മെൽബൺ: ഓസ്‌ട്രേലിയയിൽ അടുത്ത രണ്ട് വർഷത്തിനുള്ളിൽ വാടക നിരക്കുകളിൽ 30 ശതമാനം വരെ വർദ്ധനവുണ്ടാകുമെന്ന പ്രചാരണങ്ങളിൽ വ്യക്തത വരുത്തി നാഷണൽ ഓസ്‌ട്രേലിയ ബാങ്ക് (NAB). ഇത് ബാങ്കിന്റെ ഔദ്യോഗിക ഭാവി പ്രവചനമല്ലെന്നും (Forecast), ഒരു നിശ്ചിത സാഹചര്യത്തെ മുൻനിർത്തിയുള്ള കേവല നിഗമനം (Scenario) മാത്രമായിരുന്നുവെന്നും എൻ.എ.ബി അധികൃതർ വ്യക്തമാക്കി.
നെഗറ്റീവ് ഗിയറിംഗ്, ക്യാപിറ്റൽ ഗെയിൻസ് നികുതികളിൽ സർക്കാർ വരുത്തിയ മാറ്റങ്ങൾ രാജ്യത്ത് വാടക കുത്തനെ ഉയരാൻ ഇടയാക്കുമെന്ന പ്രതിപക്ഷത്തിന്റെ ആരോപണങ്ങൾ പ്രധാനമന്ത്രി ആന്റണി ആൽബനീസ് പൂർണ്ണമായും തള്ളി. പുതിയ വീടുകളുടെ നിർമ്മാണം വൻതോതിൽ വർദ്ധിപ്പിച്ച് കൂടുതൽ വാടകക്കാർക്ക് സ്വന്തമായി വീട് വാങ്ങാനുള്ള അവസരമൊരുക്കുകയാണ് സർക്കാരിന്റെ പ്രധാന ലക്ഷ്യമെന്ന് ഫെഡറൽ ട്രഷറർ ജിം ചാൽമേഴ്സ് വ്യക്തമാക്കി.
അതേസമയം, നിലവിൽ തുടരുന്ന ഉയർന്ന വാടക നിരക്കുകൾ സാധാരണക്കാരായ ജനങ്ങളുടെ ജീവിതച്ചെലവിനെ സാരമായി ബാധിക്കുകയും വലിയ സാമ്പത്തിക പ്രതിസന്ധി സൃഷ്ടിക്കുകയും ചെയ്യുന്നുണ്ട്.
