ബ്രിസ്ബെയ്ൻ : ഓസ്ട്രേലിയയിലെ സ്കൂളുകൾ ഈ വർഷവും വർണാഭമായ ‘ബുക്ക് വീക്ക്’ ആഘോഷങ്ങൾക്ക് വേദിയായി. കുട്ടികളിൽ വായനാശീലം വളർത്തുക, പുസ്തകങ്ങളോടുള്ള സ്നേഹം ഊട്ടിയുറപ്പിക്കുക, എഴുതാനുള്ള പ്രേരണ നൽകുക എന്നിവ ലക്ഷ്യമിട്ടാണ് ഈ പരിപാടി സംഘടിപ്പിച്ചത്.
എല്ലാ വർഷവും ഓഗസ്റ്റ് മാസത്തിൽ നടക്കുന്ന ഈ ആഘോഷം ഓസ്ട്രേലിയൻ വിദ്യാഭ്യാസ മേഖലയിലെ ഒരു പ്രധാന സംഭവമാണ്. 1945-ൽ ചിൽഡ്രൻസ് ബുക്ക് കൗൺസിൽ ഓഫ് ഓസ്ട്രേലിയ (CBCA) ആണ് ഈ പരിപാടിക്ക് തുടക്കം കുറിച്ചത്.
ഇഷ്ട കഥാപാത്രങ്ങളുടെ വേഷങ്ങൾ ധരിച്ചാണ് ഇത്തവണയും വിദ്യാർഥികൾ സ്കൂളിലെത്തിയത്. ഹാരി പോട്ടർ, സ്പൈഡർമാൻ, വണ്ടർ വുമൺ തുടങ്ങിയ പ്രശസ്ത കഥാപാത്രങ്ങൾ മുതൽ ഓസ്ട്രേലിയൻ ബാലസാഹിത്യത്തിലെ പോസം മാജിക് പോലുള്ള പുസ്തകങ്ങളിലെ കഥാപാത്രങ്ങൾ വരെ കുട്ടികൾക്ക് കൂട്ടായി എത്തി. രാജകുമാരിമാർ, സൂപ്പർഹീറോകൾ, സാഹസിക കഥകളിലെ നായകന്മാർ എന്നിങ്ങനെ വൈവിധ്യമാർന്ന വേഷങ്ങൾ ധരിച്ച് കുട്ടികൾ സ്കൂൾ അങ്കണം വർണാഭമാക്കി.
പ്രധാന അധ്യാപകരും, അധ്യാപകരും, മറ്റു ജീവനക്കാരും കുട്ടികളോടൊപ്പം ചേർന്ന് അവരുടെ ഇഷ്ട കഥാപാത്രങ്ങളായി വേഷമിട്ട് ഈ ആഘോഷത്തിന്റെ ഭാഗമായി. രക്ഷിതാക്കളും ചടങ്ങിൽ പങ്കെടുത്തു.ഗുഡ് ഷെപ്പേർഡ് സ്കൂളിൽ ആറാം ക്ലാസിൽ പഠിക്കുന്ന എഴുത്തുകാരിയും പരിസ്ഥിതി പ്രവർത്തകയുമായ അനുഗ്രഹ ജോഷി കുഞ്ഞുനാൾ മുതലുള്ള വായനശീലമാണ് തന്നെ എഴുത്തുകാരിയാക്കാൻ സഹായിച്ചത് എന്ന് പറഞ്ഞു. നാല് ഇംഗ്ലിഷ് പുസ്തകങ്ങൾ അനുഗ്രഹ എഴുതിയിട്ടുണ്ട്.
ബുക്ക് വീക്കിന്റെ പ്രാധാന്യം
കുട്ടികളിൽ വായനയുടെ പ്രാധാന്യം വളർത്തുക എന്നതാണ് ബുക്ക് വീക്കിന്റെ പ്രധാന ലക്ഷ്യം. ഓരോ കുട്ടിയും ദിവസവും ഒരു കഥയെങ്കിലും വായിക്കണമെന്നത് പല സ്കൂളുകളിലും നിർബന്ധമാണ്. കുട്ടിക്കാലം മുതലുള്ള വായനാശീലം എഴുത്തുകാരിയും പരിസ്ഥിതി പ്രവർത്തകയുമായി മാറാൻ സഹായിച്ചുവെന്ന് ഗുഡ് ഷെപ്പേർഡ് സ്കൂളിലെ ആറാം ക്ലാസ് വിദ്യാർഥിനിയും നാല് ഇംഗ്ലീഷ് പുസ്തകങ്ങളുടെ രചയിതാവുമായ അനുഗ്രഹ ജോഷി പറഞ്ഞു.
ബുക്ക് വീക്ക് പോലുള്ള ആഘോഷങ്ങൾ കുട്ടികളുടെ ഭാവനയെയും സർഗാത്മകതയെയും പ്രോത്സാഹിപ്പിക്കുന്നു. പുസ്തകങ്ങളുടെ ലോകത്തിലൂടെ സഞ്ചരിക്കാനും പുതിയ കഥാപാത്രങ്ങളെ അറിയാനും ഇത് കുട്ടികളെ സഹായിക്കുന്നു. സ്കൂളും കുട്ടികളും അധ്യാപകരും ഒരു പുസ്തകത്തിലെ കഥാപാത്രങ്ങൾ നിറഞ്ഞ ലോകം പോലെ തോന്നിച്ച ഈ ദിനം എല്ലാവരുടെയും മനസ്സിൽ ഒരു സന്തോഷകരമായ ഓർമയായി.
