സിഡ്നി: ഓസ്ട്രേലിയയിലെ ക്രിസ്ത്യൻ വിദ്യഭ്യാസ സ്ഥാപനങ്ങളിൽ വിശ്വാസികളായ അധ്യാപകരെയും ജീവനക്കാരെയും നിയമിക്കാനുള്ള സ്വാതന്ത്ര്യം ഇല്ലാതാക്കുന്ന നിയമ പരിഷ്കരണ കമ്മിഷൻ ശിപാർശകൾക്കെതിരെ ക്യാമ്പെയ്നുമായി ഓസ്ട്രേലിയൻ ക്രിസ്ത്യൻ ലോബി (എ.സി.എൽ). കത്തോലിക്ക സ്കൂളുകളിൽ വിശ്വാസികളായ അധ്യാപകരെയും ജീവനക്കാരെയും നിയമിക്കുന്നതിൽ നിലവിൽ ലഭിച്ചുകൊണ്ടിരുന്ന ഇളവുകൾ ഇല്ലാതാക്കുന്നതാണ് പുതിയ ശിപാർശകളെന്ന് എ.സി.എൽ ആരോപിക്കുന്നു.
രാജ്യത്തുടനീളമുള്ള ക്രിസ്ത്യൻ സ്കൂളുകളുടെ അസ്ഥിത്വം തന്നെ ഇല്ലാതാക്കുന്ന ശിപാർശകൾക്കെതിരേ ശക്തമായ പ്രതിഷേധമാണ് വിശ്വാസികളിൽനിന്ന് ഉയരുന്നത്. തങ്ങളുടെ ക്രൈസ്തവ വിശ്വാസങ്ങൾക്കു വിരുദ്ധമായി ലൈംഗികതയെയും ലിംഗഭേദത്തെയും കുറിച്ചുള്ള ആശയങ്ങൾ കുട്ടികളിൽ കുത്തിനിറയ്ക്കാൻ ക്രിസ്ത്യൻ സ്കൂളുകളെ നിർബന്ധിക്കുന്നതാണ് ശിപാർശ. അതോടൊപ്പം വിശ്വാസികളായ അധ്യാപകരെയും ജീവനക്കാരെയും നിയമിക്കാനുള്ള സ്വാതന്ത്ര്യവും ഇല്ലാതാകുമെന്ന് ഓസ്ട്രേലിയൻ ക്രിസ്ത്യൻ ലോബി മുന്നറിയിപ്പ് നൽകുന്നു.അതായത്, വിശ്വാസത്തിനെതിരേ നിലകൊള്ളുന്ന ഒരു ജീവനക്കാരനെ നിയമിക്കാതിരിക്കാനോ പിരിച്ചുവിടാനോ ഉള്ള അവകാശം നിഷേധിക്കപ്പെടും. ഇത് ഭാവിയിൽ സ്കൂളുകളുടെ സ്വതന്ത്രമായ പ്രവർത്തനത്തെ ബാധിക്കുകയും ചെയ്യുമെന്നാണ് ആശങ്ക.
ഓസ്ട്രേലിയയുടെ ഫെഡറൽ സെക്സ് ഡിസ്ക്രിമിനേഷൻ ആക്ട് 1984 ഭേദഗതി ചെയ്യാനുള്ള നീക്കങ്ങളാണ് ഇപ്പോൾ നടന്നുവരുന്നത്. ഈ നിയമ പ്രകാരം ലിംഗ വ്യക്തിത്വം, ലൈംഗിക ആഭിമുഖ്യം, വിവാഹാവസ്ഥ, ഗർഭധാരണം എന്നിവയുൾപ്പെടെയുള്ള നിരവധി കാരണങ്ങളാലുള്ള വിവേചനം നിരോധിക്കുന്നു. അതേസമയം, ഈ നിയമങ്ങൾ വിശ്വാസാധിഷ്ഠിതമായി പ്രവർത്തിക്കുന്ന വിദ്യാഭ്യാസ സ്ഥാപനങ്ങൾക്ക് ഇളവുകൾ അനുവദിച്ചിരുന്നു. ഇത്തരം വിദ്യാഭ്യാസ സ്ഥാപനങ്ങൾ വിശ്വാസപരമായ കാരണങ്ങളാൽ വിവേചനം കാണിക്കുന്നത് ഫെഡറൽ നിയമപ്രകാരം നിയമവിരുദ്ധമല്ലെന്ന് ഉറപ്പാക്കിയിരുന്നു. എന്നാൽ ഈ ഇളവുകളെല്ലാം അട്ടിമറിക്കുന്നതാണ് പുതിയ ശിപാർശകളെന്ന് ഓസ്ട്രേലിയൻ ക്രിസ്ത്യൻ ലോബി പറയുന്നു.നിയമനത്തിലെ വിവേചനം അവസാനിപ്പിക്കാനെന്ന വാദമുയർത്തിയാണ് നിയമ പരിഷ്കരണ കമ്മിഷൻ ഈ ശിപാർശകൾ കൊണ്ടുവന്നത്.
ക്രിസ്ത്യൻ സ്കൂളുകൾ പിന്തുടരുന്ന മൂല്യങ്ങളും വിശ്വാസവും കുട്ടികളിലേക്കു പകർന്നുകൊടുക്കാൻ കഴിയുന്ന ജീവനക്കാരെ നിയമിക്കാൻ സ്കൂളുകൾക്ക് അവകാശം ഉണ്ടാകണമെന്നാണ് വിശ്വാസികളുടെ ആവശ്യം.അരാജകത്വ പ്രത്യയശാസ്ത്രങ്ങളെ ഊട്ടിയുറപ്പിക്കുന്നതും മാതാപിതാക്കളുടെ മതപരവും ധാർമ്മികവുമായ ബോധ്യങ്ങൾക്കനുസൃതമായി കുട്ടികളെ പഠിപ്പിക്കാനുള്ള അവകാശങ്ങൾ നിഷേധിക്കുകയും ചെയ്യുന്ന ഗൗരവമേറിയ നിർദ്ദേശങ്ങളാണിവ. നിലവിൽ, നിർദിഷ്ട പരിഷ്കാരങ്ങൾ മതപരമായ വിദ്യാഭ്യാസ സ്ഥാപനങ്ങളിൽ മാത്രമായി പരിമിതപ്പെടുത്തിയിരിക്കുന്നു. എന്നാൽ ഭാവിയിൽ ഈ ശുപാർശകൾ എല്ലാ മതസ്ഥാപനങ്ങളിലേക്കും വ്യാപിപ്പിക്കണമെന്നും നിർദ്ദേശമുണ്ട്.ഈ ശുപാർശകൾ സ്വീകാര്യമല്ലെന്ന ശക്തമായ സന്ദേശം ഫെഡറൽ ജനപ്രധിനിധികൾക്ക് നൽകാനാണ് ഓസ്ട്രേലിയൻ ക്രിസ്ത്യൻ ലോബി ക്യാമ്പെയ്ൻ സംഘടിപ്പിക്കുന്നത്.
ചുവടെയുള്ള വെബ്സെറ്റ് ലിങ്ക് സന്ദർശിച്ച് പ്രധാനമന്ത്രി, അറ്റോർണി ജനറൽ, വിദ്യാഭ്യാസ മന്ത്രി, ഷാഡോ മന്ത്രിമാർ എന്നിവർക്ക് ഇ മെയിൽ അയച്ച് ഈ പ്രതിഷേധ ഉദ്യമത്തിൽ പങ്കുചേരാം.
https://www.acl.org.au/cm_nat_alrc
