ക്വീൻസ്ലാൻഡിലെ ബ്രൂസ് ഹൈവേയിൽ വെടിവെപ്പ് റിപ്പോർട്ട് ചെയ്തതിനെ തുടർന്ന് അടിയന്തരാവസ്ഥ പ്രഖ്യാപിച്ചു.മെയ് 9, വെള്ളിയാഴ്ച ഉച്ചയ്ക്ക് 12:15 ഓടെ, കോൾസ് ക്രീക്കിലെ മഹർ റോഡിന് സമീപം വെടിയുണ്ടകൾ പൊട്ടിയതായി റിപ്പോർട്ടുകൾ ലഭിച്ചു. ഇതിനെ തുടർന്നാണ് പൊലീസ് അടിയന്തരാവസ്ഥ പ്രഖ്യാപിച്ചത്.
മഹർ റോഡും ബ്രൂസ് ഹൈവേയുടെ ഇരുഭാഗങ്ങളും ഉൾപ്പെടുന്ന പ്രദേശത്ത് പൊലീസ് നിരോധനമേഖല പ്രഖ്യാപിച്ചു. പ്രദേശവാസികളെ വീടുകളിൽ തന്നെ തുടരാൻ നിർദ്ദേശിക്കുകയും പൊതുജനങ്ങളെയും വാഹനങ്ങളെയും അതിർത്തിയിൽ നിന്ന് വിട്ടുനിൽക്കാൻ നിർദേശിക്കുകയും ചെയ്തു.
പ്രാഥമിക അന്വേഷണത്തിൽ, സമീപത്തെ സ്വകാര്യ ഭൂമിയിൽ താമസിക്കുന്ന ചിലർ പരിശീലനം നടത്തുകയായിരുന്നു എന്നതാണു കണ്ടെത്തിയത്. ഇത് തെറ്റിദ്ധരിപ്പിച്ച് വെടിവെപ്പ് സംഭവിച്ചതായി കരുതപ്പെട്ടതായി പൊലീസ് അറിയിച്ചു. ഇതോടെ, സൈനിക വാഹനങ്ങൾ ഉപയോഗിച്ച് ഹൈവേയുടെ ഭാഗങ്ങൾ തടയുകയും, പ്രത്യേക പൊലീസ് വിഭാഗങ്ങൾ സ്ഥലത്തെത്തുകയും ചെയ്തു.
ഇൻസിഡന്റ് മൂലം രണ്ട് മണിക്കൂറോളം ഗതാഗതക്കുരുക്ക് അനുഭവപ്പെട്ടു. തടസ്സം ഒഴിവാക്കാൻ, ദക്ഷിണഭാഗത്തേക്ക് പോകുന്ന വാഹനങ്ങൾ ട്രാവസ്റ്റൺ ടേൺ-ഓഫിൽ നിന്നും തിരിച്ചുവിടുകയും, വടക്കേ ഭാഗത്തേക്ക് പോകുന്നവയെ ഫെഡറൽ എക്സിറ്റിൽ നിന്നും തിരിച്ചുവിടുകയും ചെയ്തു.
ഇതുവരെ പരിക്കുകൾ റിപ്പോർട്ട് ചെയ്തിട്ടില്ല. പോലീസ് സംഭവസ്ഥലത്ത് അന്വേഷണം തുടരുകയാണ്.
