ഓസ്ട്രേലിയയിലെ മുതിർന്ന പൗരന്മാർക്ക് ആശ്വാസകരമായ പ്രഖ്യാപനവുമായി ഫെഡറൽ സർക്കാർ. കോമൺവെൽത്ത് ഹോം സപ്പോർട്ട് പ്രോഗ്രാമിന്റെ (CHSP) കാലാവധി 2029 ജൂൺ 30 വരെ നീട്ടാൻ സർക്കാർ തീരുമാനിച്ചു. 8.3 ലക്ഷത്തോളം വയോധികരുടെ ദൈനംദിന ജീവിതത്തെയും പരിചരണത്തെയും നേരിട്ട് ബാധിക്കുന്ന ഈ സുപ്രധാന തീരുമാനം ഏജ്ഡ് കെയർ മേഖലയിലുണ്ടായിരുന്ന വലിയ ആശങ്കകൾക്കാണ് വിരാമമിടുന്നത്.
മുതിർന്ന പൗരന്മാർക്ക് വീടുകളിൽ ആവശ്യമായ അടിസ്ഥാന സൗകര്യങ്ങളും പരിചരണവും ഉറപ്പാക്കുന്ന സി.എച്ച്.എസ്.പി പദ്ധതി പുതിയ സപ്പോർട്ട് അറ്റ് ഹോം പ്രോഗ്രാമുമായി സംയോജിപ്പിക്കില്ലെന്നും പകരം 2029 വരെ സ്വതന്ത്ര പ്രോഗ്രാമായി തന്നെ തുടരുമെന്നും ആരോഗ്യ, ഏജിംഗ് മന്ത്രി മാർക്ക് ബട്ലർ വ്യക്തമാക്കി. പദ്ധതിയുടെ ഭാവി സംബന്ധിച്ച അനിശ്ചിതത്വം കാരണം സേവനങ്ങളിൽ നിന്ന് പിന്മാറാൻ പല ഏജ്ഡ് കെയർ പ്രൊവൈഡർമാരും തീരുമാനിച്ചിരുന്ന സാഹചര്യത്തിലാണ് സർക്കാരിന്റെ അടിയന്തര ഇടപെടൽ ഉണ്ടായത്.
ഓസ്ട്രേലിയയിലുടനീളമുള്ള 8,30,000 മുതിർന്ന പൗരന്മാരാണ് വീട് വൃത്തിയാക്കൽ, ഷോപ്പിംഗ്, മീൽസ് ഓൺ വീൽസ്, ഗതാഗതം, മറ്റ് ആരോഗ്യ സേവനങ്ങൾ എന്നിവയ്ക്കായി നിലവിൽ ഈ പദ്ധതിയെ ആശ്രയിക്കുന്നത്. പദ്ധതി നീട്ടിയതിലൂടെ രാജ്യത്തെ 1,300-ഓളം വരുന്ന സേവനദാതാക്കൾക്ക്, പ്രത്യേകിച്ച് പ്രാദേശിക കൗൺസിലുകൾക്കും സന്നദ്ധ സംഘടനകൾക്കും തങ്ങളുടെ സേവനങ്ങൾ തടസ്സമില്ലാതെ മുന്നോട്ട് കൊണ്ടുപോകാൻ സാധിക്കും. പദ്ധതിയുടെ ഗുണഭോക്താക്കളിൽ 40 ശതമാനവും വൻകിട നഗരങ്ങൾക്ക് പുറത്ത് താമസിക്കുന്നവരാണെന്നത് ഗ്രാമീണ മേഖലകളിൽ ഇതിന്റെ പ്രാധാന്യം വർദ്ധിപ്പിക്കുന്നു.
കമ്മ്യൂണിറ്റി അധിഷ്ഠിത സേവനങ്ങളിലൂടെ മുതിർന്നവരെ ആരോഗ്യത്തോടെയും സ്വതന്ത്രരായും നിലനിർത്താനാണ് ബ്ലോക്ക് ഫണ്ടിംഗ് രീതിയിലുള്ള ഈ പ്രോഗ്രാം ലക്ഷ്യമിടുന്നതെന്ന് ഏജ്ഡ് കെയർ മന്ത്രി സാം റേ ചൂണ്ടിക്കാട്ടി. 2026 അവസാനത്തോടെ ഈ പദ്ധതിയുടെ ദീർഘകാല രൂപകൽപ്പന സംബന്ധിച്ച ഔദ്യോഗിക ചർച്ചകൾ ആരംഭിക്കാനാണ് സർക്കാർ ലക്ഷ്യമിടുന്നത്. ഓസ്ട്രേലിയയിലെ മലയാളി സമൂഹത്തിലുള്ള മുതിർന്ന പൗരന്മാർക്കും അവരുടെ കുടുംബങ്ങൾക്കും വലിയ സാമ്പത്തിക, മാനസിക പിന്തുണ നൽകുന്നതാണ് സർക്കാരിന്റെ ഈ സുപ്രധാന നീക്കം.
