ഓസ്‌ട്രേലിയയിലെ പെർത്ത് നഗരത്തിലെ ബാല്കട്ടയിലും സമീപ പ്രാന്തപ്രദേശങ്ങളിലും നായ്ക്കളിൽ ഗുരുതരമായ രോഗാവസ്ഥയ്ക്കും മരണത്തിനും കാരണമാകാവുന്ന കനൈൻ പാർവോവൈറസ് (Canine Parvovirus) സ്ഥിരീകരിച്ചതിനെത്തുടർന്ന് നായ ഉടമകൾക്ക് ജാഗ്രതാ നിർദേശം. അതീവ പകർച്ചശേഷിയുള്ള വൈറസിനെക്കുറിച്ച് മുന്നറിയിപ്പ് നൽകിയിരിക്കുകയാണ് മൃഗഡോക്ടർമാർ.
രോഗലക്ഷണങ്ങൾ ശ്രദ്ധിക്കണം
പെർത്തിലെ കാരിന്യപ്പ് സ്മോൾ അനിമൽ ഹോസ്പിറ്റലാണ് വൈറസ് വ്യാപനസാധ്യത കണക്കിലെടുത്ത് മുന്നറിയിപ്പ് നൽകിയത്. നായ്ക്കളിൽ വൈറസ് ബാധയുടെ ലക്ഷണങ്ങൾ കണ്ടെത്തുന്നതിനും മറ്റ് മൃഗങ്ങളിലേക്ക് രോഗം പകരുന്നത് തടയുന്നതിനുമായി ആശുപത്രി പ്രത്യേക മുൻകരുതലുകളും ഏർപ്പെടുത്തിയിട്ടുണ്ട്.
നായ്ക്കളിൽ താഴെ പറയുന്ന ലക്ഷണങ്ങൾ കണ്ടാൽ ഉടമകൾ പ്രത്യേകം ശ്രദ്ധിക്കണം:
അമിതമായ ക്ഷീണവും ഉന്മേഷക്കുറവും.
ഭക്ഷണം കഴിക്കാനുള്ള താൽപര്യം നഷ്ടപ്പെടുക.
ഛർദി.
വയറിളക്കം.
നിർജലീകരണം.
നായ്ക്കളുടെ ദഹനവ്യവസ്ഥയെയും പ്രതിരോധശേഷിയെയും ബാധിക്കുന്ന ഈ വൈറസ് ഗുരുതരമായ ആരോഗ്യപ്രശ്നങ്ങൾ സൃഷ്ടിക്കാം. പ്രത്യേകിച്ച് പ്രായം കുറഞ്ഞ നായ്ക്കുട്ടികൾക്കും വാക്‌സിനേഷൻ പൂർത്തിയാകാത്ത നായ്ക്കൾക്കും രോഗബാധയുടെ സാധ്യത കൂടുതലാണ്.
രോഗവ്യാപനം തടയുന്നതിനായി കാരിന്യപ്പ് മൃഗാശുപത്രിയിൽ എത്തുന്ന നായ്ക്കളെ ആദ്യം വാഹനത്തിനുള്ളിൽവെച്ച് പരിശോധിക്കാനാണ് തീരുമാനം. പൂർണമായ വ്യക്തിഗത സുരക്ഷാ ഉപകരണങ്ങൾ ധരിച്ചെത്തുന്ന മൃഗഡോക്ടർമാർ വാഹനത്തിനരികിൽവെച്ച് പരിശോധനയും ആവശ്യമായ വൈറസ് പരിശോധനകളും നടത്തും.
രോഗലക്ഷണങ്ങൾ കാണിക്കുന്ന നായ്ക്കളുമായി ആശുപത്രിയിലെത്തുന്നവർ മുൻകൂട്ടി ഫോൺ ചെയ്ത് വിവരം അറിയിക്കണമെന്നും പരിശോധനാഫലം ലഭിക്കുന്നതുവരെ വാഹനത്തിൽത്തന്നെ തുടരണമെന്നും ആശുപത്രി നിർദേശിച്ചിട്ടുണ്ട്.
എങ്ങനെയാണ് രോഗം പകരുന്നത്?
രോഗബാധയുള്ള നായ്ക്കളുമായുള്ള സമ്പർക്കം, അവയുടെ വിസർജ്യം, വൈറസ് മലിനമാക്കിയ പ്രതലങ്ങൾ എന്നിവയിലൂടെ പാർവോവൈറസ് പകരാം. പരിസ്ഥിതിയിൽ ദീർഘകാലം നിലനിൽക്കാനുള്ള ശേഷിയുള്ളതിനാൽ വൈറസിനെ പൂർണമായി ഇല്ലാതാക്കുന്നത് പ്രയാസകരമാണ്.ഓസ്‌ട്രേലിയയിൽ പ്രതിവർഷം ഏകദേശം 20,000 പാർവോവൈറസ് കേസുകൾ റിപ്പോർട്ട് ചെയ്യപ്പെടുന്നുണ്ടെന്നാണ് റിപ്പോർട്ട്. സെപ്റ്റംബർ അവസാനത്തോടെ പെർത്തിലെ വാനറൂ മൃഗസംരക്ഷണ കേന്ദ്രത്തിലും രോഗബാധ സ്ഥിരീകരിച്ചിരുന്നു.
നായ്ക്കളെ പാർവോവൈറസിൽനിന്ന് സംരക്ഷിക്കുന്നതിനായി വാക്‌സിനേഷൻ കൃത്യസമയത്ത് പൂർത്തിയാക്കണമെന്ന് മൃഗഡോക്ടർമാർ നിർദേശിക്കുന്നു. വാക്‌സിനേഷൻ സംബന്ധിച്ച രേഖകൾ പരിശോധിക്കുകയും സംശയങ്ങളുണ്ടെങ്കിൽ മൃഗഡോക്ടറുടെ ഉപദേശം തേടുകയും വേണം.നായ്ക്കളിൽ രോഗലക്ഷണങ്ങൾ കണ്ടാൽ സ്വയം ചികിത്സിക്കാതെ ഉടൻ മൃഗഡോക്ടറുമായി ബന്ധപ്പെടണം. രോഗം പടരാനുള്ള സാധ്യത കുറയ്ക്കുന്നതിന് രോഗബാധ സംശയിക്കുന്ന നായ്ക്കളെ മറ്റ് നായ്ക്കളിൽനിന്ന് അകറ്റിനിർത്തുന്നതും പ്രധാനമാണ്.
