കാൻബറ: ഓസ്ട്രേലിയൻ പാർലമെൻ്റിൽ സന്ദർശനത്തിനെത്തിയ ചാൾസ് രാജാവിനോട് ആക്രോശിച്ച അബോർജിനൽ സെനറ്റർ ലിഡിയ തോർപ്പിന് പിന്തുണയും എതിർപ്പും. ഓസ്ട്രേലിയൻ രാഷ്ട്രതലവനെയും കാമില രാജ്ഞിയെയും പരസ്യമായി തള്ളിപ്പറഞ്ഞ സ്വതന്ത്ര സെനറ്റർ ലിഡിയ തോർപ്പ് രാജിവയ്ക്കണമെന്ന് മന്ത്രിമാർക്കിടയിലും സഭാംഗങ്ങൾക്കിടയിലും ആവശ്യം ഉയരുന്നുണ്ട്. ലിഡിയ തോർപ്പിന്റെ പെരുമാറ്റം അനാദരവുള്ള പ്രവൃത്തിയാണെന്ന് വിശേഷിപ്പിച്ച പ്രതിപക്ഷ നേതാവ് പീറ്റർ ഡട്ടൺ, ഓസ്ട്രേലിയയിലെ ഭരണ സംവിധാനത്തെ പിന്തുണയ്ക്കുന്നില്ലെങ്കിൽ സെനറ്റിൽ നിന്ന് രാജിവയ്ക്കണമെന്നും ആവശ്യപ്പെട്ടു.
‘സംവിധാനത്തിൽ വിശ്വസിക്കാത്ത, എന്നാൽ സിസ്റ്റത്തിൽ നിന്ന് ഒരു വർഷം കാൽ ദശലക്ഷം ഡോളർ സ്വീകരിക്കുന്ന ഒരാൾ രാജിവയ്ക്കണമെന്ന് പാർലമെൻ്റംഗങ്ങളുടെ അടിസ്ഥാന ശമ്പളത്തെ പരാമർശിച്ച് പീറ്റർ ഡട്ടൺ പറഞ്ഞു. രാജാവിൻ്റെ വിജയകരമായ സന്ദർശനത്തിൽ ഈ സംഭവം കരിനിഴൽ വീഴ്ത്തിയെന്നും ഡട്ടൺ പറഞ്ഞു.
കഴിഞ്ഞ ദിവസം രാവിലെ ഓസ്ട്രേലിയൻ പാർലമെൻ്റിൽ ഊഷ്മളമായ വരവേൽപ്പും വിരുന്നുമെല്ലാം കഴിഞ്ഞ് രാജാവിന്റെ പ്രസംഗം പൂർത്തിയായപ്പോഴാണ് സെനറ്റർമാർക്കിടയിൽ നിന്ന് തൊണ്ടപൊട്ടുമാറുച്ചത്തിൽ ലിഡിയ മുദ്രാവാക്യം വിളിച്ചത്. ഇത് അവിടെ കുട്ടിയിരുന്നവരെയാകെ ഞെട്ടിച്ചിരുന്നു.’ഇത് നിങ്ങളുടെ രാജ്യമല്ല, നിങ്ങളെൻ്റെ രാജാവല്ല. ഞങ്ങൾക്ക് ഞങ്ങളുടെ രാജ്യം തിരിച്ചുതരൂ, നിങ്ങൾ കൊള്ളയടിച്ചതെല്ലാം തിരിച്ചുതരൂ…’ എന്നായിരുന്നു ഓസ്ട്രേലിയൻ ആദിമനിവാസികളുടെ
പിന്തുടർച്ചക്കാരിയായ സെനറ്റർ ലിഡിയ തോർപ്പ് മുദ്രാവാക്യം വിളിച്ചത്.രാജാവിനോട് മാത്രമല്ല, രാജാവിനെ കാണാൻ ഒത്തുകൂടിയ നിരവധി ഓസ്ട്രേലിയക്കാരോടും അനാദരവാണ് കാണിച്ചതെന്ന് സാമൂഹിക സേവന മന്ത്രി അമൻഡ റിഷ്യർത്ത് പറഞ്ഞു.
പ്രതിഷേധത്തെ ആദിവാസി സമൂഹത്തിലെ ചില ആക്ടിവിസ്റ്റുകൾ ധീരമെന്ന് പുകഴ്ത്തിയപ്പോൾ മറ്റ് പ്രമുഖ ആദിവാസി നേതാക്കൾ ലജ്ജാകരവും അനാദരവുള്ളതുമാണെന്ന് അപലപിച്ചു. രാജാവിനെയും രാജ്ഞി കാമിലയെയും രാജ്യത്തേക്ക് ഔപചാരികമായി സ്വാഗതം ചെയ്തത് ആദിവാസി മൂപ്പയായ ആന്റി വയലറ്റ് ഷെറിഡൻ ആയിരുന്നു.
പാർലമെന്റ് സംഭവത്തിന് ശേഷം’ സൺഡേ പേപ്പർ എന്ന പ്രതിദ്ധീകരണത്തിൻ്റെ സഹ എഡിറ്ററായ മാറ്റ് ചുൻ സൃഷ്ടിച്ച ചാൾസ് രാജാവിൻ്റെ തല വെട്ടിമാറ്റുന്ന ഒരു കാർട്ടൂൺ ലിഡിയ തോർപ്പ് ഇൻസ്റ്റഗ്രാം സ്റ്റോറിയിൽ പോസ്റ്റ് ചെയ്തു. ഇത് വിവാദമായതിനെതുടർന്ന് അവർ ഡിലീറ്റ് ചെയ്തു. തൻ്റെ അറിവില്ലാതെ അഡ്മിൻ പോസ്റ്റ് ചെയ്യുകയായിരുന്നെന്ന് ലിഡിയ പറഞ്ഞു.
