ഓസ്ട്രേലിയയിൽ ജീവിക്കുന്ന മലയാളി വിദ്യാർത്ഥികൾക്ക് തങ്ങളുടെ മാതൃഭാഷ സ്കൂളുകളിൽ കൂടുതൽ മികച്ച രീതിയിൽ പഠിക്കാൻ അവസരമൊരുങ്ങുന്നു. മലയാളം ഉൾപ്പെടെ എട്ട് പ്രധാന ഇന്ത്യൻ ഭാഷകളുടെ പഠനത്തിനും അധ്യാപനത്തിനുമായി ഫെഡറൽ സർക്കാർ വൻ സാമ്പത്തിക സഹായം പ്രഖ്യാപിച്ചു.
ഏഷ്യൻ ഭാഷകളിലെ പ്രാവീണ്യം വർദ്ധിപ്പിക്കുന്നതിനായി നടപ്പിലാക്കുന്ന കമ്മ്യൂണിറ്റി ലാംഗ്വേജ് സ്കൂൾസ് ഗ്രാന്റ്സ് പ്രോഗ്രാമിലൂടെയാണ് (Community Language Schools Grants Program) പുതിയ ഫണ്ടിംഗ് ലഭ്യമാക്കുന്നത്. മലയാളം, ബംഗാളി, ഗുജറാത്തി, ഹിന്ദി, പഞ്ചാബി, തമിഴ്, തെലുങ്ക്, ഉറുദു എന്നീ എട്ട് ഇന്ത്യൻ ഭാഷകൾക്കാണ് ഇതിലൂടെ പ്രത്യേക പരിഗണന ലഭിക്കുക. പുതിയ പഠന സാമഗ്രികൾ വികസിപ്പിക്കാനും, അധ്യാപകർക്ക് ആധുനിക പരിശീലനം നൽകാനും, സീനിയർ സെക്കൻഡറി ക്ലാസുകളിൽ (Years 11 and 12) ഭാഷാ പഠനം വിപുലീകരിക്കാനും ഈ തുക വിനിയോഗിക്കും. ഓസ്ട്രേലിയൻ പശ്ചാത്തലത്തിൽ വളരുന്ന പുതിയ തലമുറയ്ക്ക് തങ്ങളുടെ സംസ്കാരവുമായും വേരുകളുമായും ആഴത്തിലുള്ള ബന്ധം നിലനിർത്താൻ ഈ പദ്ധതി സഹായിക്കുമെന്ന് മന്ത്രി ഡോ. ആൻ അലി വ്യക്തമാക്കി.
പ്രമുഖ സർവ്വകലാശാലകളായ ദി ഓസ്ട്രേലിയൻ നാഷണൽ യൂണിവേഴ്സിറ്റി (ANU), ദി യൂണിവേഴ്സിറ്റി ഓഫ് സിഡ്നി എന്നിവയും പദ്ധതിയുടെ ഭാഗമായി പുതിയ സംവിധാനങ്ങൾ ഒരുക്കും. കമ്മ്യൂണിറ്റി ഭാഷാ അധ്യാപകർക്കായി ഡിജിറ്റൽ ലാംഗ്വേജ് ഹബ്ബുകൾ സ്ഥാപിക്കാൻ സർവ്വകലാശാലകൾ മുൻകൈയെടുക്കും. ഇതിനുപുറമെ, തമിഴ് ഭാഷാ പഠനം പ്രോത്സാഹിപ്പിക്കുന്നതിനായി തമിഴ് സ്റ്റഡി സെന്റർ ഹോംബുഷ്, എൻ.എസ്.ഡബ്ല്യു ഫെഡറേഷൻ ഓഫ് തമിഴ് സ്കൂൾസ് എന്നീ സംഘടനകൾക്കും സാമ്പത്തിക സഹായം ലഭിക്കും. ഈ പദ്ധതി പിന്നീട് ന്യൂ സൗത്ത് വെയിൽസ് സംസ്ഥാനം മുഴുവൻ വ്യാപിപ്പിക്കാനാണ് അധികൃതർ ലക്ഷ്യമിടുന്നത്.
കഴിഞ്ഞ ദിവസം അനുവദിച്ച $1.47 മില്യൺ ഗ്രാന്റിന് പുറമെയാണ് പുതിയ സഹായങ്ങൾ പ്രഖ്യാപിച്ചിരിക്കുന്നത്. 2025–26 സാമ്പത്തിക വർഷം മുതൽ നാല് വർഷത്തേക്ക് ആകെ $25.6 മില്യൺ ഡോളറാണ് കമ്മ്യൂണിറ്റി ലാംഗ്വേജ് സ്കൂളുകൾക്കായി ആൽബനീസി സർക്കാർ നീക്കിവെച്ചിട്ടുള്ളത്. പ്രധാന വ്യാപാര പങ്കാളിത്ത രാജ്യങ്ങളിലെ ഭാഷകൾ സംസാരിക്കാൻ കഴിയുന്ന പൗരന്മാർ രാജ്യത്ത് ഉണ്ടാകുന്നത് ഓസ്ട്രേലിയക്ക് ഭാവിയിൽ വലിയ സാമ്പത്തിക നേട്ടങ്ങൾ നൽകുമെന്ന് അസിസ്റ്റന്റ് മന്ത്രി ജൂലിയൻ ഹിൽ അഭിപ്രായപ്പെട്ടു.
