പ്രമുഖ ഓസ്ട്രേലിയൻ കാരവൻ നിർമ്മാണ കമ്പനിയായ ‘ഓസ്ട്രേലിയൻ ഓഫ് റോഡ്’ (AOR) പ്രവർത്തനം അവസാനിപ്പിച്ച് വോളണ്ടറി അഡ്മിനിസ്ട്രേഷനിലേക്ക് നീങ്ങി. 26 വർഷത്തെ ദീർഘകാല പ്രവർത്തനത്തിന് ശേഷമാണ് ക്വീൻസ്ലാൻഡ് ആസ്ഥാനമായുള്ള ഈ പ്രമുഖ നിർമ്മാതാക്കൾ സാമ്പത്തിക പ്രതിസന്ധിയിലായത്. ഇത് പ്രാദേശിക നിർമ്മാണ മേഖലയ്ക്കും ജീവനക്കാർക്കും ഉപഭോക്താക്കൾക്കും വലിയ ആശങ്ക സൃഷ്ടിച്ചിട്ടുണ്ട്.
2000-ൽ ക്വീൻസ്ലാൻഡിൽ സ്ഥാപിതമായ എ.ഒ.ആർ, ഓഫ് റോഡ് കാരവൻ നിർമ്മാണ രംഗത്ത് ശക്തമായ വിശ്വാസ്യത നേടിയ സ്ഥാപനമാണ്. നിർമ്മാണവും തൊഴിലവസരങ്ങളും ഓസ്ട്രേലിയയിൽ തന്നെ നിലനിർത്താൻ ശ്രമിച്ച കമ്പനിക്ക് വിലകുറഞ്ഞ ചൈനീസ് ഇറക്കുമതികളും, തങ്ങളുടെ ഉൽപ്പന്നങ്ങളുടെ മാതൃകകൾ എതിരാളികൾ പകർത്തിയതും കടുത്ത തിരിച്ചടിയായെന്നാണ് അധികൃതർ വ്യക്തമാക്കുന്നത്.
കമ്പനി പ്രതിസന്ധിയിലായതോടെ മുൻകൂറായി പണം അടച്ച (ഡെപ്പോസിറ്റ്) നിരവധി ഉപഭോക്താക്കളും കമ്പനിയിലെ ജീവനക്കാരും അനുബന്ധ വിതരണക്കാരും കടുത്ത അനിശ്ചിതത്വത്തിലാണ്. പ്രാദേശിക ഉൽപ്പന്നങ്ങൾക്കും നിർമ്മാണ മേഖലയ്ക്കും വിദേശ വിപണിയിൽ നിന്നുള്ള വിലകുറഞ്ഞ മത്സരങ്ങളിൽ നിന്ന് അർഹമായ സംരക്ഷണം ലഭിക്കുന്നില്ലെന്ന ചർച്ചകൾക്കും ഈ സംഭവം വീണ്ടും വഴിതുറന്നിട്ടുണ്ട്.
