പലസ്തീന് അനുകുലമായ നിലപാടുമായി ഓസ്ട്രേലിയ. ഓസ്ട്രേലിയന് വിദേശകാര്യ മന്ത്രി പെന്നി വോങ് ആണ് ഇതു സംബന്ധിച്ച നിര്ണായക പ്രതികരണം നടത്തിയത്. പശ്ചിമേഷ്യന് മേഖലയെ സമാധാനത്തിലേക്ക് വഴിനടത്താന് കഴിയുമെങ്കില് പലസ്തീന്റെ രാഷ്ട്രപദവി അംഗീകരിക്കാന് രാജ്യത്തിന് കഴിയുമെന്നായിരുന്നു ഓസ്ട്രേലിയന് വിദേശകാര്യ മന്ത്രിയുടെ നിര്ദേശം. എന്നാല് ഭരണത്തില് ഹമാസിന് പങ്കാളിത്തം ഉണ്ടാകരുത് എന്നും പെന്നി കൂട്ടിച്ചേര്ത്തു.
ഇസ്രയേല് പലസതീന് ദ്വിരാഷ്ട്ര സിദ്ധാന്തത്തെ പിന്തുണച്ചിരുന്ന ഓസ്ട്രേലിയ നിലപാടില് മാറ്റം വരുത്തുന്നു എന്ന സൂചനയാണ് വിദേശ കാര്യ മന്ത്രിയുടെ പ്രതികരണത്തിലൂടെ പുറത്തുവരുന്നതന്ന് അന്താരാഷ്ട്ര മാധ്യങ്ങള് ചൂണ്ടിക്കാട്ടുന്നത്. ദ്വിരാഷ്ട്ര പരിഹാരത്തിന്റെ ഭാഗമായി മാത്രമേ പലസ്തീന് എന്ന രാഷ്ട്രത്തെ അംഗീകരിക്കാന് കഴിയൂ എന്നായിരുന്നു നേരത്തെ ഓസ്ട്രേലിയയുടെ നിലപാട്.
എന്നാല്, ഓസ്ട്രേലിയന് വിദേശ കാര്യ മന്ത്രിയുടെ നിലപാടിന് എതിരെ രാജ്യത്തിനുള്ളില് നിന്നു തന്നെ വിമര്ശനം ഉയര്ന്നിട്ടുണ്ട്. ഇത്തരമൊരു നീക്കം ധൃതിപിടിച്ച് കൈക്കൊള്ളേണ്ട ഒന്നല്ലെന്നാണ് ഓസ്ട്രേലിയിലെ പ്രതിപക്ഷവും സയണിസ്റ്റ് ഫെഡറേഷന് ഓഫ് ഓസ്ട്രേലിയയുടെയും നിലപാട്. ഓസ്ട്രേലിയ കാലങ്ങളായി തുടര്ന്ന് വരുന്ന പക്ഷപാതരഹിതമായ നയത്തിന് വിരുദ്ധമാണ് ഈ നിലപാടെന്ന് പ്രതിപക്ഷ വക്താവ് സിമോണ് ബിര്മിങ്ഹാം പറഞ്ഞു. നിലപാടില് നിന്നുള്ള ആല്ബനീസ് സര്ക്കാരിന്റെ ഈ വ്യതിചലനത്തെ പ്രതിപക്ഷം പിന്താങ്ങില്ലെന്നും അദ്ദേഹം വ്യക്തമാക്കി.
