വെസ്റ്റേൺ ക്വീൻസ്‌ലാൻഡിലെ ഫാമിൽ നിന്ന് ഏകദേശം 1.7 ദശലക്ഷം ഡോളർ (ഏകദേശം 14 കോടിയിലധികം ഇന്ത്യൻ രൂപ) മൂല്യം വരുന്ന അയ്യായിരത്തഞ്ഞൂറോളം ഡോർപർ (Dorper) ഇനത്തിൽപ്പെട്ട ചെമ്മരിയാടുകളെ കവർന്നതായി പരാതി. ബ്രിസ്‌ബേനിലിരുന്ന് ഏകദേശം 830 കിലോമീറ്റർ പടിഞ്ഞാറ് ബ്ലാക്കാലിന് സമീപമുള്ള ഒരു വലിയ കൃഷിയിടത്തിൽ നിന്നാണ് ഫെബ്രുവരി മുതൽ മെയ് വരെയുള്ള മാസങ്ങൾക്കിടയിൽ ആടുകൾ മോഷണം പോയത്. സംഭവത്തിൽ ക്വീൻസ്‌ലാൻഡ് പോലീസിന്റെ റൂറൽ ആൻഡ് സ്റ്റോക്ക് ക്രൈം സ്ക്വാഡ് സമഗ്ര അന്വേഷണം ആരംഭിച്ചു.
വെള്ള രോമങ്ങളും കറുത്ത മുഖവുമുള്ള ഇറച്ചി ആവശ്യങ്ങൾക്കായി വളർത്തുന്ന ഡോർപർ ഇനത്തിലുള്ള പെണ്ണാടുകളെയും മുട്ടനാടുകളെയുമാണ് മോഷ്ടിച്ചിട്ടുള്ളത്. കാണാതായ എല്ലാ ആടുകളുടെയും കാതുകളിൽ വെള്ള നിറത്തിലുള്ള നാഷണൽ ലൈവ്സ്റ്റോക്ക് ഐഡന്റിഫിക്കേഷൻ സിസ്റ്റം (NLIS) ടാഗുകൾ ഘടിപ്പിച്ചിട്ടുണ്ടെന്ന് ഡിറ്റക്ടീവ് സീനിയർ സാർജന്റ് പോൾ എലിയറ്റ് വ്യക്തമാക്കി. ഇവയെക്കുറിച്ച് എന്തെങ്കിലും വിവരം ലഭിക്കുന്നവരോ പ്രദേശത്ത് ഇവയെ കണ്ടെത്തിയവരോ പോലീസിൽ വിവരം അറിയിക്കണമെന്നും അദ്ദേഹം അഭ്യർത്ഥിച്ചു. വിശാലമായ ഭൂപ്രദേശങ്ങൾ ഉൾപ്പെടുന്നതിനാൽ കന്നുകാലി മോഷണക്കേസുകൾ അന്വേഷിക്കുന്നത് സങ്കീർണ്ണമാണെന്നും കർഷകർ, വിൽപന കേന്ദ്രങ്ങൾ, ട്രാൻസ്പോർട്ട് ഏജൻസികൾ എന്നിവരുമായി സഹകരിച്ചാണ് അന്വേഷണം പുരോഗമിക്കുന്നതെന്നും അദ്ദേഹം കൂട്ടിച്ചേർത്തു.
സംസ്ഥാനത്തുടനീളം കന്നുകാലി മോഷണങ്ങൾ വർദ്ധിച്ചുവരുന്നത് അതീവ ആശങ്കാജനകമാണെന്നും ഇത്രയും വലിയ തോതിലുള്ള മോഷണം ഫാമുകൾക്ക് കനത്ത സാമ്പത്തിക നഷ്ടമുണ്ടാക്കുമെന്നും ആഗ്ഫോഴ്സ് (AgForce) ജനറൽ പ്രസിഡന്റ് ഷെയ്ൻ മക്കാർത്തി പറഞ്ഞു. ഇത്രയും വലിയ തോതിലുള്ള മോഷണം ഒറ്റപ്പെട്ട ഒന്നല്ലെന്നും കൃത്യമായ ആസൂത്രണത്തോടെ ഒന്നിലധികം ആളുകൾ ഉൾപ്പെട്ട സംഘടിത കുറ്റകൃത്യമാണെന്നും അദ്ദേഹം ചൂണ്ടിക്കാട്ടി. മോഷ്ടിച്ച ആടുകളെ മറ്റ് ഫാമുകളിൽ എത്തിച്ച് പ്രജനനം നടത്തി കുട്ടികളെ വിൽക്കുകയോ, ക്രമേണ അറവുശാലകളിലേക്ക് എത്തിക്കുകയോ ചെയ്യുന്നതാണ് ഇത്തരം സംഘങ്ങളുടെ പതിവ് രീതിയെന്നും അറവുശാലകളിൽ വെച്ചാണ് പലപ്പോഴും ഇത്തരം തട്ടിപ്പുകൾ പിടിക്കപ്പെടാറുള്ളതെന്നും അദ്ദേഹം വിശദീകരിച്ചു.
ഭീമമായ എണ്ണമുള്ളതിനാൽ ഇവയെ ഒറ്റ രാത്രികൊണ്ട് കടത്തിക്കൊണ്ടുപോകാൻ സാധ്യതയില്ലെന്നാണ് ബ്ലാക്കൽ-ടാംബോ മേയർ ആൻഡ്രൂ മാർട്ടിൻ അഭിപ്രായപ്പെട്ടത്. ചെറുകിട ലോഡുകളായി പല ഘട്ടങ്ങളിലായി കടത്തിക്കൊണ്ടുപോയിരിക്കാനാണ് സാധ്യത. ചില രാജ്യങ്ങളോളം വിസ്തൃതിയുള്ള കൂറ്റൻ ഫാമുകളുള്ള ക്വീൻസ്‌ലാൻഡിൽ വർഷത്തിലൊരിക്കൽ കന്നുകാലികളെ കൂട്ടമായി എണ്ണിയെടുക്കുമ്പോഴാണ് (muster) പലപ്പോഴും ഇത്തരം മോഷണങ്ങൾ ഉടമകളുടെ ശ്രദ്ധയിൽപ്പെടാറുള്ളതെന്നും അദ്ദേഹം പറഞ്ഞു.
