ഓറഞ്ച്, ഓസ്ട്രേലിയ: പ്രവാസി മലയാളികൾക്കിടയിൽ ഓണത്തിന്റെ ഐശ്വര്യം നിറച്ച്, ഓസ്ട്രേലിയയിലെ ഓറഞ്ചിൽ ഓറഞ്ച് എക്സ്പ്ലോർ ഓഫ് റോഡ് ക്ലബ്ബിന്റെ നേതൃത്വത്തിൽ വർണ്ണാഭമായ ഓണാഘോഷം സംഘടിപ്പിച്ചു. ഓഗസ്റ്റ് 8-ന് നടന്ന ചടങ്ങിൽ ക്ലബ്ബ് അംഗങ്ങളും കുടുംബാംഗങ്ങളും പങ്കെടുത്തു.
എഴുത്തുകാരനും ക്ലബ്ബ് പ്രസിഡന്റുമായ ശ്രീ. സിജു ജേക്കബ് ഓണാഘോഷം ഔദ്യോഗികമായി ഉദ്ഘാടനം ചെയ്തു. പ്രവാസ ലോകത്ത് ഓണത്തിന്റെ പ്രസക്തി, കൂട്ടായ്മകളുടെ പ്രാധാന്യം, മാറുന്ന മലയാളികളുടെ സാമൂഹിക കാഴ്ചപ്പാടുകൾ തുടങ്ങിയ വിഷയങ്ങളെക്കുറിച്ച് തുടർന്ന് ചർച്ചകളും നടന്നു.
കേരളത്തനിമ വിളിച്ചോതുന്ന വേഷവിധാനങ്ങളോടെയാണ് കുട്ടികളും മുതിർന്നവരും ആഘോഷത്തിനെത്തിയത്. ഇത് ചടങ്ങിന് കൂടുതൽ മാറ്റുകൂട്ടി. ഓണത്തിന്റെ ആവേശം നിറച്ച് കുട്ടികൾക്കും മുതിർന്നവർക്കുമായി വിവിധ കലാകായിക മത്സരങ്ങളും വടംവലിയും സംഘടിപ്പിച്ചു. വിജയികൾക്ക് സമ്മാനങ്ങൾ വിതരണം ചെയ്തു.
പരിപാടിയിൽ സംസാരിച്ച ക്ലബ്ബ് സെക്രട്ടറി നെൽസൺ, ഓഫ് റോഡിങ് പോലുള്ള വിനോദങ്ങളുടെ പ്രാധാന്യത്തെക്കുറിച്ചും പുതിയ തലമുറയ്ക്ക് അതിന്റെ അറിവുകൾ പകർന്നു നൽകേണ്ടതിന്റെ ആവശ്യകതയെക്കുറിച്ചും വിശദീകരിച്ചു.
ക്ലബ്ബ് അംഗങ്ങളായ ജിബിൻ, ജോബി സ് കുടുസ്കുട്ടൻ, ഷിന്റൺ, രാഹുൽ, എഡ്വിൻ, അഖിൽ, ബിജു എന്നിവർ പരിപാടികൾക്ക് നേതൃത്വം നൽകി.
മൺമറഞ്ഞ് പോകുന്ന കേരളീയ സംസ്കാരത്തെ നിലനിർത്തുന്നതിൽ ഇത്തരം കൂട്ടായ്മകൾ വഹിക്കുന്ന പങ്ക് വലുതാണെന്ന് പരിപാടി ഓർമ്മിപ്പിച്ചു. ഗ്രാമത്തിന്റെ നന്മയും കൊന്നപ്പൂവിന്റെ ഓർമ്മകളും ലോകത്തിന്റെ ഏത് കോണിലാണെങ്കിലും ഹൃദയത്തിൽ സൂക്ഷിക്കുന്നവരാണ് മലയാളികൾ എന്ന് ഈ ഓണാഘോഷം ഒരിക്കൽ കൂടി തെളിയിച്ചു.
അംഗങ്ങൾ സ്വന്തമായി തയ്യാറാക്കിയ വിഭവസമൃദ്ധമായ ഓണസദ്യയോടെയാണ് ഓണാഘോഷ പരിപാടികൾക്ക് സമാപനമായത്.
