മാൾട്ട: മാൾട്ടയ്ക്കും ഗോസോയ്ക്കുമിടയിലെ ഗോസോ ചാനലിൽ, കടലിനടിയിൽ രണ്ടാം ലോകമഹായുദ്ധകാലത്തെ പൊട്ടാത്ത ബോംബ് കണ്ടെത്തി. സിർകേവയ്ക്ക് സമീപം കടലിനടിയിലെ ഉപേക്ഷിക്കപ്പെട്ട മത്സ്യബന്ധന വല നീക്കം ചെയ്യുന്നതിനിടെയാണ് ഡൈവർമാരുടെ ശ്രദ്ധയിൽ ബോംബ് പെട്ടത്.
തീരത്തുനിന്ന് ഏകദേശം 200 മീറ്റർ അകലെയും 37 മീറ്ററോളം ആഴത്തിലുമാണ് ബോംബ് കണ്ടെത്തിയത്. ഏകദേശം 80 മീറ്റർ നീളമുള്ള ഉപേക്ഷിക്കപ്പെട്ട മത്സ്യബന്ധന വലയിൽ കുടുങ്ങിക്കിടക്കുകയായിരുന്നു ഇത്.
പരിസ്ഥിതി സംഘടനയായ Coast Is Clear-ന്റെ ഡൈവർമാരാണ് വല നീക്കം ചെയ്യുന്നതിനിടെ ബോംബ് കണ്ടെത്തിയത്. വല നീക്കം ചെയ്യാൻ ശ്രമിക്കുന്നതിനിടെയാണ് ബോംബ് ശ്രദ്ധയിൽപ്പെട്ടതെന്ന് സംഘടനയുടെ സ്ഥാപകൻ മാർക്ക് ഗാലിയ പെയ്‌സ് പറഞ്ഞു.
ബോംബ് കണ്ടെത്തിയ ഉടൻ തന്നെ ഡൈവർമാർ മാൾട്ട സായുധസേനയായ AFM-നെ വിവരം അറിയിച്ചു. ഗോസോ ചാനലിലെ പ്രധാന ഫെറി പാതയ്ക്ക് താഴെയായാണ് ബോംബ് കണ്ടെത്തിയതെന്നതിനാൽ, അതിന്റെ സ്ഥാനം കൃത്യമായി പരിശോധിച്ച് സുരക്ഷിതമായി നീക്കം ചെയ്യാനുള്ള നടപടികൾ അധികൃതർ സ്വീകരിക്കും.ഏകദേശം 1.5 മീറ്റർ നീളമുള്ളതാണ് ബോംബ് എന്നാണ് പ്രാഥമിക വിവരം. ഇത് ജർമൻ നിർമിതമാണോ ബ്രിട്ടീഷ് നിർമിതമാണോ എന്നത് ഇതുവരെ സ്ഥിരീകരിച്ചിട്ടില്ല.
രണ്ടാം ലോകമഹായുദ്ധകാലത്ത് മാൾട്ടയിൽ നിരവധി ബോംബാക്രമണങ്ങൾ നടന്നിരുന്നു. അതിനാൽ, പതിറ്റാണ്ടുകൾക്ക് ശേഷവും യുദ്ധകാല അവശിഷ്ടങ്ങൾ കടലിനടിയിൽ കണ്ടെത്തുന്നത് അപൂർവമല്ല.മാർസാക്‌സ്ലോക്ക് തീരത്ത് നേരത്തെ യുദ്ധവിമാനങ്ങളുടെ വെടിയുണ്ടകൾ കണ്ടെത്തിയിട്ടുണ്ടെങ്കിലും, ഇത്തരത്തിൽ ഒരു ബോംബ് കണ്ടെത്തുന്നത് ശ്രദ്ധേയമായ സംഭവമാണെന്ന് അധികൃതർ അറിയിച്ചു.
