നിരവധി വിവാദങ്ങളും കടുത്ത അന്വേഷണങ്ങളും നേരിടുമ്പോഴും ആഗോള കൺസൾട്ടൻസി സ്ഥാപനമായ കെപിഎംജി (KPMG) ഓസ്ട്രേലിയൻ ഫെഡറൽ സർക്കാരിൽ നിന്നുള്ള കോടിക്കണക്കിന് ഡോളറിന്റെ കരാറുകൾ നിലനിർത്തുന്നതായി പുതിയ റിപ്പോർട്ട്. ഓസ്ട്രേലിയൻ ഫെഡറൽ സർക്കാരുമായി നിലവിൽ 653 മില്യൺ ഡോളർ (ഏകദേശം 5,400 കോടിയിലധികം ഇന്ത്യൻ രൂപ) മൂല്യമുള്ള 297 സജീവ കരാറുകളാണ് കമ്പനിക്കുള്ളത്.
പുതിയ ബിഡ്ഡുകൾക്ക് താൽക്കാലിക വിലക്ക്
പുതിയ കോമൺവെൽത്ത് കരാറുകളിൽ പങ്കെടുക്കുന്നതിൽ നിന്നും മൂന്ന് മാസത്തേക്ക് മാറിനിൽക്കാൻ കെപിഎംജി സമ്മതിച്ചിട്ടുണ്ട്.എന്നാൽ നിലവിലുള്ള 297 കരാറുകളെയും അത് വഴി ലഭിക്കുന്ന ഭീമമായ തുകയെയും ഇത് ബാധിക്കില്ല.
വിവാദങ്ങളും അന്വേഷണങ്ങളും
ഓഡിറ്റർമാർ തങ്ങളുടെ ക്ലയന്റുകളുടെ രഹസ്യ വിവരങ്ങൾ ചോർത്തി പുതിയ ബിസിനസ്സ് നേടാൻ ശ്രമിച്ചു എന്നതുൾപ്പെടെയുള്ള ഗുരുതരമായ ആരോപണങ്ങളാണ് കമ്പനിക്കെതിരെ ഉയർന്നിട്ടുള്ളത്.ഇതിനെത്തുടർന്ന് ചീഫ് എക്സിക്യൂട്ടീവ് ആൻഡ്രൂ യേറ്റ്സ് ഉൾപ്പെടെയുള്ള പല മുതിർന്ന ഉദ്യോഗസ്ഥർക്കും സ്ഥാനം ഒഴിഞ്ഞു പോകേണ്ടി വന്നു.ഈ വിവരങ്ങൾ പുറത്തുവിട്ട വിസില്ബ്ലോവറുടെ പരാതി കൈകാര്യം ചെയ്ത മുൻ ചീഫ് ഓപ്പറേറ്റിംഗ് ഓഫീസർ എലീൻ ഹോഗെറ്റ് ഉൾപ്പെടെ മൂന്ന് ഓഡിറ്റർമാർക്കെതിരെ ഓസ്ട്രേലിയൻ സെക്യൂരിറ്റീസ് ആൻഡ് ഇൻവെസ്റ്റ്മെന്റ് കമ്മീഷൻ (ASIC) ഔദ്യോഗിക അന്വേഷണം ആരംഭിച്ചിട്ടുണ്ട്.
ജനരോഷവും രാഷ്ട്രീയ പ്രതികരണങ്ങളും
ഈ വർഷം മാർച്ച് മാസത്തിൽ വിവാദങ്ങൾ പൊതുസമൂഹത്തിൽ ചർച്ചയായതിന് ശേഷവും വിവിധ സർക്കാർ വകുപ്പുകൾ കെപിഎംജിയുമായി 24 മില്യൺ ഡോളർ വിലമതിക്കുന്ന 31 പുതിയ കരാറുകളിൽ ഒപ്പുവെച്ചതായി പാർലമെന്ററി ലൈബ്രറി രേഖകൾ വ്യക്തമാക്കുന്നു.ഇത്രയും വലിയ അഴിമതി ആരോപണങ്ങൾ നേരിടുന്ന ഒരു കമ്പനിക്ക് വീണ്ടും ദശലക്ഷക്കണക്കിന് ഡോളറിന്റെ കരാറുകൾ നൽകുന്നതിനെതിരെ ഗ്രീൻസ് പബ്ലിക് സർവീസ് വക്താവ് സെനറ്റർ ബാർബറ പോക്കോക്ക് ശക്തമായി പ്രതികരിച്ചു.ആരോപണങ്ങൾ നിലനിൽക്കെ തന്നെ ഒരു കെപിഎംജി പങ്കാളിയെ സർക്കാർ ഉപദേശക സമിതിയായ ‘ബോർഡ് ഓഫ് ടാക്സേഷൻ’ തലവനായി നിയമിച്ചതും വലിയ വിമർശനങ്ങൾക്ക് വഴിവെച്ചിട്ടുണ്ട്.
കൺസൾട്ടൻസി സ്ഥാപനങ്ങൾ സ്വന്തം താല്പര്യങ്ങൾക്കനുസരിച്ചാണ് പ്രവർത്തിക്കുന്നതെന്നും, ഇത്തരം വൻകിട കമ്പനികളെ കൃത്യമായ നിയമങ്ങളിലൂടെ നിയന്ത്രിക്കാൻ സർക്കാർ തയ്യാറാകണമെന്നുമാണ് നിലവിൽ ഉയരുന്ന പ്രധാന ആവശ്യം. മുൻപ് 2023-ൽ സമാനമായ രീതിയിൽ മറ്റൊരു പ്രമുഖ സ്ഥാപനമായ പിഡബ്ല്യുസി (PwC) നികുതി വെട്ടിപ്പിനായി ഔദ്യോഗിക വിവരങ്ങൾ ദുരുപയോഗം ചെയ്തതും വലിയ വാർത്തയായിരുന്നു.
