മിൽഡുറ, ഓസ്ട്രേലിയ: മസാജിനിടെ രണ്ട് സ്ത്രീകളെ ലൈംഗികമായി ആക്രമിച്ച കേസിൽ ട്രെയിനി മസാജ് തെറാപ്പിസ്റ്റിന് അഞ്ച് മാസം തടവ് ശിക്ഷ. ഓസ്ട്രേലിയയിലെ വിക്ടോറിയ സംസ്ഥാനത്തെ മിൽഡുറയിലാണ് സംഭവം.33കാരനായ ടോമി മാത്യുവിനെയാണ് കേസിൽ കോടതി ശിക്ഷിച്ചത്. 2025 മാർച്ചിലും ഏപ്രിലിലുമാണ് രണ്ട് വ്യത്യസ്ത ഉപഭോക്താക്കൾക്ക് നേരെ അതിക്രമം നടന്നത്.
2025 മാർച്ച് 13ന് 45 മിനിറ്റ് ഓയിൽ മസാജിനായി എത്തിയ സ്ത്രീയെ മസാജ് ചെയ്യുന്നതിനിടെ ടവലിനടിയിലൂടെ സ്വകാര്യ ഭാഗത്ത് സ്പർശിച്ചതായാണ് കോടതിയിൽ തെളിഞ്ഞത്. സ്ത്രീ എതിർപ്പ് അറിയിച്ചിട്ടും സമാനമായ രീതിയിൽ വീണ്ടും സ്പർശിച്ചതായും പ്രോസിക്യൂഷൻ കോടതിയെ അറിയിച്ചു.തുടർന്ന് ഏപ്രിൽ 5ന് മറ്റൊരു സ്ത്രീ കഴുത്തിന് മസാജ് ചെയ്യുന്നതിനിടെ സമാനമായ രീതിയിൽ ടവലിനടിയിലൂടെ ശരീരത്തിൽ സ്പർശിച്ചതായും കോടതിയിൽ ആരോപിക്കപ്പെട്ടു.സംഭവങ്ങൾക്ക് പിന്നാലെ ഇരുവരും പൊലീസിൽ പരാതി നൽകി. മസാജ് തെറാപ്പിസ്റ്റിന് ഔദ്യോഗിക യോഗ്യത ഉണ്ടായിരുന്നില്ലെന്നും അദ്ദേഹം പരിശീലനത്തിലായിരുന്നുവെന്നും കോടതി പരിഗണിച്ചു.
സ്പർശനം അബദ്ധത്തിൽ സംഭവിച്ചതാണെന്നും ലൈംഗിക ഉദ്ദേശ്യമുണ്ടായിരുന്നില്ലെന്നും പ്രതിഭാഗം വാദിച്ചെങ്കിലും, സംഭവങ്ങളുടെ സ്വഭാവവും സാഹചര്യങ്ങളും കണക്കിലെടുത്ത് ഇത് അബദ്ധമായി കണക്കാക്കാനാകില്ലെന്ന് കോടതി വിലയിരുത്തി.സംഭവങ്ങൾ ഇരകളിൽ മാനസികമായി വലിയ ആഘാതമുണ്ടാക്കിയതായും കോടതി ചൂണ്ടിക്കാട്ടി. ഒരാൾക്ക് സംഭവത്തിന് ശേഷം ഉത്കണ്ഠയും ഫ്ലാഷ്ബാക്കുകളും ഉണ്ടായതായി കോടതിയെ അറിയിച്ചു. മറ്റൊരാൾക്കും പിന്നീട് വ്യക്തിബന്ധങ്ങളിൽ അസ്വസ്ഥത അനുഭവപ്പെട്ടതായി മൊഴി നൽകി.
മസാജ് തെറാപ്പിസ്റ്റും ഉപഭോക്താക്കളും തമ്മിലുള്ള വിശ്വാസബന്ധം പ്രതി ദുരുപയോഗം ചെയ്തതായി മജിസ്ട്രേറ്റ് ഗ്രെഗ് തോമസ് നിരീക്ഷിച്ചു. കുറ്റത്തിന്റെ ഗൗരവവും വിശ്വാസലംഘനവും പരിഗണിച്ചാണ് തടവ് ശിക്ഷ വിധിച്ചത്.
ടോമി മാത്യുവിന് അഞ്ച് മാസം തടവ് ശിക്ഷയാണ് കോടതി വിധിച്ചത്. സംഭവങ്ങൾക്ക് ശേഷം അദ്ദേഹം മസാജ് മേഖലയിൽ ജോലി ചെയ്യുന്നത് അവസാനിപ്പിച്ചതായും കോടതി നടപടികളിൽ വ്യക്തമായി.
