വിക്ടോറിയ : കുട്ടി ചിത്രകാരന്മാരുടെ കലാവൈഭവത്തിന് കാൻവാസൊരുക്കി ART ചിത്രകലാ പ്രദർശനം മെയ് 31 മുതൽ ജൂൺ 2 വരെ നടത്തപ്പെടുമെന്ന് സ്റ്റുഡന്റസ് ആനുവൽ എക്സിബിഷൻ 2024 ഭാരവാഹികൾ അറിയിച്ചു . കുട്ടികളിലെ സർഗ്ഗാത്മകതയെ വളർത്തുന്നതിനും, പ്രോൽസാഹിപ്പിക്കുന്നതിനുമായാണ് ചിത്ര പ്രദർശനം സംഘടിപ്പിക്കുന്നത്.
വിദ്യാർത്ഥികളുടെ നൂറോളം പെയിൻ്റിംഗുകൾ ART ൽ പ്രദർശിപ്പിക്കും.
ചിത്ര പ്രദർശനത്തിന്റെ ഉദ്ഘാടനം മെയ് 31 ന് വൈകിട്ട് 5.30 ന് ബ്രിംബാങ്ക് കൗൺസിലിലെ കൗൺസിലർമാർ.ചേർന്ന് നിർവഹിക്കുമെന്ന് സംഘാടകർ വ്യക്തമാക്കി.GOODWILL HEALTH CARE, ARTNUB-മായി ചേർന്ന് മാനസിക വെല്ലുവിളി നേരിടുന്ന വിദ്യാർത്ഥികളുടെ ചിത്രങ്ങളും ഇതോടൊപ്പം പ്രദർശിപ്പിക്കുന്നതാണ് .
ചിത്രകലയെ ഗൗരവത്തോടെ സമീപിക്കുന്ന കുട്ടികളുടെ പ്രദർശനത്തിന് അസാധാരണമായ ചില തലങ്ങളുണ്ടെന്ന് അണിയറ പ്രവർത്തകർ പറയുന്നു. ചിത്രരചനയുടെ വരും കാലം എങ്ങനെയാണ് എന്ന് നിർവചിക്കുക മാത്രമല്ല പുതിയ തലമുറയിൽ നിന്ന് കാഴ്ചക്കാരന് ഉൾക്കൊള്ളാൻ ഏറെയുണ്ടെന്നും ഈ ഉദ്യമം പറയാതെ പറയുമെന്നും, ബാല്യത്തിന്റെ നിഷ്കളങ്കതയിൽ ചാലിച്ച വർണങ്ങൾ ആസ്വാദക മനസിലും ഉറപ്പായും ഇടം നേടുക തന്നെ ചെയ്യുമെന്നുമാണ് സംഘാടകർ വ്യക്തമാക്കുന്നത്.
