പെർത്ത്: ഓക്കസ് സുരക്ഷാ കരാറിലൂടെ പടിഞ്ഞാറൻ ഓസ്‌ട്രേലിയ വൻ സാമ്പത്തിക നേട്ടത്തിലേക്ക് കുതിക്കാൻ ഒരുങ്ങുന്നു. തലമുറകളോളം നീണ്ടുനിൽക്കുന്ന അന്തർവാഹിനി അനുബന്ധ നിർമ്മാണ-പരിപാലന ജോലികളും ശതകോടിക്കണക്കിന് ഡോളറിന്റെ പ്രതിരോധ നിക്ഷേപവുമാണ് സംസ്ഥാനത്തേക്ക് എത്തുന്നത്. അടുത്ത രണ്ട് പതിറ്റാണ്ടുകളിലായി പടിഞ്ഞാറൻ ഓസ്‌ട്രേലിയയിൽ പതിനായിരത്തോളം നേരിട്ടുള്ള തൊഴിലവസരങ്ങൾ സൃഷ്ടിക്കപ്പെടുമെന്നാണ് വിലയിരുത്തപ്പെടുന്നത്.
ഇതിന്റെ ഭാഗമായി ഹെൻഡേഴ്സൺ ഡിഫൻസ് പ്രിസിങ്ക്റ്റിൽ പ്രാഥമിക ഘട്ടത്തിൽ 12 ബില്യൺ ഓസ്‌ട്രേലിയൻ ഡോളറിന്റെ വികസന പദ്ധതികൾക്ക് തുടക്കമായിട്ടുണ്ട്. കൂടാതെ, 2027 മുതൽ അമേരിക്ക, ബ്രിട്ടൻ എന്നീ രാജ്യങ്ങളുടെ ആണവ അന്തർവാഹിനികൾ എച്ച്.എം.എ.എസ് സ്റ്റെർലിംഗ് നാവിക താവളം കേന്ദ്രീകരിച്ച് പട്രോളിംഗും സർവീസുകളും നടത്തും. വരാനിരിക്കുന്ന വൻ സാധ്യതകൾ മുന്നിൽക്കണ്ട് എഞ്ചിനീയറിംഗ്, മാനുഫാക്ചറിംഗ്, സ്പെഷ്യലിസ്റ്റ് പ്രതിരോധ മേഖലകളിലെ പ്രാദേശിക വ്യവസായ സ്ഥാപനങ്ങൾ ഇതിനകം തന്നെ പ്രവർത്തന സജ്ജമായിക്കഴിഞ്ഞു.
വൻകിട പ്രതിരോധ പദ്ധതികളിലെ ആകെ ചെലവിന്റെ 70 ശതമാനത്തോളം വരുന്നത് ദീർഘകാലാടിസ്ഥാനത്തിലുള്ള അറ്റകുറ്റപ്പണികൾ, നവീകരണങ്ങൾ, അനുബന്ധ സേവനങ്ങൾ എന്നിവയ്ക്കായാണെന്ന് എ.എസ്.സി ചീഫ് എക്സിക്യൂട്ടീവ് അലക്സ് വാൽഷ് വ്യക്തമാക്കി. വരും ദശകങ്ങളിൽ ഓസ്‌ട്രേലിയൻ യുവാക്കൾക്ക് അപ്രന്റീസ്ഷിപ്പുകൾ, വിദഗ്ദ്ധ തൊഴിലുകൾ, ഉന്നത എഞ്ചിനീയറിംഗ് കരിയറുകൾ എന്നിവ ഉറപ്പാക്കാൻ ഈ പദ്ധതി വഴി സാധിക്കും. രാജ്യസുരക്ഷ ശക്തിപ്പെടുത്തുന്നതിനൊപ്പം ദീർഘകാല തൊഴിലവസരങ്ങൾ സൃഷ്ടിക്കപ്പെടുമെന്നതിനാൽ ഓക്കസിലെ ഈ വൻ നിക്ഷേപം രാജ്യത്തിന് വലിയ മുതൽക്കൂട്ടാകുമോ എന്ന ചർച്ചകളും ഇതോടെ സജീവമായിട്ടുണ്ട്.
