേശം 750 കോടിയിലധികം രൂപ) ‘ഫ്യൂച്ചർ വർക്ക്ഫോഴ്സ് പ്രോഗ്രാം’ ബാങ്ക് പ്രഖ്യാപിച്ചിരുന്നു. എന്നാൽ, ഇതിന് പിന്നാലെ ടെക്നോളജി, റീട്ടെയ്ൽ ബാങ്കിങ് തുടങ്ങിയ വിവിധ വിഭാഗങ്ങളിൽ നിന്നായി 300-ഓളം ജീവനക്കാരെയാണ് ബാങ്ക് പെട്ടെന്ന് പിരിച്ചുവിട്ടത്.
ബാങ്കിന്റെ ഈ വിചിത്രമായ നടപടി ആഗോളതലത്തിൽ തന്നെ വലിയ ചർച്ചകൾക്ക് വഴിതുറന്നിരിക്കുകയാണ്. സാങ്കേതികവിദ്യയുടെ വളർച്ച മനുഷ്യരുടെ തൊഴിലവസരങ്ങൾ ഇല്ലാതാക്കുമെന്ന ആശങ്ക നിലനിൽക്കുന്ന സമയത്താണ് ഓസ്‌ട്രേലിയയിലെ ഏറ്റവും വലിയ ബാങ്കിൽ നിന്നും ഇത്തരമൊരു നീക്കമുണ്ടായിരിക്കുന്നത്.
ബാങ്കിന്റെ ഈ നടപടിക്കെതിരെ ഫിനാൻസ് സെക്ടർ യൂണിയൻ (FSU) ശക്തമായ പ്രതിഷേധവുമായി രംഗത്തെത്തിയിട്ടുണ്ട്. ബാങ്ക് വൻതോതിൽ ലാഭമുണ്ടാക്കുന്ന സാഹചര്യത്തിലും, ജീവനക്കാരെ പുനർവിന്യസിക്കാനോ മറ്റ് തസ്തികകളിലേക്ക് മാറ്റാനോ ശ്രമിക്കാതെ നേരിട്ട് പിരിച്ചുവിട്ടത് ക്രൂരതയാണെന്ന് യൂണിയൻ കുറ്റപ്പെടുത്തി. എഐ പരിശീലനത്തിന്റെ പേരിൽ കോടികൾ ഒഴുക്കുമ്പോൾ മറുവശത്ത് സാധാരണക്കാരായ തൊഴിലാളികളുടെ ഉപജീവനമാർഗ്ഗമാണ് ഇല്ലാതാക്കുന്നതെന്നും അവർ ചൂണ്ടിക്കാണിച്ചു.
എന്നാൽ ഈ പിരിച്ചുവിടലുകൾ നേരിട്ട് എഐ സാങ്കേതികവിദ്യ നടപ്പിലാക്കിയത് കൊണ്ട് മാത്രം ഉണ്ടായതല്ലെന്നാണ് കോമൺവെൽത്ത് ബാങ്ക് അധികൃതർ നൽകുന്ന വിശദീകരണം. ബാങ്കിന്റെ പ്രവർത്തന ഘടനയിലും മറ്റ് സാങ്കേതികവിദ്യകളിലും വരുത്തുന്ന പുനഃക്രമീകരണത്തിന്റെ ഭാഗമായാണ് ഇതെന്നും, ഡിജിറ്റൽ യുഗത്തിലേക്ക് ബാങ്കിനെ പൂർണ്ണമായി മാറ്റിയെടുക്കാൻ ഇത്തരം പുനഃസംഘടനകൾ അനിവാര്യമാണെന്നും ബാങ്ക് വ്യക്തമാക്കി. അടുത്ത 3 വർഷത്തിനുള്ളിൽ നിലവിലുള്ള ജീവനക്കാരെ എഐ സാങ്കേതികവിദ്യകളിൽ വിദഗ്ദ്ധരാക്കുകയാണ് തങ്ങളുടെ ലക്ഷ്യമെന്നും ബാങ്ക് കൂട്ടിച്ചേർത്തു.
