പെർത്ത്: ഓസ്ട്രേലിയയിലെ ആദിമനിവാസികളായ അബോർജിനൽ വിഭാഗം ഉപയോഗിച്ചുപോരുന്ന ആരാധനാക്രമത്തിന് ഔദ്യോഗിക അംഗീകാരം നൽകി കാത്തലിക് ബിഷപ്പ്സ് കോൺഫറൻസ്. വെസ്റ്റേൺ ഓസ്ട്രേലിയയിലെ വിദൂര മേഖലയായ ബ്രൂം രൂപതയിൽ 50 വർഷത്തിലേറെയായി ഉപയോഗിക്കുന്ന ആരാധനക്രമത്തിനാണ് ഓസ്ട്രേലിയൻ മെത്രാന്മാരുടെ അംഗീകാരം ലഭിച്ചത്. ആദിവാസി ഭാഷയുടെയും സംസ്കാരത്തിന്റെയും ഘടകങ്ങൾ ഉൾക്കൊള്ളുന്ന ആരാധനക്രമത്തിന് ഇനി വത്തിക്കാന്റെ അംഗീകാരം കൂടി ലഭിക്കാനുള്ള കാത്തിരിപ്പിലാണ് മേഖലയിലെ തദ്ദേശീയ ജനത.
രൂപതയുടെ കീഴിലുള്ള ഒമ്പത് ഇടവകകളിലായി ഏകദേശം 13,000 കത്തോലിക്കരാണ് ബ്രൂമിൽ താമസിക്കുന്നത്.ആരാധനാക്രമത്തിന് അംഗീകാരം നൽകുന്നതുമായ ബന്ധപ്പെട്ട പ്രമേയം ഓസ്ട്രേലിയൻ കാത്തലിക് ബിഷപ്പ്സ് കോൺഫറൻസ് പ്ലീനറി സമ്മേളനം പാസാക്കിയരുന്നു. ഇനി വത്തിക്കാന്റെ ഔദ്യോഗിക അംഗീകാരത്തിനായി കാത്തിരിക്കുകയാണ്.
ബ്രൂമിലെ ലാ ഗ്രാഞ്ച് ഇടവകയിൽ നിന്നുള്ള രണ്ട് മൂപ്പന്മാർ ആരാധനാക്രമത്തിന്റെ അച്ചടിച്ച കോപ്പി ഓസ്ട്രേലിയൻ ബിഷപ്പുമാർക്ക് സമർപ്പിക്കാനും അവരുടെ അനുഭവം പങ്കിടാനും സിഡ്നിയിലേക്കു പോയിരുന്നു. ബിഷപ്പുമാർക്ക് സമർപ്പിച്ച കത്തിൽ, കത്തോലിക്ക പാരമ്പര്യത്തെ ആദിവാസി സംസ്കാരവുമായി മനോഹരമായി സമന്വയിപ്പിക്കുന്ന കുർബാന എന്നാണ് നാഷണൽ അബോർജിനൽ ആൻഡ് ടോറസ് സ്ട്രെയിറ്റ് ഐലൻഡർ കാത്തലിക് കൗൺസിൽ ആരാധനാ ക്രമത്തെ വിശേഷിപ്പിച്ചത്. ‘ഇത് കേവലം ഒരു ആരാധനാക്രമമല്ല, മറിച്ച് നമ്മുടെ വിശ്വാസത്തെ ഭൂമിയുടെ യഥാർത്ഥ സംരക്ഷകരുടെ പൂർവ്വിക ജ്ഞാനവുമായി ബന്ധിപ്പിക്കുന്ന ഒരു പാലമാണെന്നും കൗൺസിൽ പറയുന്നു.
ഒന്നിലധികം അബോർജിനൽ ഭാഷകളിലാണ് ഈ കുർബാന അർപ്പിക്കപ്പെടുന്നത്.അംഗീകാരം അബോർജിനൽ വിഭാഗത്തിന്റെ ചരിത്രത്തിലെ നാഴികക്കല്ലാണെന്ന് ബ്രൂമിലെ ബിഷപ്പ് അഡ്മിനിസ്ട്രേറ്റർ മൈക്കൽ മോറിസി പറഞ്ഞു. ദീർഘകാലത്തെ കാത്തിരിപ്പിന് ശേഷമാണ് ഓസ്ട്രേലിയൻ ബിഷപ്പുമാരുടെ അംഗീകാരം ലഭിക്കുന്നത്. ആരാധനാക്രമം ഇനി വത്തിക്കാനിലെ ദിവ്യാരാധനയ്ക്കായുള്ള ഡിക്കാസ്റ്ററിയിൽ സമർപ്പിക്കും. തുടർന്ന് അന്തിമ തീരുമാനമുണ്ടാകും.
