കുറഞ്ഞുവരുന്ന ജനനനിരക്കും വർദ്ധിച്ചുവരുന്ന വയോജന ജനസംഖ്യയും കാരണം 2060-കളോടെ ഓസ്ട്രേലിയയിൽ ജനനങ്ങളേക്കാൾ മരണങ്ങളുടെ എണ്ണം കൂടുമെന്നും, ജനസംഖ്യാ വളർച്ച മുന്നോട്ട് കൊണ്ടുപോകാനുള്ള ഏക ആശ്രയമായി കുടിയേറ്റം മാറുമെന്നും പുതിയ ഇന്റർജനറേഷൻ റിപ്പോർട്ട് (IGR). ഒരു ഐ.ജി.ആർ റിപ്പോർട്ടിൽ ഇത്തരമൊരു പ്രവചനം രേഖപ്പെടുത്തുന്നത് ചരിത്രത്തിൽ ആദ്യമായാണ്. ജപ്പാൻ, ദക്ഷിണ കൊറിയ, ജർമ്മനി തുടങ്ങിയ സമ്പദ്വ്യവസ്ഥകൾ ഇതിനകം ഈ അവസ്ഥയിലെത്തിക്കഴിഞ്ഞെങ്കിലും, ഓസ്ട്രേലിയയെ സംബന്ധിച്ചിടത്തോളം ഇത് വലിയൊരു വഴിത്തിരിവാണ്.
ഇത്തരം വെല്ലുവിളികൾക്കിടയിലും മറ്റ് പല രാജ്യങ്ങളെ അപേക്ഷിച്ച് രാജ്യം മികച്ച നിലയിലാണെന്നും ആഭ്യന്തര തൊഴിൽശക്തിക്ക് ആവശ്യമായ പ്രാവീണ്യമുള്ള കുടിയേറ്റം രാജ്യത്തിന് അത്യന്താപേക്ഷിതമാണെന്നും ട്രഷറർ ജിം ചാൽമേഴ്സ് വ്യക്തമാക്കി. ഓസ്ട്രേലിയയിലെ താമസക്കാരുടെ ശരാശരി പ്രായം 38 ആണെന്നിരിക്കെ, പുതുതായി എത്തുന്ന കുടിയേറ്റക്കാരുടെ ശരാശരി പ്രായം 26 ആണ് എന്നത് രാജ്യത്തിന് ഗുണകരമാണെന്ന് റിപ്പോർട്ട് ചൂണ്ടിക്കാട്ടുന്നു.
ഓസ്ട്രേലിയയുടെ ജനസംഖ്യാ വളർച്ച കൂടുതൽ മന്ദഗതിയിലാകുമെങ്കിലും 2065–66 ആകുമ്പോഴേക്കും ജനസംഖ്യ 39.3 ദശലക്ഷത്തിലെത്തുമെന്നാണ് അനുമാനം. ഫെർട്ടിലിറ്റി നിരക്ക് നിലവിലെ 1.48-ൽ നിന്ന് 2065–66 കാലയളവിൽ 1.34 ആയി കുറയും. മുൻപ് 2023-ലെ റിപ്പോർട്ടിൽ 20 വയസ്സിന് താഴെയുള്ളവരുടെ എണ്ണത്തിൽ 28 ശതമാനം വർദ്ധനവ് പ്രവചിച്ചിരുന്നിടത്ത്, പുതിയ കണക്കുകൾ പ്രകാരം 2060-കളുടെ തുടക്കത്തിൽ വെറും 10.4 ശതമാനം വർദ്ധനവ് മാത്രമേ പ്രതീക്ഷിക്കുന്നുള്ളൂ. അതേസമയം, 85 വയസ്സോ അതിൽ കൂടുതലോ പ്രായമുള്ളവരുടെ എണ്ണം അടുത്ത 40 വർഷത്തിനുള്ളിൽ മൂന്നിരട്ടിയായി വർദ്ധിക്കും.
ജനങ്ങളുടെ ആയുർദൈർഘ്യം കൂടുന്നത് രാജ്യത്തിന്റെ മെച്ചപ്പെട്ട പൊതുജനാരോഗ്യ സേവനങ്ങളുടെ തെളിവാണെന്നും സ്വാഗതാർഹമാണെന്നും ജിം ചാൽമേഴ്സ് പറഞ്ഞു. എന്നാൽ, ആശുപത്രികൾ, വയോജന സംരക്ഷണം (ഏജ്ഡ് കെയർ), ഭിന്നശേഷി വിഭാഗങ്ങൾക്കുള്ള പിന്തുണ, മറ്റ് ആരോഗ്യ സേവനങ്ങൾ എന്നിവയ്ക്കുള്ള വർദ്ധിച്ചുവരുന്ന ആവശ്യം രാജ്യത്തിന്റെ സാമ്പത്തിക വ്യവസ്ഥയിൽ വലിയ സമ്മർദ്ദം സൃഷ്ടിക്കും. അടുത്ത നാല് പതിറ്റാണ്ടിനിടെ വർദ്ധിക്കുന്ന അധിക ആരോഗ്യച്ചെലവിന്റെ മൂന്നിലൊന്നും വാർദ്ധക്യജനസംഖ്യ മൂലമായിരിക്കും. ഈ കാലയളവിൽ ഫെഡറൽ സർക്കാരിന്റെ ചെലവുകൾ ജി.ഡി.പിയുടെ 27.7 ശതമാനമായി ഉയരുമെന്നും അനുമാനിക്കുന്നു. അടുത്ത 40 വർഷങ്ങളിൽ ജനസംഖ്യാ വളർച്ചാ നിരക്ക് ശരാശരി 0.9 ശതമാനമായി ചുരുങ്ങുമെന്നും ട്രഷറി വ്യക്തമാക്കുന്നു.
റിപ്പോർട്ടിനെ സംബന്ധിച്ച് സംസാരിക്കവേ, ഇത്തരം ജനസംഖ്യാപരമായ പ്രതിസന്ധികളെ രാഷ്ട്രീയ നേട്ടങ്ങൾക്കായി ഭയപ്പെടുത്തി ചൂഷണം ചെയ്യുന്നവർക്കെതിരെ പോളിൻ ഹാൻസന്റെ പേരെടുത്തു പറയാതെ ചാൽമേഴ്സ് രൂക്ഷമായ വിമർശനം ഉന്നയിച്ചു. നിലവിലെ രാഷ്ട്രീയ സംവിധാനം ഹ്രസ്വകാല നേട്ടങ്ങൾക്ക് മാത്രമാണ് മുൻഗണന നൽകുന്നതെന്നും, ദീർഘകാല വെല്ലുവിളികൾ നേരിടാൻ സർക്കാരുകളുടെ ഭരണ കാലാവധി നീട്ടുന്നത് പരിഗണിക്കാമെന്നും അദ്ദേഹം അഭിപ്രായപ്പെട്ടു. വയോജന ജനസംഖ്യയും ആഗോളതലത്തിലെ മാറ്റങ്ങളും ഉൾക്കൊണ്ട് സമ്പദ്വ്യവസ്ഥയെ മുന്നോട്ട് നയിക്കാൻ പുനരുപയോഗ ഊർജ്ജം, നിർണ്ണായക ധാതുക്കൾ, ആർട്ടിഫിഷ്യൽ ഇന്റലിജൻസ് (AI) തുടങ്ങിയ പുത്തൻ മേഖലകളായിരിക്കും ഓസ്ട്രേലിയയുടെ ഭാവി വളർച്ചയുടെ പ്രധാന സ്രോതസ്സുകളെന്നും ട്രഷറർ കൂട്ടിച്ചേർത്തു.
