മെൽബൺ: സെന്റ് തോമസ് മെൽബൺ സീറോ മലബാർ രൂപതയുടെ നിയുക്ത മെത്രാൻ ഫാദർ ജോൺ പനന്തോട്ടത്തിലിന്റെ മെത്രാഭിഷേക കർമ്മങ്ങളിൽ മുഖ്യകാർമ്മികത്വം വഹിക്കാനായി, സീറോ മലബാർ സഭയുടെ മേജർ ആർച്ച് ബിഷപ്പ് അഭിവന്ദ്യ കർദ്ദിനാൾ ജോർജ്ജ് ആലഞ്ചേരി പിതാവ് മെൽബണിൽ എത്തി ചേർന്നു. മെൽബൺ രൂപത മെത്രാൻ ബിഷപ്പ് ബോസ്കോ പുത്തൂർ, നിയുക്ത മെത്രാൻ ഫാദർ ജോൺ പനന്തോട്ടത്തിൽ, വികാരി ജനറാൾ മോൺ. ഫ്രാൻസിസ്‌ കോലഞ്ചേരി, ചാൻസിലർ ഫാദർ സിജീഷ്‌ പുല്ലങ്കുന്നേൽ, പ്രൊകുറേറ്റർ ഡോ. ജോൺസൺ ജോർജ്ജ്, പാസ്റ്ററൽ കൗൺസിൽ സെക്രട്ടറി ജോബി ഫിലിപ്പ്‌, യൂത്ത് അപ്പൊസ്റ്റലേറ്റ്‌ ഡയറക്‌ടർ സോജിൻ സെബാസ്റ്റ്യൻ, ഫാദർ എബ്രഹാം കഴുന്നടിയിൽ, സി.എം.ഐ സഭയുടെ കോട്ടയം പ്രൊവിൻഷ്യാൾ ഫാദർ എബ്രഹാം വെട്ടിയാങ്കൽ സി.എം.ഐ, ഫാദർ വിൻസന്റ്‌ മഠത്തിപ്പറമ്പിൽ സി.എം.ഐ, പാസ്റ്ററൽ കൗൺസിൽ പ്രതിനിധികൾ, മെൽബൺ രൂപത വൈദിക വിദ്യാർത്ഥികൾ, എസ്‌. എം. വൈ. എം. പ്രതിനിധികൾ എന്നിവർ ചേർന്ന് മേജർ ആർച്ച് ബിഷപ്പിനെ മെൽബൺ എയർപ്പോർട്ടിൽ സ്വീകരിച്ചു. വലിയ പിതാവിനൊപ്പം മെൽബണിൽ എത്തിയ മേജർ എപ്പിസ്കോപ്പൽ ചാൻസിലർ റവ. ഡോ. എബ്രഹാം കാവിൽപുരയിടത്തിലിനും ഹൃദ്യമായ സ്വീകരണം നല്‌കി.
സെന്റ് തോമസ് സീറോ മലബാർ മെൽബൺ രൂപതയുടെ രണ്ടാമത്തെ മെത്രാനായി നിയുക്തനായ ഫാദർ ജോൺ പനന്തോട്ടത്തിലിന്റെ സ്ഥാനാരോഹണവും ബിഷപ്പ് ബോസ്കോ പുത്തൂരിനുള്ള യാത്രയയപ്പും മെയ് 31 (ബുധനാഴ്ച) വൈകീട്ട് 5 മണിക്ക് മെൽബണിനടുത്തുള്ള ക്യാമ്പെൽഫീൽഡ് ഔവർ ലേഡീ ഗാർഡിയൻ ഓഫ് പ്ലാന്റ്‌സ് കാൽദിയൻ കാത്തലിക് ദേവാലയത്തിൽ വച്ച് നടക്കും. സ്ഥാനാരോഹണ കർമ്മങ്ങളിൽ സീറോ മലബാർ സഭയുടെ മേജർ ആർച്ച് ബിഷപ്പ് അഭിവന്ദ്യ കർദ്ദിനാൾ മാർ ജോർജ്ജ് ആലഞ്ചേരി മുഖ്യകാർമ്മികത്വം വഹിക്കും. ഓസ്ട്രേലിയയിലെ അപ്പസ്‌തോലിക് നൂൺഷ്യോ ആർച്ച് ബിഷപ്പ് ചാൾസ് ബാൽവോ, സീറോ മലബാർ സഭയുടെ മറ്റു രൂപതകളിൽ നിന്നുള്ള പിതാക്കന്മാർ, ഓഷ്യാനിയയിലെ വിവിധ രൂപതകളിൽ നിന്നുള്ള ബിഷപ്പുമാർ, മെൽബൺ രൂപതയുടെ വിവിധ ഇടവകകളിൽ നിന്നുംമിഷനുകളിൽ നിന്നുമുള്ള വൈദികരും അത്മായ പ്രതിനിധികളും ചടങ്ങുകളിൽ പങ്കെടുക്കും.
