ഓസ്‌ട്രേലിയയിലേക്കുള്ള സർവീസുകൾ വിപുലീകരിക്കുന്നതിനിടെ എയർ ഇന്ത്യക്കെതിരെ ഗുരുതര പരാതികളുമായി യാത്രക്കാർ രംഗത്ത്. വിമാനങ്ങളിലെ സാങ്കേതിക തകരാറുകൾ, വാഗ്ദാനം ചെയ്ത റീഫണ്ടുകൾ ലഭിക്കുന്നതിലെ കാലതാമസം, സർവീസുകൾ വൈകുന്നതുമൂലം കണക്റ്റിംഗ് ഫ്ലൈറ്റുകൾ നഷ്ടപ്പെടുന്നത് എന്നിവയുൾപ്പെടെയുള്ള വിഷയങ്ങളാണ് യാത്രക്കാർ ഉന്നയിക്കുന്നത്.
ടിക്കറ്റ് റദ്ദാക്കിയതുമായി ബന്ധപ്പെട്ട് കമ്പനി വാഗ്ദാനം ചെയ്ത റീഫണ്ടിനായി ഏഴ് ആഴ്ചയോളം കാത്തിരിക്കേണ്ടി വന്നതായി ഒരു യാത്രക്കാരൻ വെളിപ്പെടുത്തി. സിഡ്നിയിൽ നിന്നുള്ള വിമാനം വൈകിയതിനെത്തുടർന്ന് ലണ്ടനിലേക്കുള്ള കണക്റ്റിംഗ് ഫ്ലൈറ്റ് നഷ്ടമായെന്നും വലിയ തുക അധിക ബാധ്യത വന്നെന്നും മറ്റൊരു യാത്രക്കാരൻ വ്യക്തമാക്കി. എൻജിനിലെ ചോർച്ചയെ തുടർന്നാണ് ഈ വിമാനം വൈകിയതെന്ന് സർക്കാർ ഔദ്യോഗിക രേഖകളും സ്ഥിരീകരിക്കുന്നുണ്ട്. മെൽബണിലേക്കുള്ള സർവീസുകൾക്കായി അത്യാധുനിക സൗകര്യങ്ങളുള്ള വിമാനങ്ങൾ ഒരുക്കുന്നതിനിടയിലും, നിലവിലെ നിരന്തരമായ തടസ്സങ്ങളും യാത്രാക്ലേശങ്ങളും എയർ ഇന്ത്യയുടെ പ്രവർത്തനങ്ങൾക്കെതിരെ ശക്തമായ പ്രതിഷേധത്തിന് ഇടയാക്കിയിട്ടുണ്ട്
