ഓസ്ട്രേലിയയിലെ ഡാർവിനിൽ പ്രവർത്തിക്കുന്ന ഏറ്റവും വലിയ ഭവനരഹിത അഭയകേന്ദ്രമായ ‘യിസ്സ’ (YiSSA) അടച്ചുപൂട്ടുന്നു. കേന്ദ്ര സർക്കാരിന്റെ 3.5 മില്യൺ ഡോളറിന്റെ അടിയന്തര ധനസഹായ പാക്കേജ് നോർത്തേൺ ടെറിട്ടറി (NT) സർക്കാർ നിരസിച്ചതോടെയാണ് കേന്ദ്രത്തിന്റെ പ്രവർത്തനം നിലയ്ക്കുന്നത്. ഇതോടെ ഇവിടെ കഴിയുന്ന 85 കുട്ടികൾ ഉൾപ്പെടെയുള്ള നിരാലംബരായ നൂറുകണക്കിന് കുടുംബങ്ങളും രോഗികളും തെരുവിലേക്കിറങ്ങേണ്ട ദുരവസ്ഥയിലാണ്.
നിലവിൽ 400 കിടക്കകളുള്ള യിസ്സയ്ക്ക് പകരമായി ബാച്ചിലറിൽ സജ്ജീകരിച്ചിരിക്കുന്നത് കേവലം 150 കിടക്കകളുള്ള സംവിധാനം മാത്രമാണ്. ഡാർവിനിൽ നിന്ന് ഏകദേശം 100 കിലോമീറ്റർ അകലെയുള്ള ബാച്ചിലറിൽ പൊതുഗതാഗത സൗകര്യങ്ങളോ അവശ്യ സേവനങ്ങളോ ലഭ്യമല്ലെന്നത് പ്രതിസന്ധിയുടെ ആഴം വർദ്ധിപ്പിക്കുന്നു. കൂടാതെ, നിലവിൽ 90-ലധികം പേർ പുതിയ പ്രവേശനത്തിനായി വെയിറ്റിംഗ് ലിസ്റ്റിലുമുണ്ട്.
സ്ഥാപനം പൂട്ടുന്നതോടെ യിസ്സയിൽ രജിസ്റ്റർ ചെയ്തിട്ടുള്ള 250-ഓളം രോഗികളുടെ തുടർചികിത്സ താളംതെറ്റുമെന്ന ഭീതിയിലാണ് ആരോഗ്യ പ്രവർത്തകർ. ഡയാലിസിസ് രോഗികൾ, ഗാർഹിക പീഡനങ്ങളിൽ നിന്ന് രക്ഷപ്പെട്ടെത്തിയ സ്ത്രീകൾ എന്നിവർക്ക് അത്യാവശ്യ ചികിത്സാ സേവനങ്ങൾ ലഭിക്കാതാകാൻ ഇത് ഇടയാക്കും. അഭയകേന്ദ്രം പൂട്ടുന്നത് ആറ് മാസത്തേക്ക് നീട്ടിനൽകണമെന്ന് ഫെഡറൽ മന്ത്രി മലർന്ദിരി മക്കാർത്തി ആവശ്യപ്പെട്ടെങ്കിലും എൻ.ടി സർക്കാർ ഇത് നിരസിക്കുകയായിരുന്നു.
അഭയകേന്ദ്രം പൂട്ടുന്നതോടെ അമ്മമാർക്ക് കുട്ടികളെ തിരികെ ലഭിക്കാനുള്ള നിയമപരമായ മാനദണ്ഡങ്ങൾ പാലിക്കാൻ ബുദ്ധിമുട്ടാകുമെന്നും, ഡാർവിൻ നഗരത്തിൽ ഭവനരഹിതരുടെ എണ്ണം ക്രമാതീതമായി വർദ്ധിക്കുമെന്നും സാമൂഹിക പ്രവർത്തകർ മുന്നറിയിപ്പ് നൽകുന്നു. അതേസമയം, ഗുരുതരമായ ആരോഗ്യപ്രശ്നങ്ങളുള്ളവരെ ആശുപത്രികൾക്ക് സമീപം തന്നെ താമസിപ്പിക്കുമെന്നും ബാക്കിയുള്ളവർക്ക് ബദൽ താമസസൗകര്യങ്ങൾ ഒരുക്കുന്നുണ്ടെന്നുമാണ് എൻ.ടി സർക്കാരിന്റെ വിശദീകരണം.
