മാൾട്ട: അനധികൃത കുടിയേറ്റവും മനുഷ്യക്കടത്തുമായി ബന്ധപ്പെട്ട കേസുകൾ ലക്ഷ്യമിട്ട് മാൾട്ടയിൽ നടത്തിയ പ്രത്യേക പരിശോധനയിൽ 57 പേരെ അറസ്റ്റ് ചെയ്തു. മാർസ, ഹംറൂൺ, പൗള എന്നീ പ്രദേശങ്ങളിലായിരുന്നു ഏകോപിത നടപടി.
മാൾട്ട ആഭ്യന്തരകാര്യ മന്ത്രി ഗ്ലെൻ ബെഡിംഗ്ഫീൽഡാണ് അറസ്റ്റുകൾ സംബന്ധിച്ച വിവരം പുറത്തുവിട്ടത്. മാൾട്ട പൊലീസ് സേനയുടെ ഇമിഗ്രേഷൻ പൊലീസും ഡിറ്റൻഷൻ സർവീസസ് ഡിപ്പാർട്ട്മെന്റും ചേർന്നുള്ള ഏകോപിത അന്വേഷണത്തിനൊടുവിലാണ് നടപടി.
അറസ്റ്റിലായവരിൽ ഏറ്റവും കൂടുതൽ പേർ മാർസയിൽ നിന്നാണ്. ഇവിടെ 35 പേരെ കസ്റ്റഡിയിലെടുത്തു. ഹംറൂണിൽ 17 പേരെയും പൗളയിൽ 5 പേരെയും അറസ്റ്റ് ചെയ്തു.
അറസ്റ്റിലായവർ തെക്കേ അമേരിക്ക, ആഫ്രിക്ക, ഏഷ്യ എന്നിവിടങ്ങളിലെ വിവിധ രാജ്യങ്ങളിൽ നിന്നുള്ളവരാണെന്നാണ് അധികൃതർ വ്യക്തമാക്കിയത്.
അനധികൃത കുടിയേറ്റം നിയന്ത്രിക്കുന്നതിനൊപ്പം മനുഷ്യക്കടത്ത് ശൃംഖലകളുമായി ബന്ധപ്പെട്ട സാധ്യതയുള്ള കേസുകൾ കണ്ടെത്തുന്നതിനുള്ള മാൾട്ടീസ് അധികൃതരുടെ തുടർച്ചയായ നടപടികളുടെ ഭാഗമായാണ് ഈ ഓപ്പറേഷൻ നടത്തിയതെന്ന് മന്ത്രി പറഞ്ഞു.
അതേസമയം, അറസ്റ്റിലായ ഓരോ വ്യക്തിയുടെയും കേസുമായി ബന്ധപ്പെട്ട കൂടുതൽ വിവരങ്ങളോ അവർക്കെതിരെ കുറ്റം ചുമത്തുമോയെന്ന കാര്യത്തിലോ അധികൃതർ ഇതുവരെ വിശദീകരണം നൽകിയിട്ടില്ല.
