മാൾട്ട: മാൾട്ടീസ് ഭാഷ മാതൃഭാഷയായ വിദ്യാർഥികൾക്കൊപ്പം വിദേശ വിദ്യാർഥികളും ഒരേ ക്ലാസിലിരുന്ന് മാൾട്ടീസ് ഭാഷ പഠിക്കുന്ന സാഹചര്യം മാൾട്ടയിലെ പല സ്കൂളുകളിലുമുണ്ടെന്ന് വിദ്യാഭ്യാസ വിദഗ്ധർ.
മാൾട്ട സർവകലാശാലയിലെ വിദ്യാഭ്യാസ ഫാക്കൽറ്റി ഡെപ്യൂട്ടി ഡീൻ കാരൻ മുഗ്ലിയറ്റ് ആണ് ഇക്കാര്യം വ്യക്തമാക്കിയത്. സ്വദേശികളായ വിദ്യാർഥികൾക്കും വിദേശ വിദ്യാർഥികൾക്കും മാൾട്ടീസ് ഭാഷയിലെ പരിജ്ഞാനം ഒരുപോലെയല്ല. അതിനാൽ ഇരുവിഭാഗത്തിനും ഒരേ രീതിയിൽ ക്ലാസ് എടുക്കുന്നത് അധ്യാപകർക്ക് വെല്ലുവിളിയാകുന്നുണ്ട്.
ചില സ്കൂളുകളിൽ സ്വദേശികൾക്കും വിദേശ വിദ്യാർഥികൾക്കും പ്രത്യേകം മാൾട്ടീസ് ഭാഷാ ക്ലാസുകൾ നടത്താൻ ആവശ്യമായ അധ്യാപകരും സൗകര്യങ്ങളുമുണ്ട്. എന്നാൽ എല്ലാ സ്കൂളുകളിലും ഇത് സാധ്യമല്ല. ചില ക്ലാസുകളിൽ വിദ്യാർഥികൾക്ക് കാര്യങ്ങൾ എളുപ്പത്തിൽ മനസ്സിലാക്കുന്നതിനായി അധ്യാപകർ ഇംഗ്ലീഷും ഉപയോഗിക്കേണ്ടിവരുന്നുണ്ട്.വിദേശ വിദ്യാർഥികൾ മാൾട്ടീസ് ഭാഷ പഠിക്കുന്നത് കൂടുതൽ എളുപ്പമാക്കുന്നതിനൊപ്പം, സ്വദേശികളായ വിദ്യാർഥികൾക്കും അവരുടെ നിലവാരത്തിന് അനുയോജ്യമായ പഠനം ലഭിക്കുന്നുവെന്ന് ഉറപ്പാക്കേണ്ടതുണ്ടെന്ന് മുഗ്ലിയറ്റ് പറഞ്ഞു.
വിദ്യാഭ്യാസ മേഖലയിലെ സർക്കാർ നിക്ഷേപം വർധിച്ചിട്ടുണ്ടെങ്കിലും, പണം ചെലവഴിക്കുന്നത് മാത്രം പോരെന്നും അത് വിദ്യാർഥികളുടെ പഠനഫലത്തിൽ പ്രതിഫലിക്കുന്നുണ്ടോ എന്ന് പരിശോധിക്കണമെന്നും അവർ അഭിപ്രായപ്പെട്ടു.
പഠനനിലവാരത്തിലും ആശങ്ക
15 വയസ്സുള്ള വിദ്യാർഥികളുടെ വായന, ഗണിതം, ശാസ്ത്രം എന്നിവയിലെ കഴിവുകൾ പരിശോധിക്കുന്ന PISA പഠനഫലങ്ങളും മുഗ്ലിയറ്റ് പരാമർശിച്ചു. ഈ മൂന്ന് മേഖലകളിലും മാൾട്ടീസ് വിദ്യാർഥികളുടെ പ്രകടനം ആശങ്കപ്പെടുത്തുന്നതാണെന്നാണ് വിലയിരുത്തൽ.പാഠപുസ്തകങ്ങളിലെ വലിയ അളവിലുള്ള വിവരങ്ങൾ പഠിപ്പിക്കുന്നതിനു പകരം, കുട്ടികൾക്ക് കാര്യങ്ങൾ മനസ്സിലാക്കാനും ചോദ്യങ്ങൾ ചോദിക്കാനും പഠിച്ച കാര്യങ്ങൾ ജീവിതത്തിൽ പ്രയോഗിക്കാനും കൂടുതൽ അവസരം നൽകേണ്ടതുണ്ടെന്നും അവർ പറഞ്ഞു.
കുട്ടികളുടെ ആദ്യകാല വിദ്യാഭ്യാസത്തിനും കൂടുതൽ പ്രാധാന്യം നൽകണമെന്ന് മുഗ്ലിയറ്റ് ആവശ്യപ്പെട്ടു. പ്രീ-പ്രൈമറി വിദ്യാഭ്യാസം കുട്ടികളെ നോക്കിവയ്ക്കുന്ന സംവിധാനം മാത്രമല്ലെന്നും, കുട്ടികളുടെ ഭാവി പഠനത്തിന്റെ അടിത്തറയാണെന്നും അവർ ചൂണ്ടിക്കാട്ടി.
മാൾട്ടീസ്, ഇംഗ്ലീഷ് ഭാഷകളിൽ മികച്ച പ്രാവീണ്യമുള്ളതും ആവശ്യമായ പരിശീലനം നേടിയതുമായ അധ്യാപകരെ ഈ മേഖലയിലേക്ക് കൊണ്ടുവരേണ്ടതിന്റെ പ്രാധാന്യവും അവർ വ്യക്തമാക്കി.
