ഓസ്ട്രേലിയയിലെ വിഖ്യാതമായ കോസിയാസ്കോ നാഷണൽ പാർക്കിൽ (Kosciuszko National Park) പെറ്റുപെരുകിയ കാട്ടുക്കുതിരകളെ (Brumbies) വെടിവെച്ചുകൊല്ലാനുള്ള ഹെലികോപ്റ്റർ വേട്ട തിങ്കളാഴ്ച മുതൽ പുനരാരംഭിക്കുന്നു. ജനരോഷത്തെ തുടർന്ന് കഴിഞ്ഞ വർഷം നിർത്തിവെച്ച വ്യോമാക്രമണമാണ് ജൂൺ 29 മുതൽ സർക്കാർ വീണ്ടും തുടങ്ങുന്നത്. മൃഗസംരക്ഷണ പ്രവർത്തകരും സർക്കാരും തമ്മിലുള്ള വലിയ തർക്കങ്ങൾക്കാണ് ഇതോടെ വഴിതുറന്നിരിക്കുന്നത്.
നാഷണൽ പാർക്കിലെ അൽപൈൻ പാരിസ്ഥിതിക മേഖലയെ സംരക്ഷിക്കാൻ കുതിരകളുടെ എണ്ണം കുറച്ചേ മതിയാകൂ എന്നാണ് ന്യൂ സൗത്ത് വെയിൽസ് (NSW) സർക്കാരിന്റെ നിലപാട്. കാട്ടുക്കുതിരകൾ ജലാശയങ്ങൾ ചവിട്ടി നശിപ്പിക്കുകയും, അപൂർവയിനം തദ്ദേശീയ ജീവികളുടെ നിലനിൽപ്പിന് ഭീഷണിയാകുകയും ചെയ്യുന്നുവെന്ന് അധികൃതർ ചൂണ്ടിക്കാണിക്കുന്നു. 2027 മധ്യത്തോടെ കുതിരകളുടെ എണ്ണം 3,000 ആയി ചുരുക്കാനാണ് സർക്കാർ ലക്ഷ്യമിടുന്നത്. നിലവിൽ 6,000 മുതൽ 16,000 വരെ കുതിരകൾ ഇവിടെയുണ്ടെന്നാണ് ഔദ്യോഗിക കണക്ക്.
കൃത്യമായ കണക്കെടുപ്പ് നടത്താതെ കുതിരകളെ കൊല്ലരുതെന്ന് ആവശ്യപ്പെട്ട് ‘ബ്രംബി ആക്ഷൻ ഗ്രൂപ്പ്’ രംഗത്തെത്തിയിട്ടുണ്ട്. ഹെലികോപ്റ്ററിൽ നിന്ന് വെടിവെയ്ക്കുന്നത് ക്രൂരമായ വിനോദമാണെന്നും, പകരം ഇവയെ വന്ധ്യംകരിക്കുകയോ മാറ്റിപ്പാർപ്പിക്കുകയോ ചെയ്യണമെന്നാണ് ഇവരുടെ ആവശ്യം. ഓസ്ട്രേലിയയുടെ ചരിത്രത്തോടും പാരമ്പര്യത്തോടും ചേർന്നുനിൽക്കുന്ന ഈ ജീവികളെ സംരക്ഷിക്കണമെന്ന് പ്രതിപക്ഷ നേതാക്കളും ആവശ്യപ്പെടുന്നു.
