പെർത്ത്: പശ്ചിമ ഓസ്ട്രേലിയയിൽ വൻ വിലപിടിപ്പുള്ള നാല് കൂറ്റൻ ടഗ്ബോട്ട് പ്രൊപ്പല്ലറുകൾ മോഷ്ടിക്കപ്പെട്ടതായി റിപ്പോർട്ട്. ഏകദേശം 2 ദശലക്ഷം ഓസ്ട്രേലിയൻ ഡോളർ (ഏകദേശം 16.6 കോടി ഇന്ത്യൻ രൂപ) വിലമതിക്കുന്നതാണ് ഇവ.
വെസ്റ്റേൺ ഓസ്ട്രേലിയയുടെ വടക്കൻ മേഖലയിലുള്ള ഡാംപിയറിന് സമീപമുള്ള ബുറപ്പ് പെനിൻസുലയിലെ ഒരു വ്യവസായശാലയിൽ നിന്നാണ് ഇവ കാണാതായത്. മോഷ്ടിക്കപ്പെട്ട ഓരോ പ്രൊപ്പല്ലറിനും 2 ടൺ വീതം തൂക്കമുണ്ട്. മൊത്തം 8 ടൺ ഭാരമുള്ള ഇവ കടത്തിക്കൊണ്ടുപോകാൻ കള്ളന്മാർ വലിയ ക്രെയിനുകളോ മറ്റ് കനത്ത യന്ത്രസാമഗ്രികളോ ഉപയോഗിച്ചിരിക്കാമെന്നാണ് പോലീസ് നിഗമനം.
കഴിഞ്ഞ വർഷം ഡിസംബർ 18-നും ഈ വർഷം മെയ് 29-നും ഇടയിലാണ് മോഷണം നടന്നതെന്നാണ് കരുതുന്നത്. എന്നാൽ സാധനങ്ങൾ നഷ്ടപ്പെട്ട കാര്യം ഉടമസ്ഥർ തിരിച്ചറിയാനും പോലീസിൽ വിവരമറിയിക്കാനും അഞ്ച് മാസത്തോളം വൈകി. ബ്രോൺസ്-നിക്കൽ അലോയ് ഉപയോഗിച്ച് നിർമ്മിച്ച ഈ പ്രൊപ്പല്ലറുകളിൽ ഉയർന്ന അളവിൽ ചെമ്പ് (കോപ്പർ) അടങ്ങിയിട്ടുണ്ട്.
അന്താരാഷ്ട്ര വിപണിയിൽ ചെമ്പിന് വലിയ വിലയുള്ളതിനാൽ, ഇവ സ്ക്രാപ്പ് മാർക്കറ്റിൽ വിൽക്കാൻ വേണ്ടിയാകാം മോഷ്ടിച്ചതെന്ന് പോലീസ് സംശയിക്കുന്നു. ആർക്കെങ്കിലും ഇതുമായി ബന്ധപ്പെട്ട് സംശയാസ്പദമായ വിവരങ്ങൾ ലഭിച്ചാൽ അറിയിക്കണമെന്ന് പോലീസ് പൊതുജനങ്ങളോട് അഭ്യർത്ഥിച്ചിട്ടുണ്ട്.
