ബെയ്ജിങ്: അമ്യൂസ്മെന്റ് പാർക്കിലെ പെൻഡുലം റൈഡ് നിശ്ചലമായതിനെ തുടർന്ന് പത്ത് മിനിട്ടോളം തല കീഴായി തൂങ്ങിക്കിടന്ന് വിനോദസഞ്ചാരികൾ. ചൈനയിലെ അൻഹുയി പ്രവിശ്യയിലെ ഫുയാങ് നഗരത്തിലെ ഒരു അമ്യൂസ്മെന്റ് പാർക്കിലാണ് സംഭവം. പെൻഡുലം റൈഡ് തകരാറിലായതാണ് നിശ്ചലമാകാൻ കാരണം. സംഭവത്തിന്റെ വീഡിയോ സാമൂഹിക മാധ്യമങ്ങളിൽ പ്രചരിക്കുന്നുണ്ട്.
ഭീമൻ പെൻഡുലം റൈഡ് പാർക്കിലെ ജീവനക്കാർ ശരിയാക്കാൻ ശ്രമിച്ചെങ്കിലും പരാജയപ്പെട്ടു. കൺട്രോൾ പാനൽ പുനരാരംഭിക്കാനും സാധിച്ചില്ല. അനുവദിച്ചതിനേക്കാൾ അധികമാളുകൾ റൈഡിൽ കയറിയതാണ് നിശ്ചലമാകാൻ കാരണമെന്ന് പാർക്ക് അധികൃതർ പറഞ്ഞു. അപകടത്തിൽപെട്ട വിനോദസഞ്ചാരികൾക്ക് ടിക്കറ്റ് ചാർജ് തിരിച്ചുനൽകിയിട്ടുണ്ട്. പരുക്കേറ്റവർക്കും ആരോഗ്യബുദ്ധിമുട്ടുകൾ അനുഭവപ്പെട്ടവർക്കും ചികിത്സാ സഹായം നൽകുകയും ചെയ്തിട്ടുണ്ടെന്നും പാർക്ക് അധികൃതർ അറിയിച്ചു.
STORY HIGHLIGHTS: pendulum ride at the amusement park has broken and Tourists hanging upside down in china
